22 ноября 2014 г.
Пĕрлехи информаци куннĕнче пирĕн района килсе çитнĕ ĕç ушкăнне ЧР юстици министрĕн çумĕ Ирина Семенова ертсе пычĕ. Ушкăнри ответлă çынсем район администрацийĕн пуçлăхĕпе Ростислав Тимофеевпа тĕл пулса районти лару-тăрупа пур енлĕн паллашнă хыççăн тĕрлĕ ял тăрăхне çула тухрĕç.
И. Семеновăпа Р. Тимофеев малтанах пирĕн районти МФЦ ĕçĕ-хĕлĕпе интересленчĕç. Кунта патшалăх тата муниципалитет услугисене илес текенсем "чÿречесем" умĕнче те пурччĕ, черетре те тăват-пилĕк çын курăнчĕ.
Хальхи вăхăтра икĕ чÿрече мелĕпе ĕçлесе кунта муниципалитетăн 44 услугипе тивĕçтереççĕ. МФЦ ертÿçи Т. Королькова каланă тăрăх ку таранччен панă услугăсенчен ытларахăшĕ Росреестр услугисем - 60 процента яхăн. Çулталăк вĕçлениччен ку кăтарту 70 процента çитмелле, çитес çул вара - 80 процента.
Малаллахи плансенче пилĕк "чÿречене" çитересси тата электрон черет йĕркелесси.
Ял тăрăхĕсенчи пурĕ 15 библиотекăра та халĕ муниципалитет услугисемпе тивĕçтерессине йĕркеленĕ, анчах хальлĕхе курьер ĕç-хĕлне йĕркелемен. Çавăнпа та документсене вăхăтра çитерессипе ыйтусем тухма пултараççĕ.
Библиотекăсем халăха услугăсемпе тивĕçтерессипе Р. Тимофеевпа И. Семенова Ярославка ял тăрăхĕнчи тĕслĕх библиотекăра тĕплĕн паллашрĕç. Ярославка ял тăрăхĕнчи 77 çын кăна пĕрлехи порталта регистрациленнĕ, районта - 4473 çын. Çавăнпа Ростислав Николаевич электрон мелпе тĕрлĕ услугăна килтен тухмасăрах илме, çапла майпа вăхăта перекетлеме май пуррине çынсене лайăхрах ăнлантарма сĕнчĕ.
Ку ял тăрăхĕнче нумай хваттерлĕ çуртсене тата ытти хăш-пĕр объекта уйрăммăн хутса ăшăтмалла тăвассипе ыйту çивĕч тăрать. Ял тăрăхĕн пуçлăхĕ Г. Кожевников каланă тăрăх 8 хваттерлĕ çуртра пурăнакансем çак ĕçе пурнăçлама пултараççĕ, анчах та 50 хваттерлĕ çуртра пурăнакансемпе ку ĕçе пурнăçлама питĕ йывăр пуласси куç кĕрет.
Р. Тимофеевпа И. Семенова Нискасси шкулне çитсе унти учительсемпе тата аслă классенче вĕренекенсемпе тĕл пулса çак кун çынсем патне çитермелли информаципе паллаштарчĕç. Ачасем пулнăран, вĕсен прависем çинчен, тÿлевсĕр юридици пулăшăвĕ çинчен уйрăмах тĕплĕ ăнлантарчĕç. Хыççăн учительсен тата ачасен ыйтăвĕсене хуравларĕç.
Ачасем пĕрлехи патшалăх экзаменĕсенчи çĕнĕлĕхсемпе интересленчĕç. Кĕскен панă хуравра 11-мĕшсене кăçалхи вĕренÿ çулĕнче акă мĕн кĕтнине палăртрĕç: пĕрремĕшĕ - пĕрлехи патшалăх экзаменне (ППЭ) тытас тесен кăçалхи выпускниксен унччен сочинени (изложени) çырмалла, вăл экзамен тытма ирĕк паракан документ пулать* иккĕмĕшĕ - ППЭ тытасси пирки калакан заявленисене малтанхи пек мартăн 1-мĕшĕччен мар, февралĕн 1-мĕшĕччен çырса памалла* математикăпа иртекен ППЭ икĕ шайра пулать - база шайĕнче тата профиль шайĕнче, база шайĕнчи ĕçсене пилĕк баллă системăпа хаклаççĕ, профиль шайĕнчисене - 100 баллă системăпа (минимум - 27 балл).
Учительсем ачасем урокра тĕрлĕ гаджетпа усă курма пултарнипе интересленчĕç. Килте хатĕрленсе килмелле пулнă ыйтăва хуравланă чух е тата пĕр-пĕр темăпа пĕлĕве пĕтĕмлетсе тĕрĕсленĕ чух ачан вĕсемпе усă курмалла мар паллах, мĕншĕн тесен учитель унăн хатĕрленĕвне тата пĕлĕвне тĕрĕслет, хаклать. Урокра çĕнĕ тема вĕреннĕ чух вара учительпе килĕшсе татăлмалла. Пĕтĕмĕшле илсен уроксенче гаджетсемпе усă курассине вырăнти актпа палăртса çирĕплетмелле.
Учитель асăрхаттарăвне шута хумасăрах ача урокра телефонпа выляса ларать. Ку лару-тăрура мĕнле пулмалла?
- Учитель паллах ачан пурлăхне ирĕксĕр туртса илеймест, анчах та ача асăрхаттарăва шута илмест пулсан учителĕн çак лару-тăрăва уçăмлатма шкул администрацийĕнчен пулăшу ыйтма ирĕк пур, шкул администрацийĕн вара - ачан ашшĕ-амăшĕ патне çак хыпара çитерме.
Чăнах та, ачасен халĕ анлă тавра курăмлă ÿсме майсем чылай. Анчах вĕсен те хăйсен прависене пĕлнипе пĕрлех ыттисен прависене те шута хумалла, - хурав панă май çапла пĕтĕмлетÿ турĕ Ирина Анатольевна.
Н. Николаева.