21 февраля 2015 г.
Шăпах çавăн чухлĕ пурăнмалли çурт-йĕр тума палăртаççĕ Чăваш Енре.
Нумаях пулмасть Раççей Федерацийĕн Правительствин Председателĕ Дмитрий Медведев Чăваш Республикинче пулнă май Чăваш Ен Пуçлăхĕпе Михаил Игнатьевпа ĕçлĕ тĕл пулу иртрĕ. Кун йĕркинчи тĕп ыйтусемсĕр пуçне Раççей премьер-министрĕ республикăн экономикăпа социаллă пурнăç аталанăвĕпе, вăл шутра пурăнмалли çурт-йĕр тăвасси мĕнле пынипе те интересленчĕ.
Чăваш Ен Пуçлăхĕ Михаил Игнатьев макроэкономика кăтартăвĕсем япăх пулманни пирки каларĕ. Республикăра пĕтĕмĕшле продукци туса илесси 2,5 процент ÿснĕ. Промышленноç продукцийĕн индексĕ 104,5 процентпа, пурăнмалли çурт-йĕр хута ярасси 103 процентпа, ял хуçалăх продукцине туса илесси 102,8 процентпа танлашнă.
"Иртнĕ çул эпир 862 пин тăваткал метр пурăнмалли çурт-йĕр хута ятăмăр. Задача вара - 1 млн. тăваткал метра çитересси. Мĕншĕн тесен Эсир пирĕн ума задача лартрăр: пурăнакан пĕр çын пуçне - 1 тăваткал метр. Ку вăл - Атăлçи федераци округĕнче чи лайăх кăтарту. Эпир ку чикĕрен чакма шутламастпăр", - палăртрĕ республика Пуçлăхĕ. "Аван", - ырларĕ республика ертÿçисен ĕçне Дмитрий Медведев.
Чăваш Республикинче 2014 çулта пур йышши финанс çăл куçĕпе усă курса 862,1 пин тăваткал метр пурăнмалли çурт-йĕр хута янă. Ку вăл, 2013 çулхипе танлаштарсан, 103 процент пулать. Вăл шутран 404,1 пин тăваткал метрне çынсем харпăр хăй вăйĕпе хута янă. Экономкласс стандарчĕсемпе 396,5 тăваткал метр пурăнмалли çурт-йĕр çĕкленĕ.
Муркаш районĕнче 2014 çулта пурăнмалли çурт-йĕр 28,554 пин тăваткал метр, вăл шутран 22,206 пин тăваткал метр харпăр хăй вăйĕпе туса лартнă. Кашни çын пуçне хута янă пурăнмалли çурт-йĕр лаптăкĕ вăтамран 0,84 тăваткал метрпа (республикипе 0,7) танлашать.
Районĕпе кашни çын пуçне тивекен пурăнмалли çурт-йĕр лаптăкĕ - вăтамран 27 тăваткал метр (республикипе 24,8).
Муркаш район администрацийĕ 2015 çулта район территорийĕнче пурăнмалли çурт-йĕр 28,5 пин тăваткал метртан кая мар хута ярассине тивĕçтерме палăртать.
ЧР Строительство, архитектура тата çурт-йĕрпе коммуналлă хуçалăх министерстви.