27 сентября 2014 г.
Сентябрĕн 24-мĕшĕнче РФ шалти ĕçсен министрĕ, полицин генерал-полковникĕ Владимир Колокольцев ертсе пынипе видеокоференци çыхăнăвĕн мелĕпе территори подразделенийĕсемпе Раççей Федерацийĕн правăна пăсассин профилактики енĕпе ĕçлекен Правительство комиссийĕн ларăвĕ иртнĕ.
Чăваш Енрен унта Раççей Федерацийĕн наркотиксен çаврăнăшне тĕрĕслесе тăракан федераци службин Чăваш Республикинчи управленийĕн пуçлăхĕ Евгений Барсуков, Чăваш Республикинчи шалти ĕçсен министрĕн çумĕ Андрей Тимофеев, Чăваш Республикин Пуçлăхĕн Администрацийĕн общество хăрушсăрлăхĕн тата коррупцие хирĕçле политика управленийĕн пуçлăхĕн тивĕçĕсене вăхăтлăх пурнăçлакан Алексей Юрьев тата ытти официаллă çынсем хутшăннă.
Ларура палăртнă тăрăх правăна пăсассин профилактикинче физкультурăпа спорта аталантарни пысăк пĕлтерĕшлĕ. Чăваш Республикине физкультурăпа спорта аталантарассипе ăнăçлă ĕçлесе пыракан регионсен шутне кĕртсе асăннă. Ку енĕпе палăрăмлă утăмсенчен пĕри - ГТО нормативĕсене пурнăçлассине çĕнĕрен пурнăçа кĕртни. Октябрĕн 9 - 11-мĕшĕсенче Шупашкарта Пĕтĕм тĕнчери "Раççей - спорт çĕр-шывĕ" форума ирттернĕ май ГТО çĕнĕ значокне презентацилеме палăртнă.
* * *
Сентябрĕн 24-мĕшĕнче Чăваш Ен Пуçлăхĕ М. Игнатьев ЧР Министрсен Кабинечĕн черетлĕ ларăвне ирттернĕ. Ытти ыйтусемпе пĕрлех ларура республикăра строительство ĕçĕсем мĕнле пынине те тишкернĕ. Кун пирки строительство тата архитектура министрĕ Олег Марков каласа панă.
Çак вăхăта республикăра строительство отраслĕнче 2500 ытла предприяти регистрациленĕ, вĕсенче 28 пин çын ытла вăй хурать.
2011 - 2013 çулсенче 2,5 млн. тăваткал метр пурăнмалли çурт-йĕр ĕçе кĕртнĕ. Кăçалхи сакăр уйăхра ку кăтарту 383,8 пин тăваткал метрпа танлашать. Атăлçи федераци округĕпе илес пулсан, пĕр çын пуçне пурăнмалли çурт-йĕр хута ярассин кăтартăвĕпе Чăваш Ене çитекенни çук. 2013 çул итогĕсемпе вăл вăтамран 0,67 тăваткал метрпа танлашнă пулсан, кăçал ку кăтартăва 0,7 тăваткал метра çитерме пăхнă.
* * *
2014 çул вĕçлениччен Чăваш Енре "Народный контроль" портал хута каймалла.
Çĕнĕ интернет-ресурс республикăра пурăнакан кирек кама та хăйĕн проблеми пирки тÿрремĕн республика Правительствине пĕлтерме май парĕ. Сентябрĕн 14-мĕшĕнче ЧР Министрсен Кабинечĕн ларăвĕнче кун пирки тунă йышăнăва ырланă.
Сайта Чăваш Республикинчи патшалăх услугисен пĕрлехи порталĕнчи харпăр хăй кабинечĕ урлă кĕме май пулĕ. Чăваш Ен информаци политикипе массăллă коммуникацисен министрĕ Валентина Андреева палăртнă тăрăх çĕнĕ портал йĕркеленинин тĕп тĕллевĕ - республикăра пурăнакан çынсен шухăшне тĕпчесси тата вĕсемпе çыхăнма май тăвасси, республикăри обществăпа политика пурнăçĕн ыйтăвĕсене сÿтсе явма пĕрлехи информаци уçлăхĕ туса хурасси тата çынсен актуаллă проблемисемпе мониторингсем ирттересси.
* * *
Сентябрĕн 22-мĕшĕнче "Россия сегодня" МИА пресс-конференцийĕнче Раççейри чи лайăх 500 шкула палăртнă.
Вĕсен шутне Чăваш Республикинчи 6 шкул та кĕме тивĕçнĕ. Вĕсем 2013 - 2014 вĕренÿ çулĕн итогĕсемпе пысăк кăтартусем тума пултарнă, вĕренекенсем ЕГЭ тытассипе тата предмет олимпиадисенче хăйсене лайăх енчен кăтартнă. Вĕсен шутĕнче Шупашкар хулинчи 3-мĕшпе 4-мĕш номерлĕ лицейсем, 1-мĕшпе 4-мĕш тата 5-мĕш номерлĕ гимназисем, Çĕнĕ Шупашкар хулинчи 6-мĕш номерлĕ гимнази.
Раççейри ялсенчи чи лайăх 200 шкул шутне республикăри 5 шкула кĕртнĕ. Кусем Элĕкри И.Я. Яковлев ячĕллĕ, Йĕпреçри 1-мĕш номерлĕ, Патăрьелĕнчи 1-мĕш номерлĕ, Вăрмарти Г.Е. Егоров ячĕллĕ тата Вăрнарти 2-мĕш номерлĕ шкулсем. Кунта выпускниксен хатĕрленÿ шайне шута илнĕ.