15 октября 2014 г.
Муркашра пурăнакан Галина Борисовăна чылайранпах пĕлетĕп. Вăл пур енлĕ маттур çын пулнине шута илсе унпа калаçма васкарăм.
- Кашни професси пархатарлă, çапах та пурнăçа вĕренÿ сферине халалларăм. Çакă пире вĕрентнĕ учитель пек пулма ĕмĕтленнипе çыхăннă пулĕ. Шкулта биологи, ботаника, хими урокĕсене Тамара Алексеевна Анисова вĕрентетчĕ. Ăна уйрăмах кăмăллаттăмччĕ, питĕ ун пек пулас килетчĕ, - калаçăва пуçларĕ Галина Захаровна.
1965 çулта шкултан вĕренсе тухнă хĕр аслă вожатăйра тимлеме пуçлать. Хăй пурнăçĕ вĕренÿ ĕçĕпе çыхăнассине аванах туять Галя, малашлăхне те шкулта курать, çавăнпа та тăтăшах шкул ĕçĕ-хĕлĕ пирки калаçать. Ашшĕ вара Захар Магаев районти тĕп больницăра тĕп бухгалтерта тимлекенскер, хăйĕн хĕрне чунтанах тухтăр тăвасшăн тăрăшать, Гальăна медицина енĕпе аслă пĕлÿ илме çине тăрса ÿкĕтлет. Анчах та çамрăкскерĕн ку еннелле чунĕ туртмасть. Мĕн ĕмĕтленнине яланах пуçра тытнипе тепĕр икĕ çултан Чăваш патшалăх педагогика институтне çул тытать. Биологипе хими учителĕ пулма хатĕрленет. Кунта вăл тăрăшулăхпа тата пуçарулăхпа ыттисенчен уйрăларах тăрать. Вĕрентекенсем те ăна ыттисем умне тĕслĕхе лартаççĕ.
Акă хыçра - студент пурнăçĕ, умра - ĕç ĕмĕрĕн пуçламăшĕ. Алла диплом илнĕ çамрăк специалиста Елчĕк районĕнчи Аслă Таяпа шкулĕнче ĕçлеме сĕнеççĕ. Каллех тăван килтен аякка каймалла. Ашшĕ-амăшĕ хĕрне çĕнĕ ĕçе пикенме пиллет.
- Ачасем ун чухне питĕ йышлăччĕ. Мана тÿрех 10-мĕш класс ертÿçи пулма шанчĕç. Учительсем каланă тăрăх унта ытла та хăюллă ачасем иккен. Шикленме те пĕлмерĕм пулас чи малтанах. Класа ертсе пыма йышăнса ĕçлесе пăхма шухăшларăм. Вăл вăхăтра ачасем учительсене урăхларах йышăнатчĕç, - аса илет Галина Захаровна иртнĕ çулсене.
Ачасемпе çамрăк учитель хушшинче часах ăнлану çуралать. Концерт программисем, литература каçĕсем йĕркелеççĕ, тĕрлĕ конкурспа мероприятие хутшăнаççĕ. Çак класс ачисемпе стена хаçачĕ кăларнипе район шайĕнче пĕрремĕш вырăн тивĕçнине те асрах тытать-ха хисеплĕ ветеран. Пултарулăхпа палăракан вĕрентекене район шайĕнче тата унти коллектив часах асăрхать. 1984 çулта унăн ĕçне Раççей шайĕнчи чыславпа - "Аслă учитель" ятпа - хаклаççĕ. Ĕçлемелле те ĕçлемелле ĕнтĕ пĕр хăнăхнă шкулта, анчах вăхăчĕ çапла килсе тухать. Шăпа çамрăк мăшăра тăван вырăна - Муркаш тăрăхне - илсе çитерет.
Ун чухне районти вĕренÿ ĕçне Виталий Толстов йĕркелесе пынă. Вăл нумай шухăшласа тăмасăр пысăк опыт пухма ĕлкĕрнĕ учителе вĕренÿ пайне ĕçлеме йышăннă. Галина Захаровна Оринин шкулĕнче хăй валли ĕç вырăнĕ тупнă та ĕнтĕ. Çапла вара пĕр харăсах икĕ ĕçре тимленĕ вăл. Каярах та хăйне тĕрлĕ енпе тĕрĕсленĕ.
- Пушă вăхăчĕ пачах та пулман тесен йăнăшмастăп пулĕ. Тăтăшах шкулсене тĕрĕслевпе тухса çÿренĕ, урок итлеме кайнă, - калаçăва тăсать вăл.
Пархатарлă ĕçне кура хисепĕ те чыслă: ăна Раççей Федераци шайĕнчи наградăсемпе те палăртнă.
Ал ĕçĕ енĕпе те питĕ ăста Галина Захаровна. Кружок ертсе пынă май хĕр ачасене крючокпа тĕрлĕ эреш çыхма вĕрентнĕ, аслă çулхисем те çак ĕçпе кăсăкланнă. Ал ĕçĕпе аппаланнисĕр тата хушма хуçалăхра вăй хунисĕр пуçне вăл ветерансен хорне çÿрет. Унăн çепĕç сассине итлеме питĕ кăмăллă. Çакăн пек пултаруллă çын вăл Галина Захаровна.
Р. Илларионова.