13 сентября 2014 г.
Авăн уйăхĕн çуррине çитрĕмĕр. Умра - хура кĕр сиввисем. Малашлăхпа пурăнаканăн, халăх каларăшле, паян ырана хăвармасăр Пукрав ăшши тытмалла. Çакă ял хуçалăх производство кооперативĕсенче епле пурнăçа кĕрсе пырать-ха; Ку ыйту çине хурав шыраса иртнĕ юн кун, авăн уйăхĕн 10-мĕшĕнче, "Свобода" ял хуçалăх производство кооперативĕн Çатракассинчи сĕт фермине çитрĕмĕр. Фермăна çитсе пынă чух кунта çитес хĕл кунĕсене хатĕрленсе çанă тавăрса ĕçлени инçетренех курăнчĕ. Строительсен бригади ĕне сарайĕн çи виттине юсаса çĕнетессипе кĕрхи уяр кунăн кашни сехечĕпе туллин усă курать.
- Хуçалăхри выльăх-чĕрлĕх фермисем 2014 - 2015 çулсенчи хĕл тапхăрне мĕнле хатĕрленнĕ-ха; - ыйтрăм кооператив ертÿçинчен Леонид Петровран.
- Производство аталанăвне хĕл кунĕсенче те тивĕçлĕ шайра сыхласа хăварасси - хуçалăхра обществăлла выльăх-чĕрлĕх патĕнче ĕçлекенсемпе пирĕн пĕрлехи тĕллев. Ăна пурнăçа кĕртессипе эпир пĕр вырăнта тăмастпăр. Ферма çурчĕсене хĕле хатĕрлесе кăна миллион тенкĕлĕхе яхăн юсав ĕçĕсем ирттертĕмĕр. Уйрăммăн илсен Кашмашри сĕт тата сысна фермисенче урай улăштарса çĕнетрĕмĕр. Сĕт фермин çи виттийĕ çинче вак юсав ĕçĕсем пурнăçларăмăр. Çурла уйăхĕн вĕçĕнче çак ĕçсемпе Çатракасси сĕт ферминче ĕçе кÿлĕнтĕмĕр. Строительство материалĕсем çитнипе ĕçсен хăвăртлăхĕ кунта пысăк. Çитес хĕл кунĕсенче вырнаçакан 100 пуç ĕне тата вĕсемпе ĕçлекенсем хăйсене канлĕ те меллĕ туясса шанатпăр, - терĕ Леонид Иванович хуçалăхра выльăх-чĕрлĕх отрасльне аталантарма тĕллев пуррине палăртса.
Çи витти çинче ĕçлекен строительсем хуçалăх ертÿçин сăмахĕсене ырларĕç, унпа килĕшрĕç. Пуçăннă ĕçе вĕсем тепĕр 10 - 14 кунта вĕçлеме майсем тата кăмăл пуррине пĕлтерчĕç.
- Ферма заведующийĕ те, хуçалăхри тĕп зоотехникпа кооператив ертÿçи те пирĕн ĕçпе кăсăклансах тăраççĕ. Вĕсен ĕмĕтне пурнăçа кĕртесси - пирĕн тĕллев. Мал туртăмлă ĕçлеме тăрăшакана вăхăтра тĕкĕ пани те пысăк ĕç пулнине ăнланатпăр. Çавăнпа яра кунах объект çинче ĕç чарса лармастпăр, - терĕ ĕçрен пăрăнмасăр Евгений Петров платник.
Ферма çурчĕсене хĕле тĕплĕ хатĕрлени, вырмара 1600 тоннăна яхăн тырă вырса илни, çу каçа 580 тонна утă, 2100 тонна сенаж янтăлани хуçалăхри выльăх-чĕрлĕхшĕн хĕл кунĕсем выçă пулмасса, хирти кукуруза апат виçине татах ÿстерессе шантарать.
Умра - выльăхсене хĕллехи рацион çине куçармалли тапхăр. Малашлăха пăхса ĕçлекен кашни ĕçченренех вăл çирĕп ответлăх ыйтать. "Свобода" хуçалăхра çакна ăнланаççĕ.
А. БЕЛОВ.