18 октября 2014 г.
Республикăри ытти районсенчи пекех, пирĕн районта та октябрĕн 15-мĕшĕнче Пĕрлехи информаци кунне ирттерчĕç. Унăн темисем: Чăваш Республикин 2015 çулхи тата планланă 2016 çулпа 2017 çулхи бюжет политикин тĕп енĕсем çинчен* ялсене, çул хĕррисене, масарсене тата ял тăрăхĕсен территорийĕсенчи çулсене тасатса тирпейлесе тăрасси çинчен* Чăваш Республикин çулĕсем çинче 2014 çулхи 9 уйăхра аварисем пулни* 2014 - 2015 çулсенчи кĕркуннехи-хĕллехи тапхăрта Чăваш Республикин территорийĕнче пушар хăрушсăрлăхне тивĕçтересси* район территорийĕнче преступленисем тăвассине тата правăна пăсассине асăрхаттарасси. Паллă ĕнтĕ, Шупашкарта иртнĕ Пĕтĕм тĕнчери "Раççей - спорт çĕр-шывĕ" форум пирки те сăмах тапратмасăр пултараймарĕç.
Района Шупашкартан Чăваш Республикин юстици министрĕн пĕрремĕш çумĕ Ирина Семенова ертсе пыракан ушкăн килчĕ. Ушкăн членĕсем ял тăрăхĕсене çитсе ял çыннисемпе тĕл пулусем йĕркелерĕç, вĕсене интереслентерекен ыйтусене хуравларĕç.
Пĕрлехи информаци кунне хутшăннă пĕрремĕш ушкăн - ЧР юстици министрĕн çумĕ И. Семенова, ЧР Патшалăх Канашĕн депутачĕ, "Чувашиякурорт" санатори" пĕрлешĕвĕн генеральнăй директорĕ Н. Ванеркин тата район администрацийĕн пуçлăхĕ Р. Тимофеев - малтанах Москакасси ял тăрăхне çитсе вăтам шкулти вĕрентекенсемпе тĕл пулчĕ, хыççăн "Газпром газораспределение Чебоксары" пĕрлешĕвĕн Муркашри филиалĕн ĕçченĕсемпе курса калаçрĕ. Тĕл пулусене Москакасси ял тăрăхĕн пуçлăхĕ А. Матросов активлă хутшăнчĕ.
Малтанах палăртса хăвармалла, Москакассинчи вăтам шкулта калаçу питĕ уçă та чĕрĕ иртрĕ. Çавна май кунти учительсен анлă тавра курăмĕ те куç умне тухрĕ. Вĕсене информаци кунĕнче çынсене пĕлтерме палăртнă хыпарсемпе малтанах И. Семенова сăмах илчĕ, Р. Тимофеев районти лару-тăрупа паллаштарчĕ.
Кун хыççăн вĕрентекенсенчен ыйту чылай пулчĕ. Вăл шутра хăйсен профессийĕпе çыхăннисем те, çыхăнманнисем те сахал мар пулчĕç. Коллектив ял хуçалăхĕпе тата ытти сферăри лару-тăрупа интереслентерни савăнтарчĕ. Ку вара учителĕн сумне хăпартать.
Нумай ачаллă çемьесенчи ачасене шкулта вĕри апатпа тивĕçтерсси пирки ыйту пулчĕ. "Пĕр ачана е тăватă ачана апатлантарассинче уйрăмлăх пысăк-çке", - теççĕ учительсем. Хальхи вăхăтра районти шкулсенче апатланăвăн (кунта иккĕмĕш ирхи апат та кĕрет) вăтам хакĕ 29 тенкĕпе танлашать, çапах хурав район шайĕнче нумай ачаллă çемьесенчи ачасен апатланăвне тÿлевсĕр майпа йĕркелеме район бюджечĕ "туртса кăларайманни" патне çитсе тухрĕ. Шкулти апатланăва йÿнетме вара шкулсем апат-çимĕç туса илессипе тимлеççĕ. Сăмах май Москакассинче ачасем шкулта 100 проценчĕпех апатланаççĕ.
Учительсем çитес çулхи бюджетра ял хуçалăхне аталантарма укçа-тенкĕ çителĕклĕ уйăрнипе те кăсăкланчĕç, Муркашри сĕт завочĕн пуласлăхĕ те, "Путь Ильича" агрофирма ĕçĕ-хĕлĕ те интереслентерчĕ вĕсене. Пур ыйту çине те район администрацийĕн пуçлăхĕ тулли хурав пачĕ. Районти пуçаруллă фермерсем кам пулнипе те интересленчĕç кунта. Ун пеккисем районта 10 çын ытла пулнине пĕлтерсе Р. Тимофеев вĕсен ĕçĕ-хĕлĕ пирки кĕскен каласа кăтартрĕ.
Тирпей-илем тата хăт кĕртесси пирки калаçнă чух учительсем Муркашри парка хăтлăрах, тирпейлĕрех тума сĕнчĕç: "Район центрĕнче пĕр илемлĕ те хăтлă парк пулмаллах ĕнтĕ, ăна йĕркене кĕртмелле", - терĕç вĕсем. Районта мемориал çăви йĕркелесен те ытлашши пулмĕ текен шухăша палăртрĕç. Çак ыйтусемпе пĕрлех район центрĕнче йĕркеллĕ Культура керменĕ çукки патне те çитсе тухрĕ калаçу. Ăна тăвассипе тĕрлĕ вариант пуррине палăртрĕ Ростислав Николаевич. Çăвасене тирпейлесе пăхса тăрассине вара ял тăрăхĕн пуçлăхĕ йĕркелÿ ыйтăвĕсене мĕнле шайра татса пама пултарнипе çыхăннине палăртрĕ.
"Раççей - спорт çĕр-шывĕ" форум пирки асăннă чухне Москакассинчи вăтам шкулта спортзал тĕплĕ юсав ыйтнине пĕлтерчĕç. Кăçал акă Ярапайкассинчи шкулта спортзал çĕнĕ тум тăхăнчĕ, çитес вăхăтра Çатракасси шкулĕнчи спортзала та юсаса çĕнетме май пур. Пур объекта та пĕр вăхăтрах юсама çук паллах, анчах та Николай Ванеркин ку ыйтăва татса парассинчи пĕрремĕш утăмсене тума пулăшассине пĕлтерчĕ, ĕçлĕ сĕнÿ те пачĕ.
Москакасси ял тăрăхĕнчи конкретлă ыйтусем çине ял тăрăхĕн пуçлăхĕ Алексей Матросов хуравларĕ: вилнисемпе çăва çинче сыв пуллашмалли çурт туса лартасси, ялти урамсенче çул тăвасси пирки, тĕттĕм вăхăтра ялсене çутăпа тивĕçтересси тата çырмасене тирпейлесси пирки тулли хуравсем пулчĕç.
Муркашри "Елочка" ача садне туса пĕтерсе хута ярасси Москакассинчи учительсене кăна мар, "Газпром газораспределение Чебоксары" пĕрлешĕвĕн Муркашри филиалĕн ĕçченĕсене те кăсăклантарать-мĕн. Ку тĕлĕшпе ĕç-пуç подрядчикпа килĕшÿ туса алă пусмалли тапхăра çитнине пĕлтерчĕ Р. Тимофеев. Çак тапхăр йĕркеллĕ иртсен 3,5 миллона яхăн тенкĕлĕх юсав ĕçĕсем ирттермелли кăна юлать. Çапла май кăçал садик ыйтăвне "хупма" май пур.
Тĕл пулусенче кунсăр пуçне ытти ыйту та пулчĕ, акă инвалид çынсене санаторипе курорт сиплевĕпе тивĕçтересси пирки панă ыйту федераци шайĕнче татса памаллисенчен пĕри пулнăран, ыйтăва "Соцстрах" специалисчĕсене адреслеме шантарчĕç. Информаци кунĕнчи темăсемпе учительсем те, çут çанталăк газĕпе тивĕçтерекен служба ĕçченĕсем те кăмăлпах паллашрĕç.
Н. Николаева.