30 августа 2014 г.
Августăн 27-мĕшĕнче Чăваш Ен Пуçлăхĕ М. Игнатьев Мускавра Раççей Федерацийĕн Правительствин Председателĕ Д. Медведев йĕркелесе ирттернĕ канашлăва хутшăннă. Кун йĕркинчи тĕп ыйту вĕренÿ тытăмне 2014-2015 çулсенчи çĕнĕ вĕренÿ çулне хатĕрлесе çитерни çинчен сÿтсе явасси пулнă. Вĕрентÿ процесне тытса пырассипе тата ăна йĕркелессипе комплекслă ыйтусене пăхса тухнă, çуртсен тытăмне, ачасене апатлантарасси, классене вĕрентÿ хатĕрĕсемпе тивĕçтересси пирки канашланă.
Чăваш Ен Пуçлăхĕ М. Игнатьев республикăри пур пĕтĕмĕшле пĕлÿ паракан шкул та ачасене çĕнĕ вĕренÿ çулне йышăнма хатĕррине пĕлтернĕ. Кăçал пĕрремĕш класа пĕлтĕрхинчен 500 ача ытларах каяссине палăртнă. Çĕнĕ вĕренÿ çулне вĕренÿ учрежденийĕсене хатĕрлеме 1 миллиард та 800 миллион тенкĕ тăкакланине асăннă. "Хамăр ума лартнă тĕллевсене пĕтĕмпех туллин пурнăçланă", - пĕлтернĕ М. Игнатьев. Вăл Украинăран ирĕксĕр куçса килнĕ 133 ачана шкулсене, 45 ачана ача сачĕсене вырнаçтарнине, республикăри 26 шкул спортзалне юсаса çĕнетме 22 миллион тенкĕ тăкакланине те палăртса каланă.
Аса илтеретпĕр, пирĕн районта вĕренÿ учрежденийĕсене вĕренÿ çулне хатĕрлеме кăçал 15 миллион тенке яхăн уйăрнă.