08 октября 2014 г.
Пĕтĕм тĕнчери ватă çынсен кунне пур çĕрте те чыслăн уявларĕç, хисеплĕ çыннăмăрсене сума сурĕç. Оринин ял тăрăхĕнче пурăнакан аслă ăрăва чысласси çÿллĕ шайра пулчĕ, ăна тăваттăмĕш хут ирттерчĕç. Ку хутĕнче сумлă ăру Атапай клубĕнче пухăнчĕ.
Агропромышленноç комплексĕн ветеранĕсен районти канашĕн председателĕ тата Оринин ял тăрăхĕнчи ветерансен канашĕн ертÿçи Валерий Вязов пухăннисене асăннă шайри ĕçсемпе паллаштарнă май ватă çынсем активлă та пуçаруллă пулни курăнчĕ.
- Аслă ăру тав сăмахне, кулленхи тимлĕхпе хисепе тивĕç. Вĕсем тăнăç пурнăçшăн ырми-канми тăрăшнă, ыттисем умĕнче тĕслĕхре пулнă. Пирĕн ял тăрăхĕнчи ветерансем - питĕ активлă çынсем. Йывăç-тĕм лартассинчен, тирпей-илем кĕртессинчен тата ытти ĕçрен аякра юлмаççĕ. Куратăр акă, паян та йышлăн пухăннă, ку вĕсем ответлăха туйнине çирĕплетет, - терĕ Валерий Иванович пухăннисене саламланă май.
Тĕп больницăн терапевчĕ Ирина Данилова кунти участокри врач пулнă май хăш-пĕр çĕнĕлĕх çинче чарăнчĕ. Пенси фончĕн районти пайĕн ертÿçи Андрей Александров кунта пулса иртнĕ улшăнусемпе паллаштарчĕ.
- Ветерансен çакăн пек пысăк йышне курма питĕ кăмăллă, район шайĕнчи мероприяти тейĕн. Орининсем ĕçлеме те пултараççĕ, канма та пĕлеççĕ. Ватă çынсене пур енлĕ хÿтлĕхе илесси патшалăхăн приоритетлă задачисенчен пĕри пулса тăрать. Район, республика шайĕнче ветерансем тĕлĕшпе чылай ĕç пурнăçланать. Сире сума сунипе тата сирĕн ĕçĕре мала хунипе кăна хамăр çĕр-шыва тĕреклĕрех тăвăпăр. Аслă ăру чылай йывăрлăх чăтрĕ. Яланах эсир çĕнтерÿпе тухма пултартăр, пире те çавнах вĕрентсе пыратăр. Эпир сирĕн умăрта пуç тайма тивĕç, - терĕ район администрацийĕн пуçлăхĕ Ростислав Тимофеев хисеплĕ ветерансене саламланă май.
Сцена çине нумаях пулмасть 85 çулхи юбилейне паллă тунă Игорь Крысин тухрĕ. Район аталанăвне сумлă çыннăмăр пысăк тÿпе хывнă. Вăл тĕрлĕ должноçра вăй хунă, чылайăшĕнче ертÿçĕ пулнă. Паян та вăл пурнăç уттипе тан пырать, яланхиллех спортпа туслă, ăста сад-пахчаçă. Чылай Хисеп грамотипе чыслава тивĕçнĕ вăл. Çамрăк ăрушăн вăл ырă тĕслĕх пулса тăрать. Хисеплĕ ветеран уявра салам сăмахĕсене йышăнчĕ.
Çемье вучахне чыслăн упрани - пархатарлă, ĕмĕр тăршшĕпе çума-çумăн утакан мăшăр сăваплă. Уяв сцени çинче Çеменкасси ялĕнчи Нина Антоновнăпа Петр Алексеевич Михайловсене, Мулкачкасси ялĕнчи Вера Ивановнăпа Аркадий Павлович Леонтьевсене (сăн ÿкерчĕкре), Патаккасси ялĕнчи Раиса Васильевнăпа Валерьян Прохорович Ивановсене çавра çăкăрпа кĕтсе илчĕç. Виçĕ мăшăрăн - "ылтăн туй". Сăмах çăмхи сÿтĕлнĕ май вĕсем хăйсен шухăш-кăмăлне палăртрĕç, çамрăклăха, пурнăçри пĕрремĕш утăмсене аса илчĕç. "Мендельсон" маршĕ янăрани мăшăрсене алă çул каяллахине аса илтерчĕ пулас. Çак саманта питĕ ытарлă йĕркелени, туй арăмĕсем туй юррисем янăратни мăшăрсен чунĕсене пăлхатрĕ. Уяв кĕрекине асăннă ял тăрăхĕнче культура ĕçне ертсе пыракан Венера Васильева çÿллĕ шайра йĕркеленĕ май çынсен кăмăлне тивĕçтерчĕ.
- Килĕшÿлĕхпе ăнлану хуçаланакан çемьене Турă хăй хÿтлĕхне илсе чылай çул пĕрле килĕштерсе пурăнма ăнăçу сунать, - терĕç пĕр шухăшлăн мăшăрсем.
- Паянхи çамрăксен камсенчен тĕслĕх илмелли пур. Пурнăç курнă çынсен сĕнĕвĕсем вара пирĕншĕн яланах вырăнлă пулĕç, - палăртрĕ район администрацийĕн ЗАГС пайĕн ертÿçи Елена Иванова.
Салам сăмахĕсем çумне асăннă ял тăрăхĕн пуçлăхĕ Александр Волков тата ыттисем хутшăнчĕç, активлăхпа палăракан çынсене чысларĕç. Уяв ирттерессине чăнах та питĕ шайлашуллă йĕркеленĕ, кашни ветерана уйрăммăн йыхравланă, тĕрлĕ ялтан автобуссемпе турттарнă. 150 çын вырнаçмалăх залра пушă вырăн пачах та çук, кунта асăннă йышран та ытларах. Фойере курав йĕркеленĕ. Юрă саламне вара ача садне çÿрекенсем те, аслă çулхисем те илсе çитерчĕç.
Р. Илларионова.