07 февраля 2015 г.
Юлашки вăхăтра нумай хваттерлĕ çуртсенче пурăнакансенчен хăшĕсем коммуналлă услугăсемпе усă курнăшăн тÿлемелли укçа-тенкĕ виçи ÿсни пирки пăшăрханса калаçнине илтме пулать. Вĕсем çакăн пирки ăнлантарса пама ыйтаççĕ. Мĕнпе çыхăннă ку; Тарифсем хăпарнă-и е сăлтавĕ урăххинче;
Кун пирки район администрацийĕн пуçлăхĕн çумĕ - капиталлă строительство тата обществăлла инфраструктурăна аталантарассин пайĕн пуçлăхĕ Владимир Германович НИКИТИН çакăн пек хурав пачĕ:
- Чăваш Республикин Строительство, архитектура тата пурăнмалли çурт-йĕрпе коммуналлă хуçалăх министерствинчен пĕлтернĕ тăрăх, республика Министрсен Кабинечĕн 2015 çулхи январĕн 28-мĕшĕнчи 7-мĕш номерлĕ йышăнăвĕпе килĕшÿллĕн Министрсен Кабинечĕн унчченхи хăш-пĕр йышăнăвĕсене улшăнусем кĕртнĕ. Ку улшăнусем Чăваш Республикин территорийĕнче сивĕ тата ăшă шывпа усă курассипе, таса мар шывсене юхтарса кăларассипе, электроэнергипе тивĕçтерессипе, пурăнмалли çурт-йĕре хутса ăшăтассипе коммуналлă услугăсем илсе тăрассин нормативĕсене çĕнĕрен палăртнипе çыхăннă.
Çак улшăнусем коммуналлă услугăсем илсе тăнине шута илмелли çуртăн пĕрлехи е хваттерсенче харпăр хăйĕн счетчикĕсене вырнаçтарман граждансене пырса тивеççĕ. Çак категорие кĕрекен граждансен малашне коммуналлă услугăсемшĕн çĕнĕ нормативсемпе тÿлемелле пулать. Нормативсем вара ÿсеççĕ, вĕсене малашне те тапхăр-тапхăр ÿстерсе пыма палăртнă. Тарифсем пирки калас пулсан, кунта улшăну çук, вĕсем унчченхи шайрах.
Çавна та каласа хăварасшăн. Коммуналлă услугăсемшĕн тÿлессипе пысăклатнă çĕнĕ нормативсемпе усă курнă чухне нумай хваттерлĕ çуртра е пурăнмалли ытти çурт-йĕрте коммуналлă услугăсемпе усă курнине шута илмелли кун пек счетчиксене вырнаçтарма техника майĕсем пуррипе çуккине те шута илме тивĕç. Урăхла каласан, шута илмелли прибора вырнаçтарма май çук пулсан, коммуналлă услугăсемшĕн тÿлеме пысăклатнă нормативсемпе усă курмĕç.
Пĕтĕмĕшле калас пулсан, пур йышши коммуналлă услугăн нормативĕсен коэффициенчĕсене те ÿстерсе пыма палăртнă. 2015 çулхи январĕн 1-мĕшĕнчен тытăнса 2015 çулхи июнĕн 30-мĕшĕччен тÿлев нормативĕн ÿсĕм коэффициенчĕ 1,1, 2015 çулхи июлĕн 1-мĕшĕнчен тытăнса 2015 çулхи декабрĕн 31-мĕшĕччен - 1,2, 2016 çулхи январĕн 1-мĕшĕнчен тытăнса 2016 çулхи июнĕн 30-мĕшĕччен - 1,4, 2016 çулхи июлĕн 1-мĕшĕнчен тытăнса 2016 çулхи декабрĕн 31-мĕшĕччен - 1,5, 2017 çултан тытăнса 1,6 пулĕ.
Норматив коэффициенчĕсене ÿстерекен коммуналлă услугăсене уйрăммăн палăртас пулсан, çаксене асăнса хăвармалла. Кусем вĕсем харпăр хăй пурăнакан çурт-йĕрте сивĕ тата вĕри шывпа усă курни, пĕтĕмĕшле çурт-йĕр валли сивĕ (вĕри) шывпа усă курни, çĕр участокĕ çинче ÿстерекен культурăсене шăварма сивĕ шывпа усă курни, килти хуçалăхра тытса усракан выльăх-чĕрлĕх валли апат хатĕрлеме сивĕ шывпа усă курни, харпăр хăй пурăнакан çурт-йĕрте электроэнергипе усă курни, пĕтĕмĕшле çурт-йĕр валли электроэнергипе усă курни, килти хуçалăхри выльăх-чĕрлĕхе тытса усрас, вĕсем валли апат хатĕрлес тата шыв ăшăтас тĕллевпе электроэнергипе усă курни, пурăнакан çурт-йĕре хутса ăшăтни.
Тата çавна асăнмалла. Услугăсемшĕн Перекет банкĕнче те, Раççей почтинче те, Интернет урлă "БанкОнлайнпа" усă курса та тÿлеме пулать. Анчах та укçа-тенкĕпе çыхăннă çак ĕçе пурнăçласси тÿлевлĕ. Çавăншăн сирĕнтен укçа тÿлевĕн суммине кура Перекет банкĕнче 2 процент, Раççей почтинче 1,5 процент хушма тÿлев-пошлина илсе юлĕç. Укçана "БанкОнлайн" урлă куçарсан пошлина 1 процентпа, "Симметрия" терминалта тÿлесен 0,5 процентпа танлашĕ.
Юлашкинчен çавна кăна каласа хăварасшăн. Çĕнĕлĕхсем Чăваш Республикин Министрсен Кабинечĕ йышăну тунăранпа 10 кун иртсен вăя кĕреççĕ. Хваттерсенче пурăнакансене вара çавна сĕннĕ пулăттăм. Перекетлĕрех пулас, коммуналлă услугăсемшĕн тÿлеме каякан расхутсене чакарас тетĕр пулсан, услугăсене шута илмелли харпăр хăйĕн счетчикĕсене вырнаçтарнине нимĕн те çитмест.
В. ШАПОШНИКОВ калаçнă.