01 ноября 2014 г.
Кĕр пуçламăшĕнче çĕр-шывăн тĕрлĕ регионĕнче, çав шутра Чăваш Енре те, çынсем психоактивлă хутăшпа наркăмăшланни пирки нумай пĕлтерÿ пулчĕ. Çавна май ЧР Пуçлăхĕ Михаил Игнатьев Чăваш Республикин наркотиксемпе кĕрешекен комиссийĕн черетсĕр ларăвне ирттерсе унта çак ыйтăва туллин тишкерме сĕнчĕ.
Лару юпа уйăхĕн 29-мĕшĕнче иртрĕ. Ĕçлĕ сăмах пуçламăшĕнче Федерацин наркотиксен çаврăнăшне тĕрĕслесе тăракан службин Чăваш Енри управленийĕн пуçлăхĕ Е. Барсуков пĕтĕмĕшле лару-тăрупа паллаштарчĕ. Авăн уйăхĕн 26-мĕшĕнчен тытăнса юпа уйăхĕн 5-мĕшĕччен çĕнĕ йышши психоактивлă хутăшпа усă курнă хыççăн хăйсене япăх туйнипе çынсем медучрежденисене пулăшу ыйтса нумай пынă. Хăйсем пынă е васкавлă медпулăшупа илсе çитернĕ 113 çынран 48-шне госпитализациленĕ (вăл шутран 15-шĕ çул çитмен çамрăксем). "Инкеке" лекнисене хуласемпе районсем тăрăх пайласан пулăшу кирлисен 75 проценчĕ - Шупашкарта, 17 проценчĕ Çĕнĕ Шупашкарта пурăнни палăрнă.
Сывлăх сыхлавĕпе социаллă аталану министрĕ - Алла Самойлова сăмахĕнчен тĕрлĕ служба пĕр çыхăра тата пĕр тĕллевпе ĕçлени лару-тăрăва йĕркене кĕртме май панă. Çĕнĕ йышши наркотиксемпе наркăмăшланнă 186 çынран çурри - ниçта та ĕçлемен, вĕренмен çамрăксем. Вĕсенчен 6-шне кăна ку таранччен наркологсем сăнаса тăнă. ЧР шалти ĕçсен министрĕ Сергей Семенов пĕлтернинчен пакунлисем лару-тăрăва талăкĕпех мониторинг туни куç умне тухнă. Асăннă тапхăрта Шупашкарта кăна вĕсем синтетикăлла наркотикăн вăрттăн вырăнĕсене 25 тупнă.
ЧР вĕренÿ тата çамрăксен политикин министрĕ В. Иванов, Шупашкар хулин Пуçлăхĕ Л. Черкесов тата Çĕнĕ Шупашкар хула администрацийĕн пуçлăхĕ О. Бирюков вĕренÿ учрежденийĕсемпе шкулсенче ирттернĕ профилактика ĕçĕсем пирки каласа панă.