06 августа 2014 г.
Çапла пĕлтерчĕ "Восток" ял хуçалăх производство кооперативĕн ертÿçи Михаил Шишокин хуçалăхра вырма ĕçĕсем мĕнле пынипе интересленсен. Хуçалăхра кăçал тĕш тырă культурисене 350 гектар çинчен пуçтарса кĕртмелле. Вăл шутран кĕрхи тулă 50 гектар тата ыраш 45 гектар. Кĕрхи культурăсене тăватă кун каяллах вырса-çапса пĕтернĕ. Тухăç япăх мар. Кĕрхи тулă кашни гектар пуçне вăтамран 30 центнер ытла, ыраш 20 центнер тухăç панă.
- Çумăр çуни чăрмантарчĕ, паян-ыранах çурхи культурăсен пуссисене тухма хатĕрленетпĕр, - каласа параççĕ хуçалăхри хастар механизаторсем - Сергей Наумов комбайнерпа унăн пулăшаканĕ Василий Уткин. Сăмах май, хуçалăхра кĕрхи тĕш тырă культурисем пиçсе çитейменнине кура "Енисей-1200" комбайн экипажĕ пĕр тапхăр кÿршĕри "Оринино" хуçалăхра вăй хунă. Кунта вĕсем 83 тонна кĕрхи тулă çапса тĕшĕленĕ. Халĕ тăван хуçалăхра акса ÿстернĕ тĕш тырăна çухатусемсĕр тата вăхăтра пуçтарса кĕртсе пÿлмене хывассишĕн тимлеççĕ.
Çурхи тулăна кăçал хуçалăхра 98 гектар, урпана 80 гектар çинчен пуçтарса кĕртмелле. Çак ĕçсене те лайăх йĕркелесе васкаварлă туса ирттерме палăртаççĕ çĕр ĕçченĕсем.
"Восток" хуçалăхра вырмапа пĕрлех ытти ĕçсем те ăнăçуллă пулса пыраççĕ. Хĕл кунĕсем валли выльăх апачĕ ытлă-çитлĕ янтăласа хăварас ыйтăва куç ытамĕнчех тытаççĕ. Нумай çул ÿсекен курăксене пĕрремĕш хут пĕтĕмпех çулса тирпейленĕ, сенаж планпа пăхнинчен икĕ хут нумайрах хывса хăварнă. Кĕрхи культурăсем акма çĕр хатĕрлесе çитернĕ.
Çĕртме сухи тунин пĕлтерĕшне те асрах тытаççĕ кунта. Пултаруллă механизаторсенчен пĕри Владимир Смелов 50 гектар çинче çĕртме сухаланă. Апла пулсан çитес çулхи тухăç валли никĕс хывас ĕçсене те япăх мар йĕркеленĕ хуçалăхра.
В. ШАПОШНИКОВ.