22 ноября 2014 г.
Федерацин "Мускаври машинăсем тăвассин патшалăх университечĕ" патшалăх аслă професси бюджет вĕренÿ учрежденийĕн Шупашкарти политехника институчĕн (филиалĕн) директорĕн наука ĕçĕсем енĕпе ĕçлекен çумĕ Василий Чегулов тата район администрацийĕн информаципе тивĕçтерекен пай пуçлăхĕ Валерий Лаврентьев информаци кунĕнче Чуманкасси ял тăрăхĕнче пулчĕç.
Информаци ушкăнĕ малтанах вырăнти активпа, Чуманкассинчи пĕтĕмĕшле пĕлÿ паракан вăтам шкулăн вĕрентекенĕсемпе тата 9 - 11-мĕш классенче вĕренекенсемпе шкулăн актовăй залĕнче тĕл пулу йĕркелерĕ. Унта çавăн пекех Чуманкасси ял тăрăхĕн пуçлăхĕ Николай Белов, шкул директорĕ Валерий Васильев хутшăнчĕç.
Пĕрлехи информаци кунĕнчи ыйтусене сÿтсе явнă çĕре аслă классенче вĕренекенсене те хутшăнтарма май туса пани ăнсăртран мар. Мĕншĕн тесен ыйтусем ачасен интересĕсемпе çыхăннисем, вĕсене тÿрремĕнех пырса тивекеннисем те çук мар. Акă вĕренÿ учрежденийĕсенче тата çемьесемпе ачасене социаллă пулăшу паракан учрежденисенче Пĕтĕм Раççейри "Ачасене право пулăшăвĕ памалли куна" ирттерессине е тата ачасен прависемпе интересĕсене хÿтĕлессин системине туса хурассинех илер. Граждансене тÿлевсĕр юридици пулăшăвĕ парассипе те шкулта вĕренекенсен пĕлмелли çук мар. Çитменнине республика хăни Василий Владимирович политехника институчĕн директорĕн çумĕ пулнă май, паллă ĕнтĕ, вĕренекенсен ун патне те ыйтусем пулчĕç, вĕсем çине тулли хуравсем илме пултарчĕç.
Василий Чегулов хăйĕн сăмахĕнче информаци кунĕн кун йĕркине кĕртнĕ ыйтусенчен пĕрне - граждансен уйрăм категорийĕсене тÿлевсĕр юридици пулăшăвĕпе тивĕçтерессине - анлăрах çутатма тăрăшрĕ. Районта юридици пулăшăвĕн услугипе тивĕçтерекен организацисем виççĕ. Вĕсем куллен ку е вăл ыйтупа граждансене йышăнаççĕ. Анчах та çак пулăшу хăйĕншĕн тÿлевсĕр пулмалли пирки хăшĕ-пĕри пĕлмест те. Тĕрĕссипе халĕ тÿлевсĕр никамах та ĕçлемест. Социаллă хÿтлĕхсĕррисене юридици пулăшăвĕпе тÿлевсĕр тивĕçтернĕшĕн вара юристсене федераци бюджетĕнчен саплаштараççĕ. Граждансен асăннă категорине кĕрекен ушкăнĕсем çинче тĕплĕ чарăнчĕ Василий Владимирович.
Шкулта вĕренекенсен ыйтăвĕсене хуравланă май институт директорĕн çумĕ çавна палăртрĕ. Хальхи вăхăтра аслă пĕлÿ илнипе пĕрлех рабочи спциальноçĕсем çине ытларах тимлĕх уйăраççĕ. Политехника институтĕнче çавна тĕпе хурса ĕçлеççĕ те. Кунтан вĕренсе тухакансем Мускаври машинăсем тăвассин патшалăх университечĕн дипломĕпе пĕрлех рабочи специальноçне те алла илеççĕ. Студентсем уйăхра виçĕ эрне вĕренеççĕ, тепĕр эрне вара производствăра практикăра пулаççĕ. Çитменнине специалистсене анлă профильпе хатĕрлессине пысăк вырăна хураççĕ. Çавăнпах ĕнтĕ тăваттăмĕш курсра вĕренекенсенчен чылайăшĕ производствăра та вăй хурать, ĕç укçи илет. Вĕсем валли кăнтăрлахи уйрăмра вĕренме ятарлă условисем туса панă. Çавăнпа та кунтан вĕренсе тухакансем 100 проценчĕпех ĕçе вырнаçаççĕ. Выпускниксем ĕçе вырнаçнине тĕрĕслесе тăма тата ку енĕпе пулăшма институтра ятарлă служба йĕркеленĕ.
Халĕ эпир çĕнĕ технологисен тапхăрĕнче пурăнатпăр. Пурнăçран юлас мар тесен çак çĕнĕлĕхсене вăхăтра алла илни кирлĕ. Çак чăнлăха тĕслĕхсемпе çирĕплетсе пачĕ район администрацийĕн представителĕ Валерий Лаврентьев.
Акă Муркашра патшалăх тата муниципалитет услугисемпе тивĕçтерекен нумай функциллĕ центра, районти 15 библиотекăри "пĕр чÿрече" мелĕпе ĕçлекен унăн филиалĕсене ыт ахальтен йĕркелемен. Çакă вăл пĕтĕмпех ял çыннине тĕрлĕ услуга илме меллĕрех майсем туса парассипе, унăн вăхăтне перекетлессипе çыхăннă. Пĕр-пĕр справка е документ илессишĕн район центрне тĕрлĕ организацие çÿресси хальхи вăхăтра пулмалла мар. Çакна хамăрăн та пĕлмелле, ыттисене те ăнлантарса парас пулать. Паянхи куна илес пулсан Муркашри МФЦ-ра 44 услугăпа тивĕçтереççĕ, çывăх вăхăтрах вĕсен шучĕ 54-на çитмелле.
Услугăсене электрон мелĕпе илме патшалăх тата муниципалитет услугисен пĕрлехи порталĕнче регистрациленесси пирки те сăмах пуçарчĕ Валерий Григорьевич. Халĕ порталта регистрациленме, харпăр хăйĕн кабинетне йĕркелеме вăхăт та нумай каймасть. Пĕрле паспорт илсе нумай функциллĕ центра пымалла кăна. Шкул ачисемшĕн те çакă пĕлтерĕшлĕ пулса тăрать. Мĕншĕн тесен вĕсене тивĕçтерекен услугăсем те унта сахал мар. Кун пек услугăсен шучĕ малашне ÿссе пырĕ кăна.
Ял çыннисене пăшăрхантаракан тепĕр ыйту çинче те чарăнса тăмаллах. Сăмах кунта Перекет банкĕн вырăнти уйрăмне хупасси пирки пырать. Ку сăмах чăнлăхпа çыхăннă е çук, анчах та çынсем банкăн вырăнти уйрăмĕн услугисемпе активлă усă кураççĕ, çавăнпа та епле пулсан та банк уйрăмне сыхласа хăварасшăн. Çитменнине вăл эрнере икĕ кун кăна - тунти кунпа юн кун ĕçлет, унта вара çывăхри ялсенчен çÿрекенсем сахал мар. Перекет банкĕн вырăнти уйрăмĕнче те пулчĕ информаци ушкăнĕ.
Информаци кунĕнчи тĕл пулу ĕçлĕ лару-тăрура иртнине палăртмалла. Унта сÿтсе явнă ыйтусем ытларахăшĕшĕн усăллă пуласса шанас килет.
В. ШАПОШНИКОВ.