27 сентября 2014 г.
Чуманкасси ял тăрăхĕнчи Отарккăра вырнаçнă "Малыш" ача сачĕ кăçал инноваци программисемпе усă курса ĕçлекен вĕренÿ учрежденийĕсен республика конкурсĕнче çĕнтерÿçĕсен йышне кĕме пултарчĕ, 200 пин тенкĕлĕх грант çĕнсе илчĕ.
Ача сачĕн ертÿçинче 28 çул ĕнтĕ Маргарита Иванова тăрăшать. Коллектива пĕрлештерсе, ĕçе ăста йĕркелесе пырать вăл, ĕçтешĕсен хастарлăхне татах та аталантарас, ачасем валли лайăх условисем туса парас тĕллевпе яланах кирлĕ сĕнÿ-канаш парать, çирĕп ыйтать. Çавăнпа та ача сачĕ грант çĕнсе илме пултарнинче унăн тÿпи курăмлă. Професси уявĕ умĕн Маргарита Валерьяновнăна редакци тĕпелне калаçăва чĕнтĕмĕр.
- Маргарита Валерьяновна, ача садне çак гранта çĕнсе илме мĕн пулăшрĕ;
- Грант çĕнсе илес тесе эпир нумай тăрăшрăмăр. Çак çитĕнÿ вара пирĕн малтанхи ÿсĕмсен никĕсĕ çинче пулчĕ тесен те тĕрĕс. Пирĕн 20 çынран тăракан коллективра 8 педагог, вĕсен йышĕнче çамрăк специалистсем пурри хавхалантарать: И. Воробьева, О. Николаева, Р. Семенов тата Е. Михайлова тăрăшсах ĕçлеççĕ. Воспитательсен тăрăшулăхĕ пирĕн ачасем тĕрлĕ конкурссене хутшăннинче те палăрать. Юлашки çулсенче пирĕн ачасем çĕр-шыв шайĕнчи конкурссенче те палăрма пултарчĕç. Пĕлтĕр акă Никита Николав художество пултарулăх конкурсĕнче, сăн ÿкерчĕксен "Сохраним это чудо" конкурсĕнче çĕнтерÿçĕ пулса тăчĕ. Кăçал вара Пĕтĕм Раççейри пултарулăх конкурсĕнче Валя Макарова 1-мĕш, Ксюша Игнатьева 2-мĕш вырăнсем çĕнсе илчĕç, Даша Федорова «Кусочек счастья» конкурсра 3-мĕш вырăна тивĕçрĕ. Çакă воспитательсене те, ачасене хăйсене те хавхалантарать. Республика шайĕнчи конкурссенче те ачасен малти вырăнсем сахал мар.
- Ачасен çитĕнĕвĕсемпе хавхаланса воспитательсем те ытларах тăрăшаççĕ пулĕ.
- Çапла. Пирĕн воспитательсем хушшинче ЧР Пуçлăхĕн грантне çĕнсе илнисем те, ЧР Пуçлăхĕн стипендине илсе тăнисем те пур. Воспитательсемпе вĕсене пулăшаканĕсем те тăрăшаççĕ. Воспитательсем акă Раççей шайĕнчи ăсталăх конкурсĕсене хутшăнаççĕ. Район тата республика шайĕсенче иртекен конкурссене хутшăнса призлă вырăнсене йышăнаççĕ. Раççейри "Детские сады - детям" конкурсра 2011 çулта 2-мĕш вырăн çĕнсе илме пултартăмăр.
- Паян садика миçе ача çÿрет;
- Паян садика 79 ача çÿрет, 4 ушкăн ĕçлет. Ачасем чылай ялтан килеççĕ. Эпир вĕсене лайăх условисем туса парассипе нумай тăрăшатпăр. Малтанхи вăхăтра, ачасем сахалланă тапхăрта, садика хупас мар, сыхласа хăварас тесе тĕрлĕ майсемпе ĕçлерĕмĕр: кĕске вăхăтпа ĕçлекен ушкăн та уçрăмăр, талăкĕпех ĕçлени те пулнă. Çавăнпа та садика упраса хăварса ăна татах та лайăхрах аталантарма пултарнăшăн илтнĕ тав сăмахĕ - маншăн чи хакли.
Ача сачĕ паян чăнах та лайăх аталанса пырать. Эпир 2011 çулта çи витти çĕнетме пултартăмăр, пĕлтĕр акă уйрăм котельнăй хута кайрĕ. Çак пысăк ĕçсене тăрăшсах пурнăçларăмăр.
- Кăçал вара грант çĕнсе илтĕр. Укçапа тĕллевлĕн мĕнле усă курма шутларăр;
- Эпир сĕтел-пукан таврашне çĕнетме тата ачасемпе ĕçлемелли тĕрлĕ пособи хатĕрĕсене çĕннисене туянма шутларăмăр. Çапла вара садик татах та илемлĕрех те хăтлăрах пулĕ, ачасем вара воспитательсемпе хаваспах тĕрлĕ ĕçе хутшăнса тавра курăмне анлăлатĕç.
- Апла конкурссене хутшăннин уссине хăвăрах туятăр;
- Çапла. Конкурссене хутшăнмалла. Эпир тĕрлĕ программăпа ĕçлетпĕр. Ачасене тĕрлĕ енлĕн аталантарма тăрăшатпăр. Çавăнпа та чылай конкурса хутшăнма та ÿркенместпĕр. Грант çĕнсе илнине пирĕн ĕçе тивĕçлĕ хаклани тесе шутлатпăр.
- Сире уяв ячĕпе саламлатпăр, татах та пысăкрах ăнăçусем тума вăй-хал сунатпăр.
- Тавах. Эпĕ те паян самантпа усă курса хамăрăн коллектива, ĕçтешсене саламлатăп. Сывлăх, ăнтăлу, ăнăçу сунатăп. Çак уяв вăл пирĕншĕн професси уявĕ кăна мар, чун уявĕ те, мĕншĕн тесен эпир пурте ачасемпе чуна парса ĕçлетпĕр.
Н. Николаева.