24 сентября 2014 г.
Сентябрĕн 19 - 20-мĕшĕсенче Сочире Пĕтĕм тĕнчери "Сочи - 2014" инвестици форумĕ иртрĕ. Чăваш Ен Пуçлăхĕ Михаил Игнатьев ертсе пынипе унта республика делегацийĕ те хутшăннă. Унти тĕл пулусем ĕçлĕ лару-тăрура иртнĕ, форумра республикăшăн пĕлтерĕшлĕ килĕшÿсем тума, малашлăх ĕçĕсене палăртма май килнĕ.
* * *
Сентябрĕн 19-мĕшĕнче Чăваш Республикин Пуçлăхĕ Михаил Игнатьев Раççей Перекет банкĕ йĕркеленĕ "Бюджет шайлашăвĕ е ÿсĕм хăвăртлăхĕ: суйласа илме вăхăт мар-и;" ĕç калаçăвне хутшăннă.
Макроэкономика тăнăçлăхне тивĕçтерессин ыйтăвне сÿтсе явнă çĕре РФ Правительствин вице-премьерĕсем Ольга Голодец тата Аркадий Дворкович, Раççей Федерацийĕн финанс министрĕ Антон Силуанов, экономика аталанăвĕн министрĕ Алексей Улюкаев тата официаллă ытти çынсем хутшăннă. Мероприятие "Раççей перекет банкĕ" ОАО правленийĕн президенчĕ тата председателĕ Герман Греф хутшăннă.
Чăваш Ен Пуçлăхĕ Михаил Игнатьев журналистсен экономикăна ÿсĕмлĕ аталантарассипе, республикăн инвестици илĕртÿлĕхне ÿстерессипе çыхăннă ыйтăвĕсене хуравланă май ĕç-хĕл ăнăçулăхĕ ытларах бюджет шайлашуллă пулнипе çыхăннине палăртнă. Çавăнпа та республика бюджетĕнче программа тата тĕллевлĕ майпа финанслассине пăхса хуни питех те пысăк пĕлтерĕшлĕ пулса тăрать. Çавăн пекех экономика кăтартăвĕсене лайăхлатас тесен обществăпа политика тĕлĕшĕнчи лару-тăру тăнăç пулни кирлĕ.
* * *
Çав кунах Михаил Игнатьев "РЕНОВА" компанисен ушкăнĕн правленийĕн председателĕпе Алексей Московпа тĕл пулнă. Тĕл пулăва Чăваш Ен Экономика аталанăвĕн министрĕ Владимир Аврелькин, "РЕНОВА" ГК правленийĕн председателĕн çумĕ Ринат Халиков, "Корпорация развития Чувашской Республики" ОАО директорĕ Евгений Федоров хутшăннă.
Енсем Шупашкар хулин аэропортне реконструкцилессине регионсенчи аэропортсене аталантарассин программине кĕртессин условийĕсене ("Аэропорты регионов" УК ЗАО пурнăçлать), "Хĕвел" ООО ĕçĕ-хĕлĕпе çыхăннă ыйтусене сÿтсе явнă, "Химпром" ОАО производство хăвачĕсемпе туллин усă курассин ыйтăвĕсене тишкернĕ. Вăл шутрах "Çулталăкне 50000 тонна водород перекиçĕ туса кăларакан производство строительстви" инвестици проектне пурнăçа кĕртесси пирки те сăмах пынă. Ăна хута яма 2,5 млрд. тенкĕ инвестицисем хывма палăртнă. Алексей Москов технологи тĕлĕшпе кăткăс асăннă проект 2015 çулта ĕçлеме тытăнасса шанни пирки пĕлтернĕ.
* * *
Сентябрĕн 19-мĕшĕнче Михаил Игнатьев "Раççей Европăпа Ази хушшинче: хальхи условисенчи регионăн çĕнĕ политики" темăпа иртнĕ Пĕтĕм тĕнчери XIII инвестици форумĕн пленарлă ларăвне хутшăннă. Форума хутшăнакансем умĕнче Раççей Федерацийĕн Правительствин Председателĕ Дмитрий Медведев тухса калаçнă. Вăл Раççейре экономика тата политика пурнăçĕнче палăрăмлă улшăнусем пулса иртнине палăртнă. Стратегиллĕ партнерсем улшăнаççĕ, çĕнĕ рыноксем йĕркеленеççĕ. Китайпа, Японипе, Индипе хутшăнусем аталанаççĕ.
Чăваш Енре хамăрăн ял хуçалăх продукцине туса илекенсене пулăшу мелĕсемпе тивĕçтерме тăрăшаççĕ, ют çĕр-шыв продукцине ылмаштармалли майсене ĕçе кĕртеççĕ. Республика Китайпа пĕрлехи проектсене ĕçе кĕртет.
Пленарлă лару хыççăн "Обязательствăсене пурне те мĕнле пурнăçламалла тата ÿсĕмсем тумалла" темăпа панель дискуссийĕ иртнĕ. Ăна Раççей Правительствин вице-премьерĕсем Ольга Голодец тата Аркадий Дворкович ирттернĕ.
Пурнăçăн пĕлтерĕшлĕ енĕсенчен пĕрне - социаллă сферăна аталантарассин малашлăхĕн ыйтăвĕсене тишкернĕ. Çĕр-шывра ятарлă преми туса хунă. Ăна регионсен социаллă аталану программисен Пĕтĕм Раççей конкурсĕн итогĕсем тăрăх параççĕ. Ку конкурса "Лекотека - вăйă территорийĕ" проектпа Чăваш Ен те хутшăннă. Ольга Голодец пĕлтернĕ тăрăх "Çынлăх" номинацире Чăваш Республикин проектне чи лайăххи тесе палăртнă, вăл Чăваш Ен Пуçлăхне Михаил Игнатьева çĕнтерÿçĕ Дипломне панă.
* * *
Сентябрĕн 19-мĕшĕнче Чăваш Ен Пуçлăхĕ Михаил Игнатьев тата "Раççей Перекет банкĕ" ОАО правленийĕн президенчĕ тата председателĕ Герман Греф Раççей Перекет банкĕпе Чăваш Республикин Министрсен Кабинечĕ килĕштерсе ĕçлесси пирки килĕшĕве алă пуснă. Чăваш Еншĕн пĕлтерĕшлĕ инвестици проекчĕсене пурнăçа кĕртме Раççей Перекет банкĕ укçа-тенкĕпе пулăшма шантарать.
Килĕшĕве алă пуснă хыççăн журналистсен ыйтăвĕсене хуравланă май Герман Греф çавна палăртнă. Чăваш Ен кризис вăхăтĕнче ипотекăна субсидилессин опычĕпе усă курнă регионсенчен пĕри пулнă. Ку опытпа усă курса халĕ кун пек килĕшÿсене федерацин пур субъекчĕсемпе те тума тытăннă. Çавна май пурăнмалли çурт-йĕр туянассинче ипотекăпа усă курасси 10 - 11 процентран 30 - 35 процента çитнĕ.
"Алă пуснă килĕшÿ регион экономикишĕн пысăк пĕлтерĕшлĕ пулса тăракан инвестици проекчĕсене пурнăçа кĕртме май парĕ. Раççей Перекет банкĕ пĕрремĕш çул мар ĕнтĕ Чăваш Ен Правительствипе тухăçлă çыхăнса ĕçлет. Асăннă килĕшĕве пурнăçа кĕртни региона малашлăх çулĕпе ăнăçлăрах утăмлама май парĕ", - тенĕ Герман Греф.
Чăваш Енре пурăнакансен ипотека кредитне шанаслăхĕ ÿссе пынине республика Пуçлăхĕ те палăртнă. Кредита патшалăх 4 процент субсидилени ипотека кредичĕн потребительсен рынокĕнчи хакне чакарать, çамрăк çемьесене, пысăк мар тупăшлă çемьесене хăйсен пурăнмалли çурт-йĕр условийĕсене лайăхлатма май парать.
* * *
Форумăн пĕрремĕш кунĕ Чăваш Ен делегацийĕшĕн чăннипех те тухăçлă пулнă. Сентябрĕн 19-мĕшĕнчех Раççейăн виçĕ регионĕпе - Севастополь хулипе, Ставрополь крайĕпе тата Ямало-Ненецк автономи округĕпе килĕштерсе ĕçлесси пирки килĕшÿсене алă пуснă. Килĕшÿсене алă пуснă май çавна палăртнă: регионсен пĕр-пĕринпе çыхăнса ĕçлемелли, пĕрлехи çул-йĕр çук мар.
* * *
Сентябрĕн 20-мĕшĕнче Михаил Игнатьев "Раççей пурăнмалли çурт-йĕрпе коммуналлă хуçалăхĕ: харпăр хăй инвестицилессин çĕнĕ условийĕсем" панель дискуссине хутшăннă. Ыйтусене сÿтсе явнă çĕре Раççей Правительствин вице-премьерĕ Дмитрий Козак тата Раççей Федерацийĕн строительство тата пурăнмалли çурт-йĕрпе коммуналлă хуçалăх министрĕ Михаил Мень те хутшăннă.
* * *
Сентябрĕн 20-мĕшĕнче Чăваш Ен Пуçлăхĕ Михаил Игнатьев рейтинг комитечĕн уçă ларăвне хутшăннă. Унта Раççей Федерацийĕн субъекчĕсенчи инвестици лару-тăрăвĕн наци рейтингĕн пилот тапхăрĕн итогĕсене тишкернĕ. Рейтингăн пилот тапхăрне Раççей Федерацийĕн 21 субъекчĕ хутшăннă. Рейтинг 54 кăтартуран тăрать.
Чăваш Ен Пуçлăхĕ хăйĕн сăмахĕнче çавна палăртнă. Асăннă рейтинга пула федераци субъекчĕсен хăйсен вăйлă тата хавшак енĕсене объективлă мĕнле хак пани пирки тĕрĕс информаци илме май пур. "Чăваш Енĕн çут çанталăкăн пысăк ресурсĕсем çук. Чи пĕлтерĕшли пирĕншĕн - çын тата интеллект капиталĕ. Эпир инвестицисене çынсем валли хыватпăр", - тенĕ Михаил Игнатьев. Çавăн пекех вăл ĕç рынокĕн мониторингне тăтăшах ирттерме кирлине палăртнă. Чăваш Ен вара инвестици лару-тăрăвĕн наци рейтингне хутшăнма хатĕр.
* * *
Сентябрĕн 20-мĕшĕнче Чăваш Ен Пуçлăхĕ Михаил Игнатьев тата РФ промышленноç тата суту-илÿ министрĕ Денис Мантуров Раççей Федерацийĕн Промышленноç тата суту-илÿ министерствипе Чăваш Республикин Министрсен Кабинечĕ промышленноç политикин сферинче тата суту-илÿ ĕçĕ-хĕлĕ енĕпе килĕштерсе ĕçлесси пирки килĕшĕве алă пуснă. Енсем палăртнă тăрăх çакă çĕнĕ индустрисене аталантарма, пысăк технологиллĕ çĕнĕ производствăсем йĕркелеме инвесторсене ытларах явăçтарма пулăшма тивĕç.
Çавăн пекех сентябрĕн 20-мĕшĕнче Михаил Игнатьев Крым Республикин Пуçлăхĕн ĕçĕсене вăхăтлăх туса пыракан Сергей Аксеновпа суту-илÿпе экономика, наукăпа техника, социаллă тата культура енĕпе малашне килĕштерсе ĕçлесси пирки Чăваш Республикин Министрсен Кабинечĕпе Крым Республикин Министрсен Канашĕ хушшинчи килĕшĕве алă пуснă.
Килĕшĕвĕн тĕп тĕллевĕ - регионсем хушшинчи çыхăнусене çирĕплетме кирлĕ йĕркелÿ, экономика тата право условийĕсене туса хурасси.
* * *
Унччен палăртса хунă протокол мероприятийĕсене хутшăннисĕр пуçне инвестици форумĕ пынă кунсенче Михаил Игнатьев актуаллă тĕрлĕ ыйтусемпе Раççей Федерацийĕн Правительствин членĕсемпе тĕл пулнă. Раççей энергетика министрĕпе Александр Новакпа, строительство тата пурăнмалли çурт-йĕрпе коммуналлă хуçалăх министрĕпе Михаил Меньпе, транспорт министрĕпе Максим Соколовпа тĕл пулусем ĕçлĕ лару-тăрура иртнĕ.