15 октября 2014 г.
Платон Павлович Давыдов (10.03.1947 - 17.09.2012 ç.ç.) - Муркаш районĕн Хисеплĕ гражданинĕ, "Ударник" хуçалăхăн ертÿçи, Чăваш Республикин ял хуçалăхĕн тава тивĕçлĕ ĕçченĕ, РФ ял хуçалăхĕн тава тивĕçлĕ ĕçченĕ. Йÿçкасси ял тăрăхĕнчи Анатри Панклире çуралса ÿснĕ. Чул хулари ял хуçалăх институтĕнче вĕреннĕ. Ĕç биографине 1965 çулта колхозникран пуçланă. Ял хуçалăх производствинчи активлă ĕç тапхăрĕ унăн "Ударникпа" çыхăннă, анчах та ытти должноçра ĕçленĕ чухне те вăл лайăх йĕркелÿçĕ пулнипе палăрса тăнă.
"Ударник" хуçалăха Платон Павлович 1981 çулта ертсе пыма тытăннă. Хăйĕн ĕçĕнче пуçаруçă пулнă май тăван кĕтесшĕн те çунса тăнă. Çавăнпах Йÿçкасси ял тăрăхĕнчи инфраструктурăна аталантарассишĕн тăрăшнă. Выльăх-чĕрлĕх фермисем кăна мар, ялсенче асфальт çулсем те тунă. Районта газификацие те Йÿçкассисем малтисен йышĕнче тытăннă. 1981 çултанпа ку тăрăхра шкулсем, ача сачĕсем, больница, клубсем, спорт залĕсем, кафе хута кайнă, вĕсемпе пĕрлех - икĕ плотина та.
Платон Павлович районăн тата республикăн обществăлла пурнăçĕнче те активлăхпа палăрса тăнă. Депутатсен районти Пухăвĕн депутатне тĕрлĕ çулсенче суйланнă, Чăваш АССР Аслă Канашĕн депутачĕ, Чăваш Республикин Патшалăх Канашĕн депутачĕ пулма икĕ хут тивĕçнĕ.
1986 çултах унăн ĕçне тивĕçлĕ шайра хакласа "Хисеп палли" орденпа чысланă.1992 çулта ăна "ЧР ял хуçалăхĕн тава тивĕçлĕ ĕçченĕ", 2000 çулта "РФ ял хуçалăхĕн тава тивĕçлĕ ĕçченĕ" ятсем панă. 2007 çулта хастар ертÿçе "Чăваш Республики умĕнчи тава тивĕçлĕ ĕçсемшĕн" орденăн медалĕпе чысланă. 2010 çулта Платон Павловича районăн Хисеп кĕнекине кĕртнĕ.