07 февраля 2015 г.
Совет çарĕсене Афганистанран кăларнине асăнса, интернационалист-салтаксене халалласа Муркаш район администрацийĕн пуçлăхĕн кубокне çĕнсе илессишĕн йĕркеленĕ республика шайĕнчи бокс турнирĕ 2013 çулта пĕрремĕш хут иртнĕччĕ. Ун чух Муркашри "Сывлăх" ФСК рингĕ çинче Чулхуларан, Лысково, Кстово, Саранск, Йошкар-Ола, Санкт-Петербург хулисенчен пухăннă боксерсем, Шупашкар, Çĕнĕ Шупашкар, Çĕмĕрле, Канаш, Çĕрпÿ хулисенчи, Красноармейски, Элĕк, Шупашкар тата Муркаш районĕсенчи спортсменсем хаваспах ăмăртăва хутшăнчĕç. Пурĕ пĕрле - 170-е яхăн çамрăк.
Пĕлтĕрхи турнир та йышлăн иртрĕ: ринг çинче 146 боксер вăй виçрĕ. Муркаша Чăваш Енри, Чулхула облаçĕнчи тата Мари Эл Республикинчи чи хастар çамрăк спортсменсем килсе çитнĕччĕ.
Икĕ çул район администрацийĕн пуçлăхĕн кубокне Муркаш район команди çĕнсе илчĕ. Çак кубока вĕсем кăçалхи турнирта та алăран вĕçертмессе шанатпăр. Хăйсен ăсталăхне боксерсем черетлĕ виççĕмĕш турнирта кăтартса парĕç. Унта, малтанласа пĕлтернĕ тăрăх, боксерсем пĕлтĕрхинчен кая мар килмелле. Муркашсем вĕсене йышăнма хатĕр. Кун пирки йĕркелÿ комитечĕн ларăвĕнче пĕлтерчĕç.
Бокс турнирне çитес кĕçнерни кун, февралĕн 12-мĕшĕнче, 15.00 сехетре савăнăçлă лару-тăрура уçма палăртнă. Кĕрешÿсем февралĕн 12-14-мĕшĕсенче иртеççĕ. Çитсе курăр. Турнир вырăнĕ паллă - ачасемпе çамрăксен районти спорт шкулĕ - "Сывлăх" ФСК.