08 октября 2014 г.
Пирĕн район каччине Дмитрий Мостова паян республикăри кăна мар, пĕтĕм Раççейри волейбол фаначĕсем те, Европăрисем те лайăх пĕлеççĕ. Вăл Ярославльти патшалăх педагогика университечĕн физкультура факультечĕн студенчĕ, хальхи вăхăтра - Раççейĕн çамрăксен пĕрлештернĕ волейбол командин выляканĕ.
Хастар каччă 1995 çулта Юнкăпуçĕнче çуралнă. Нискассинчи вăтам шкулта вĕреннĕ вăхăтра унăн физкультура учителĕ Алексей Димитриев (халĕ шкул директорĕ) пулнă. Çак пултаруллă каччăна районти спорт ветеранĕ Георгий Лукин та асăрхать, ăна Чăваш Республикин тава тивĕçлĕ тренерĕ В. Матижев (Çĕрпÿре çуралнă) патĕнче ăсталăха туптама сĕнет. Тĕл пулу хыççăн тĕл пулу иртет, вĕсем Дмитрие шăпах Ярославльти университета çитереççĕ те.
Хастар çамрăка, икĕ метра яхăн çÿллĕшскерне, паллах, "Ярославич" волейбол клубĕн тренерĕ, унăн хисеплĕ президенчĕ Сергей Шляпников асăрхамасăр пулмасть. Çамрăксемпе Ярославль командин тренерĕ Сергей Чабан та ĕçлет.
Август-сентябрь уйăхĕсенче волеболла выляссипе Европа чемпионачĕ иртрĕ. Раççейĕн çамрăксен пĕрлештернĕ команди унта çĕнтерÿçĕ пулса тăчĕ. Раççей çамрăкĕсем (20 çултисем тата кĕçĕнреххисем) финалта Польша командине 3:0 шутпа (25:16: 25:16, 28:26) парăнтарнă. Çапла вара командăри Муркаш ен каччи Дмитрий Мостов ылтăн медале тивĕçме пултарчĕ.
Малашне те Димăна пысăк ăнăçусем сунатпăр, районта унран тĕслĕх илекен ăру çитĕнессе шанатпăр.