16 февраля 2013 г.
Район кунĕ ячĕпе
Çак кунсенче районăмăр 69 çул тултарчĕ. Район кунне халалланă савăнăçлă пуху ĕнер Шупашкарта К. Иванов ячĕллĕ Чăваш патшалăх академи драма театрĕнче иртрĕ. Уяв мероприятине хăйсен хастар ĕçĕпе палăрнисем, ĕç ветеранĕсем, Муркашсен ентешлĕхĕн членĕсем, хăнасем чылай пухăнчĕç. Савăнăçлă пухура иртнĕ çулхи ĕç итогĕсене пĕтĕмлетрĕç, малашлăх тĕллевĕсене палăртрĕç, тăрăшуллă ĕçре мала тухса палăрнисене чысларĕç, пултарулăх ушкăнĕсем юрă-кĕвĕпе савăнтарчĕç.
Савăнăçлă уява Муркашсем мĕнле уявлани пирки тĕплĕнрех – хаçатăн çитес номерĕнче.
Вăхăт – апрелĕн 1-мĕшĕччен
Çак тапхăр хушшинче районта пушар хуралĕн пĕрлехи тытăмне туса хумалла. Çакăн пек задача лартнă район администрацийĕн пуçлăхĕ Ростислав Тимофеев тунти кун район администрацийĕн ответлă ĕçченĕсемпе ирттернĕ черетлĕ планеркăра ятарлă программăсен иртнĕ çулхи ĕçне пĕтĕмлетнĕ май. Сăлтавсăр темелле мар. Пушар хăрушсăрлăхне тивĕçтересси хальхи вăхăтра районта пысăк пĕлтерĕшлĕ ыйтусенчен пĕри пулса тăрать. Иртнĕ çул район территорийĕнче 42 пушар пулнă. Ку вăл 2011 çулхинчен 3 пушар нумайрах. Çулăмра 5 çыннăн, вăл шутра 1 ачан пурнăçĕ татăлнă. Инкек тухас пулсан пулăшу кирек хăш яла та вăхăтра çитме пултартăр тесен пушар хуралĕн районти пĕрлехи системи кирлех.
«Йĕркелĕх хамăртан килет»
Çапла пĕтĕмлетнĕ районта пулнă май Чăваш Республикин патшалăх ветеринари службин ертÿçин тивĕçĕсене пурнăçлаканĕ Сергей Скворцов. Районти выльăх чирĕсемпе кĕрешекен станци пуçлăхĕпе Николай Яковлевпа вăл «Оринино» ял хуçалăх производство кооперативĕн Патаккассинчи сĕт фермине, «Моргаушский» сĕт заводне çитсе курнă, районти выльăх чирĕсемпе кĕрешекен станцире вăй хуракансен производство канашлăвĕн ĕçне хутшăннă. Н. Яковлев районта выльăх чирĕсемпе кĕрешесси епле шайра пулнипе паллаштарнă, иртнĕ çулхи ĕç итогĕсем тата умри задачăсем çинче чарăнса тăнă.
«Выльăх-чĕрлĕх отраслĕнчи ăнăçу кашнин дисциплининчен, професси ăсталăхĕн шайĕнчен, ответлăха туйса килĕштерсе ĕçленинчен те чылай килет», – палăртнă Сергей Иванович умри задачăсене уçăмлатнă май.
Черетре – 15 ветеран
Чăваш Республикинче Аслă Отечественнăй вăрçă ветеранĕсене социаллă пулăшу мелĕ шучĕпе пурăнмалли çурт-йĕр тума е туянма укçа-тенкĕ уйăрса параççĕ. Пĕр хут паракан çак укçа сумми 2013 çулхи пĕрремĕш кварталта 1022,4 пин тенкĕпе танлашать (28,4 пин тен. х 36 тăв. м. ç 1022,4 пин тен.)
Çак вăхăта хăйсен пурăнмалли çурт-йĕр условийĕсене лайăхлатмалли вăрçă ветеранĕсен, вăрçăра вилнĕ çар çыннисемпе инваличĕсен çемье членĕсен списокĕнче учетра 15 çын. Районĕпе 2005 çулхи мартăн 1-мĕшĕ хыççăн черете тăнисенчен 228 ветеран вара хăйсен пурăнмалли çурт-йĕр условийĕсене лайăхлатнă ĕнтĕ.
В. ШАПОШНИКОВ
хатĕрленĕ.