17 января 2015 г.
Çĕнĕ çул пуçланни унччен пуçăннă ĕçсем пирки манмаллине пĕлтермест. Çакă Чăваш Республикин Пуçлăхĕн Указĕсене пурнăçлассипе те çыхăннă. Çапла вара ялта пурăнакансене пирвайхи медицина пулăшăвĕ парасси çинчен калакан Указа пурнăçласси те кăçал малалла пурнăçа кĕрсе пырĕ. Унпа килĕшÿллĕн республикăра 2013 - 2015 çулсенче модульлĕ 100 фельдшерпа акушер пункчĕ уçма палăртнă.
Чăваш Республикинче иртнĕ икĕ çул хушшинче модульлĕ фельдшерпа акушер пункчĕсене 60 уçнă. Вăл хисепрен 40-шне - 2014 çулта. Вĕсенчен тăхăр модульлĕ фельдшерпа акушер пунктне уçма федераци укçи-тенкипе (12,4 миллион тенкĕ) усă курнă.
РФ Ял хуçалăх министерствин отчечĕпе 2014 çулхи январь - ноябрь уйăхĕсенче Чăваш Республики яллă вырăнсенче модульлĕ фельдшерпа акушер пункчĕсем тата пĕтĕмĕшле практика врачĕн офисĕсене уçассипе Раççейри чи лайăх 8 регион шутне кĕнĕ.
Палăртмалла, Раççей Федерацийĕн Сывлăха сыхлас министерствипе Раççей Федерацийĕн Ял хуçалăх министерстви çĕр-шывра яллă вырăнсене тăнăç аталантарассипе патшалăх политикине пĕрле пурнăçа кĕртме Килĕшÿ тунă. Унта ял çыннисен пурнăç тата ĕç условийĕсене лайăхлатассине пăхса хăварнă. Асăннă документра яллă вырăнсенче модульлĕ фельдшерпа акушер пункчĕсем тата пĕтĕмĕшле практика врачĕн офисĕсене уçассипе тата вĕсене çĕнĕ йышши медицина хатĕрĕсемпе тивĕçтерессипе пĕрле ĕçлеме пăхнă.
Хамăр инф.
Редакцирен: 2014 çулта пирĕн районти Шомик тата Мăн Шаптак ялĕсенче модульлĕ фельдшерпа акушер пункчĕсем çĕнĕрен уçăлса халăха йышăнма пуçлани - çÿлерех каланине çирĕплетекен лайăх тĕслĕх.