29 октября 2014 г.
Иртнĕ кунсенче Кÿкеç поселокĕнче вĕренÿ учрежденийĕсенче ГТО комплексне анлăрах çул парассипе республикăри фестиваль финалĕ иртрĕ. Ун умĕн кашни шкулпа районтах фестивалĕн муниципалитет тата зона тапхăрĕсем пулĕç. Вĕсене виçĕ пин ытла çамрăк спортсмен хутшăнчĕ. Шăпах вĕсен çĕнтерÿçисем финалти ăмăртусене хутшăнма тивĕç пулчĕç те.
Пирĕн район чысне хĕрÿ кĕрешÿсем витĕр ăнăçлă тухса республикăри фестиваль финалĕнче Муркашри вăтам шкул команди хÿтĕлерĕ. Ăмăртăва Шупашкарти, Çĕнĕ Шупашкарти, Канашпа Çĕрпÿ хулисенчи, Пăрачкав, Хĕрлĕ Чутайпа Патăрьел районĕсенчи вăйлă командăсем хутшăнчĕç. Ăмăртусен кашни тĕсĕнче хĕрÿ кĕрешÿ пулчĕ.
Каламалла, асăннă ăмăрту Чăваш Енре çеç мар, Раççей шайĕпе те пуçламăш утăм пулчĕ. Çавăнпа та унта хамăр район ятне хÿтĕлессине хăйне евĕр чыс тесе йышăнтăмăр. Ăмăртусем çÿллĕ шайра иртни патшалăх ГТО комплексĕ çине пысăк тимлĕх уйăрнине кăтартрĕ. Фестивальте пирĕн команда хăйне ырă енчен кăтартма пултарни мана савăнтарчĕ. Пирĕн ачасем хастар та тăрăшуллă пулни Муркашри вăтам шкул командине Çĕнĕ Шупашкарпа Çĕрпÿ хулисем хыççăн 3-мĕш вырăна кăларчĕ. Çĕнтерÿшĕн çаксем ăмăртрĕç: Д. Федоров, К. Никонова, А. Игнатьев, А. Федорова, Д. Рощупкин, Д. Иванов, Ж. Артемьева, К. Филиппова.
С. ПАЛАДЬЕВ,
физкультура учителĕ.