03 сентября 2014 г.
Ял хуçалăхĕ техникăпа çывăх туслашнă вăхăтра пурăнатпăр. Çакна ăнланакансемшĕн хăрушсăрлăх ыйтăвĕ - тĕп вырăнта. Сăмахпа каланă чух ăна пурте ăнланатпăр. Ĕçлеме тăрсан вара...
Халĕ каланă икĕ енлĕ ÿкерчĕк çурла уйăхĕнче районта ирттернĕ "Трактор" профилактика уйăхлăх-операци вăхăтĕнче те куç умĕнчен пăрăнса юлаймарĕ. Массăллă тĕрĕслев кашни кăлтăках çиеле кăларчĕ, йĕркене пăхăнса ĕçлеме мĕн чăрмантарнине кăтартса пачĕ.
Иртнĕ эрне вĕçĕнче Муркашсене пулăшмалла пирĕн енри тĕрĕслевре Элĕк районĕнчи патшалăх техника надзор инспекцийĕн аслă инспекторĕ К. Майоров пулчĕ.
Муркаш ен техникăпа пуяннине пĕлетпĕр, анчах вĕсен хуçисем хăрушсăрлăх йĕркине епле пăхăнаççĕ-ха; Кÿршĕсемпе ирттернĕ пĕрлехи тĕрĕслев çакăн çине конкретлă хурав пачĕ.
Константин Анатольевич ертсе пыракан ушкăн кĕçнерни кунхи тĕрĕслевре Муркаш, Чуманкасси, Йÿçкасси, Уйкас Янасал ял тăрăхĕсенчи ĕç-пуçпа паллашрĕ. Ĕçлĕ çул çÿревре рейд ушкăнĕ 9 тракторпа 2 "хир карапне" тĕрĕслерĕ.
- Вырмара хăрушсăрлăх ыйтăвĕ тĕп вырăнта пулнине пĕлетпĕр. Хамăр тăрăшнипе тата хуçалăх пулăшнипе комбайна вырмана тĕплĕ хатĕрлесе кăлартăмăр. Çак йĕркене паян та хăй еккипе ямастпăр, ыттисене те çавнах сĕнетпĕр, - терĕ Чкалов ячĕпе хисепленекен хуçалăх комбайнерĕ Болеслав Никитин хăйĕн экипажĕ çурхи тулă хирне васканине пĕлтерсе.
Кунта йĕрке пурри Исетерккĕре пурăнакан А. Степановăн харпăрлăхĕнчи МТЗ-82 тракторне чарсан урăх сĕмпе витĕнчĕ. Трактор çинче авари чарăнăвĕн палли, огнетушительпе медицина аптечки пулманни тĕрĕслевçĕне протокол çыртарчĕ.
Ильич ячĕпе хисепленекен хуçалăх хирне çитсен те тракторпа ĕçлекенсем хушшинчи хăрушсăрлăх ыйтăвĕ иккĕлле пайланчĕ. Хирте утă рулонĕсем тиекен Андрей Павловăн МТЗ-82 тракторĕ тĕлĕшпе ыррине кăна палăртрăмăр. Анчах рулонсем турттаракан механизаторсем тĕлĕшпе айăплавсăр пулмарĕ. Тĕрĕсленĕ вăхăта А. Антоновпа П. Степановăн механизатор удостоверенийĕсен вăхăчĕ тухни палăрчĕ. Ĕçри тăрăшулăх тракторист-машинист документацийĕ çине тимлĕх уйăрмаллине те мантармалла мар.
"Трактор" профилактика уйăхлăх-операци вĕçленчĕ, анчах çакă тĕрĕслевсем тек пулмĕç тенине пĕлтермест.
Рейд ушкăнĕ:
К. МАЙОРОВ, Элĕк районĕнчи патшалăх техника надзор инспекцийĕн аслă инспекторĕ*
С. НИКОЛАЕВ, Муркашри патшалăх техника надзор инспекцийĕн аслă инспекторĕ*
А. БЕЛОВ, район хаçачĕн экономикăпа экологи пайĕн ертÿçи.
Сăн ÿкерчĕкре: Элĕк районĕнчи патшалăх техника надзор инспекцийĕн аслă инспекторĕ К. Майоров черетлĕ тĕрĕслевре.