22 октября 2014 г.
Росреестрăн Чăваш Республикинчи управленийĕнче çĕр йĕркелĕвĕн ĕçĕсене туса ирттернĕ май илнĕ даннăйсен патшалăх фончĕ пур. Кăçал çулталăк пуçланнăранпа управленин патшалăх фончĕ çĕр йĕркелĕвĕн ĕçĕсемпе татах пуянланчĕ. Кусем вĕсем ялсем, ял тăрăхĕсем, санитарипе хÿтĕлев зонисем, шыв сыхлавĕн зонисемпе çыран хĕррисенчи хÿтĕлев тăрăхĕсем, çыхăну тата электропередача линийĕсен хÿтĕлев зонисем, культура несĕллĕхĕн объекчĕсем, çут çанталăкăн патшалăх заказникĕсем тата ытти çĕрсем ăçта вырнаçнине çырса кăтартнипе çыхăннă. Вĕсен чиккисене кадастр учетне илнĕ май ку объектсем юридици вăйĕнче шутланаççĕ. Тепĕр майлă каласан енчен те лаптăк мĕнле те пулин зонăна лекет пулсан, ун тĕлĕшпе чикĕлевсем пулаççĕ. Çакă вăл ку территорисемпе усă курассипе уйрăм условисем палăртнипе çыхăннă.
Республикипе илес пулсан управленин даннăйсен фондне 900 ытла даннăй кĕртнĕ. Чăваш Республикин çĕрĕсем çинче çĕр йĕркелĕвĕн ĕçĕсене ытларах туса ирттерекеннисен шутĕнче Канаш районĕнчи техника инвентаризацийĕн бюровĕ, "Земля" ООО, "Тавладстройинвест" ООО, "НПП "Меридиан" ООО, "НПП "Аршин" ООО. Управленин тĕп аппаратне кăна даннăйсен фондне асăннă организацисем 2014 çулхи январь - август уйăхĕсенче çĕр йĕркелĕвĕн 200 ытла ĕçне тăратнă.
Юлашки вăхăтра фонда Шупашкар, Муркаш, Етĕрне районĕсен тата Шупашкарпа Çĕнĕ Шупашкар территорийĕсенче вырнаçнă Шупашкар шыв хранилищин шыв сыхлавĕн тата çыран хĕррисенчи хÿтĕлев тăрăхĕсен чиккисене палăртассипе çĕр йĕркелĕвĕн ĕçĕсем килчĕç. Çавăн пекех фонда Çĕрпÿпе Канаш тата Вăрнар районĕсен территорийĕсемпе юхса выртакан Кĕçĕн Çавал, Йĕпреçпе Канаш районĕсен территорийĕсемпе юхса выртакан Урюм, Канашпа Вăрмар тата Тăвай районĕсен территорийĕсемпе юхса выртакан Аль, Йĕпреçпе Комсомольски районĕсен территорийĕсемпе юхса выртакан Хома юхан шывсен шыв сыхлавĕн тата çыран хĕррисенчи хÿтĕлев тăрăхĕсен чиккисене палăртассипе çĕр йĕркелĕвĕн ĕçĕсене тăратнă.
Граждансемшĕн тата организацисемшĕн Куславкка районĕн территорийĕнчи "Аттиковский остепененный склон", "Ковыльная степь", "Карамышевский", "Правобережье реки Илеть", "Шомиковская колония серых цапель" (Шупашкар районĕ), "Цивильский сурковый" (Çĕрпÿ районĕ), "Бурундукский" (Красноармейски районĕ) патшалăх çут çанталăк заказникĕсем вырнаçнин чиккисене кăтартакан карттăсем (плансем) интереслĕ пулĕ тесе шутлатпăр.
Управленин даннăйсен фондĕнче халĕ çут çанталăк палăкĕсем - Красноармейски районĕнчи "Кошкинское" тата "Кÿлхĕрри" кÿлĕсем пирки материалсем пур. Çĕр йĕркелĕвĕн ĕçĕсене çут çанталăкăн палăкĕсенчен Етĕрне районĕнчи Сосновское кÿлĕпе ун тавра вырнаçнă вăрман тăрăхĕ, Патăрьел районĕнчи "Каенсар" кÿлĕ, Куславкка районĕнчи "Чарду тайлăм", Элĕк районĕнчи "Илгышевский" кÿлĕ тĕлĕшпе те патшалăх фондне управа çитерсе панă.
Çĕр йĕркелĕвĕн çак ĕçĕсемпе тата управленин даннăйсен фондĕнчи ытти материалпа кирек кам та паллашма пултарать. Кирлех пулсан материалсен копийĕсене те илме май пур. Даннăйсен фончĕн материалĕсене илес тесен харпăр хăйĕн управленин тĕп аппаратне пырса заявлени çырмалла. Адресĕ: Шупашкар хули, К. Маркс урамĕ, 56-мĕш çурт. Заявленисене çавăн пекех управленин çĕр йĕркелĕвĕн объекчĕ вырнаçнă районти пайĕсене те пама пулать.
Росреестрăн Чăваш Республикинчи управленийĕн пресс-служби.