14 февраля 2015 г.
Иртнĕ кунсенче РФ Наркоконтроль службин Чăваш Енри управленийĕ 2014 çулти ĕçе пĕтĕмлетнĕ май управлени пуçлăхĕ Евгений Барсуков генерал-майор массăллă информаци хатĕрĕсен журналисчĕсемпе тĕл пулчĕ.
Калаçу регионта наркологи тĕлĕшĕнчи лару-тăру, общественноçпа, влаç тата вăй структурисемпе, çемьесемпе çыхăнса ĕçлесси, çул çитменнисемпе профилактика ĕçне пурнăçласси, вĕсемпе ыйтăм ирттересси тата ытти пирки те пулнă.
Калаçура республикăра наркологи лару-тăрăвĕ çивĕчлĕх кăларса тăратманнине асăннă, право сыхлавĕн органĕсем наркотиксен саккунсăр çаврăнăшне куçран вĕçертменнине палăртнă. Пĕлтĕр диспансера наркологи учетне пуçласа тăратнă çынсен йышĕ те малтанхи çулхинчен чакнă. Анчах та пĕтĕмĕшле ĕç-хĕл кăтартăвĕсем лайăх енне сулăнаççĕ пулин те, наркотик йышăнакан çул çитмен çамрăксем (вĕсем профилактика учетĕнче тăраççĕ) самаях нумайланнă. Çакă паллах пăшăрхантарать. Ку вара Интернет-технологисем хăвăрт аталаннипе çыхăннă. Шăпах социаллă сетьсенче "спайс", "микс" е ытти наркотик хутăшĕ сиенлĕ мар тесе суя информаци сараççĕ те. Çавăнпах çамрăксем хушшинче психоактивлă хутăшсем анлă сарăлаççĕ.
Управлени специалисчĕсем асăрхаттару мероприятийĕсене чылай пурнăçлаççĕ, районсене тухса çÿреççĕ. Пĕлтĕр кăна асăрхаттару калаçăвĕсене вĕсем 17 пине яхăн çынна явăçтарнă.
Синтетика наркотиксене иртнĕ çул Чăваш Енре 15 кг ытла саккунсăр çаврăнăшран туртса илнĕ (2013 çулта - 1,5 кг ытларах). Управлени 2014 çулта 4 кг ытла туртмалли хутăшсем, 6 кг ытла психотроп хутăшсем туртса илнĕ, наркопритонсен шутне чакарма пултарнă. Саккунсен пуххине кĕртнĕ çĕнĕлĕхсем те республикăра наркотиксене хирĕç кĕрешессине пулăшу панă.
Республикипе вара наркотиксен, психотроп тата çакна майлă ытти хутăшсен саккунсăр çаврăнăшĕ тĕлĕшпе 950 преступлени тупса палăртнă, 615 преступление тишкернĕ, вăл шутра наркотик сутнипе - 251, притонсем йĕркеленипе - 7, наркотик контрабандипе - 7 тата ыттисене те.
Çак кунсенче республикăра тепĕр тĕслĕх нумайăшне пăлхатрĕ. Управлени сотрудникĕсем Шупашкарти пĕр шкулта вĕренекен 17 çулти хĕрсене тытса чарнă. Вĕсене синтетика наркотикне сутнăшăн айăпланма пултаракансем тесе шутлаççĕ. Следстви палăртнă тăрăх 11 класра вĕренекенсем лайăх çемьесенченех, укçа "ĕçлесе" илесшĕн пулнă. Халĕ вара ку тĕслĕхпе РФ УК 228 статйин 5 пайĕнче çырса кăтартнипе уголовлă ĕç пуçарнă. Апла асăрхаттару калаçăвĕсем çивĕчлĕхне çухатмаççĕ.
Наркоконтроль службин республикăри управленийĕн материалĕсем тăрăх
хатĕрленĕ.