03 сентября 2014 г.
Террактран сыхланма хатĕр
Çак кунсенче районти шалти ĕçсен пайĕн сотрудникĕсем, аварипе çăлав службин ĕçченĕсем тата район администрацийĕн пуçлăхĕ Ростислав Тимофеев хутшăннипе халăх йышлă пухăнакан вырăнта - Шурча шкулĕнче - вĕренÿ-хăнăху пулнă. Вĕренÿре террор актĕнче хăрушлăх тухсан пĕрремĕш тумалли ĕçе туса ирттернĕ. Дежурнăй уйрăмне шкул çуртне сирпĕнекен устройство хуни пирки пĕлтернĕ. Вĕренĕве шалти ĕçсен пайĕн ертÿçи полици полковникĕ Евгений Плечов ертсе пынă. Пĕтĕмлетсе çапла каламалла: асăннă синкере сирес пулсан полици сотрудникĕсен шанчăклă оперативлă ушкăнĕ тата ытти служба ĕçченĕсем хăйсен тĕллевне пурнăçлама пултараççĕ.
Пĕрремĕш кунсем
Районти кашни шкултах пĕрремĕш шăнкăрав янăрарĕ. Парта хушшине пурĕ 3313 ача ларни паллă, вĕсенчен 385-шĕ - пĕрремĕш класа каякансем. Вĕсем районти 3 пуçламăш шкул - ача садĕнче, 9 тĕп шкулта тата 13 вăтам шкулта пĕлÿ илĕç.
Çак эрнере шкулсенче тĕрлĕ мероприяти иртĕ, вĕсен шутĕнче Бесланти трагедие асăнса ирттернĕ террора хирĕç кĕрешесипе çыхăннă мероприятисем те. Кунпа пĕрлех сентябрĕн 5-8-мĕшĕсенче вĕренÿ учрежденийĕсенче финанс пĕлÿлĕхĕн кунĕсене ирттерме те палăртнă.
Вăтам сăвăм хушăнчĕ
Район администрацийĕн экономикăпа ял хуçалăх аталанăвĕн пайне вырăнсенчен тăратнă оперативлă кăтартусемпе хăш-пĕр хуçалăхсенче çав-çавах сăвăм ÿсни курăнсах каймасть. Сăвакан пĕр ĕне пуçне тивекен районти вăтам сăвăма илсен вăл иртнĕ çулхи çак вăхăтринчен 0,7 килограмм çеç нумайрах - 11,7 килограмм.
Çулталăк каялла районти ял хуçалăх производство кооперативĕсенче 2243 пуç сумалли ĕне тăнă пулсан, кăçал вĕсен йышĕ 2124 пуçа юлнă. Çакнашкал лару-тăрурах ĕнесен йышне хушнисене асăнса хăвармалла. Вĕсем: "Путь Ильича" агрофирма, Суворов яч. хис., Е. Андреев яч. хис., Чкалов яч. хис. кооперативсем. Кĕтĕве "Ударник", "Свобода" хуçалăхсем самай сахаллатнă.
Районти пĕрлешÿллĕ хуçалăхсем паян талăксерен пĕтĕмпе 24893 килограмм сĕт сăваççĕ. Ку вăл иртнĕ çулхи çак тапхăртинчен 194 килограмм нумайрах.
Ĕç рынокĕнчи лару-тăру
Чăваш Республикин Ĕçпе тивĕçтерекен патшалăх службин районти центрне кăçал çулталăк пуçланнăранпа пулăшу ыйтса 797 çын пынă. Вĕсенчен нумайăшне ĕçпе тивĕçтернĕ. Авăн уйăхĕн 1-мĕшĕ тĕлне - центрта ĕçсĕррисен шутĕнче тăракан 54 çын. Çак хисепе районта ĕçлеме пултаракан çынсен шайĕпе пăхсан ĕçсĕррисем 0,27 процентпа танлашаççĕ. Çав вăхăтрах ĕç паракансем паян 154 ĕç вырăнĕ сĕнеççĕ.
Çулталăк пуçланнăранпа ĕçпе тивĕçтерекен центра пынисенчен 54 çынна обществăлла ĕçсене пурнăçлама хутшăнтарнă, 14 - 18 çулхи 433 çамрăка вăхăтлăх ĕçпе тивĕçтернĕ, 21 гражданина професси пĕлĕвĕ илме, пĕлĕве çĕнетме тата квалификацие ÿстерме янă.