23 августа 2014 г.
Хальхи вăхăтра патшалăх пулăшăвĕсĕр пурăнма пултарайман çынсем сахал мар. Чылайăшĕ федераци е регион çăмăллăхĕсемпе усă курать. Çавăнпа та ку категорисене кĕрекенсене кирлĕ пулăшупа тивĕçтересси, пурăнма тата хăйсен кулленхи ыйтăвĕсене татса пама меллĕрех майсем туса парасси патшалăх политикин тĕп енĕсенчен пĕри пулса тăрать. Çак ĕç районта епле пулса пыни пирки Чăваш Республикин Сывлăх сыхлавĕпе социаллă аталану министерствин "Социаллă пулăшу мерисемпе тивĕçтерекен центр" хысна учрежденийĕн районти социаллă хÿтлĕх пайĕн пуçлăхне Валентина АНИКИНĂНА каласа пама, кăçалхи пĕрремĕш çур çул итогĕсемпе паллаштарма ыйтрăм:
- Тĕпрен илсен пирĕн пай район территорийĕнче пурăнакан çынсене - федераци тата регион шайĕнчи çăмăллăхсемпе усă куракансене - социаллă пулăшу парас тивĕçе пурнăçлать.
Кăçалхи июлĕн 1-мĕшĕ тĕлне илес пулсан, социаллă хÿтлĕх пайĕ урлă çăмăллăхсемпе, пособисемпе тата тĕрлĕрен тÿлевсемпе усă куракан граждансен çак категорийĕсене палăртмалла: Аслă Отечественнăй вăрçă участникĕсемпе инваличĕсем - 58 çын, вăрçăра вилнĕ çар çыннисен тăлăх мăшăрĕсем - 274 çын, тыл ĕçченĕсем - 1002 çын, ĕç ветеранĕсем - 5021 çын, çар операцийĕсен ветеранĕсем - 157 çын, реабилитациленисем - 39 çын, радиаци илнисем - 16 çын, донорсем - 90 çын, инвалидсем - 2251 çын, ачаран инвалидсем - 113 çын. Кунсăр пуçне ялсенче пурăнакан 1302 специалист ЕДВ (коммуналлă услугăсемшĕн тÿленине саплаштарма уйăхсерен паракан укçа тÿлевĕ) илсе тăрать.
Çулталăк пуçланнăранпа федерацин "Ветерансем çинчен" Саккунне пурнăçлама 1141,3 пин тенкĕпе усă курнă. Социаллă пулăшу илсе тăракансем 489 çын.
Федерацин "Раççей Федерацийĕн инваличĕсене социаллă хÿтлĕх парасси çинчен" Саккунĕпе килĕшÿллĕн 2364 çынна социаллă пулăшу мелĕсемпе тивĕçтертĕмĕр. Çавна валли пĕтĕмпе 10336,2 пин тенкĕ уйăрнă.
Раççей Федерацийĕн "Чернобыльти атом электростанцийĕнчи катастрофăна пула радици илнĕ граждансене социаллă пулăшу парасси çинчен" Саккунĕпе килĕшÿллĕн патшалăх пулăшăвĕпе усă куракансем 16 çын. Вĕсем валли пурăнмалли çурт-йĕрпе коммуналлă услугăсен тÿлевĕсене саплаштарма 37,5 пин тенкĕ уйăрса патăмăр.
Федерацин "Раççей Федерацийĕнчи юн тата унăн компоненчĕсен донорстви çинчен" Саккунĕпе килĕшÿллĕн 1023,4 пин тенкĕ уйăрнă. Çăмăллăх мелĕпе усă куракансем 90 çын.
Федерацин "Çар çыннисене укçа-тенкĕпе çителĕклĕ тивĕçтересси тата вĕсем валли уйрăм тÿлевсем уйăрасси çинчен" Саккунĕпе килĕшÿллĕн районта 66 çын пулăшу илсе тăрать. Иртнĕ çур çулта вĕсем валли 2136,1 пин тенкĕ уйăрса патăмăр.
Чăваш Республикин "Вăрçă çулĕсенчи тыл ĕçченĕсене тата ĕç ветеранĕсене социаллă пулăшу парасси çинчен" Саккунĕпе килĕшÿллĕн уйăрнă укçа-тенкĕн пĕтĕмĕшле сумми 37338,3 пин тенкĕпе танлашать. Вăл шутран укçа-тенкĕне çак категорисем валли уйăрнă:
- ĕç ветеранĕсемпе тыл ĕçченĕсене ЕДВ тÿлеме - 25888,65 пин тенкĕ (3985 çын)*
- телефонпа усă курнăшăн компенсаци тÿлеме - 783 пин тенкĕ (918 çын)*
- реабилитациленĕ çынсене ЕДВ тÿлеме - 559,7 пин тенкĕ (36 çын)*
- ялти специалистсене ЕДВ тÿлеме - 10106,9 пин тенкĕ (1302 çын).
Граждансенчен "Ĕç ветеранĕ" ят илме ыйтса çырнă заявленисем 71, "Чăваш Республикин ĕç ветеранĕ" ят илме - 132 заявлени йышăнтăмăр. Çав тапхăртах ĕç ветеранĕн удостоверенийĕсене 68 çынна тата Чăваш Республикин ĕç ветеранĕн удостоверенийĕсене 106 çынна патăмăр.
Патшалăх пулăшăвĕпе усă куракансене санаторипе курорт путевкисемпе тивĕçтересси те пирĕн ĕç шутнех кĕрет. Иртнĕ тапхăрта ĕç ветеранĕсене 9 çынна тата инвалидсене 10 çынна кун пек путевкăсемпе тивĕçтернĕ.
Федерацин "Ветерансем çинчен" Саккунĕпе килĕшÿл-лĕн учета илнĕ вăрçă участникĕсемпе вăрçăра вилнĕ çар çыннисен тăлăх мăшăрĕсене пурăнмалли çурт-йĕр туянма свидетельствăсем уйăрса паратпăр. 2009 çултан тытăнса çак вăхăтчен 250 ветеран хăйсен пурăнмалли çурт-йĕр условийĕсене лайăхлатма пултарчĕ. Вăл шутран 2009 çулта - 3, 2010 çулта - 144, 2011 çулта - 44, 2012 çулта - 37, 2013 çулта - 16, кăçал - 6. Çурт-йĕр условийĕсене лайăхлатма 2005 çулхи мартăн 1-мĕшĕ хыççăн учета тăратнисем халĕ вăрçă участникĕсем 6-ăн. Свидетельствăпа паракан укçа тÿлевĕн виçи 1050,66 пин тенкĕпе танлашать.
Чăваш Республикин "Ача пур çемьесене патшалăхăн хушма пулăшăвĕпе тивĕçтересси çинчен" Саккунĕпе килĕшÿллĕн 2014 çулхи июлĕн 1-мĕшĕ тĕлне 100 пин тенкĕпе танлашакан республикăри ача амăшĕн капиталне илме 50 заявлени йышăнтăмăр. Вĕсем пурте сертификатсен хуçисем пулса тăнă ĕнтĕ. Унпа усă курасси пирки 7 заявлени йышăннă, 6-шĕ усă курнă та.
Пирĕн пай пĕчĕк тупăшлă çемьесене регистрацилет. Кăçалхи пĕрремĕш çур çулта кун пеккисене 153 çемьене регистрацилерĕмĕр. 278 справка патăмăр, вăл шутран социаллă стипенди илме - 157, регистрацилени пирки - 117, урăх районта пурăнакан çемьене пĕчĕк тупăшлисен шутне кĕртсе регистрацилесси пирки - 4.
Çемьере виççĕмĕш ача çуралнисем Республика Министрсен Кабинечĕн йышăнăвĕпе уйăхсерен паракан 6166 тенкĕ тÿлеве тивĕçеççĕ.
Универсал электрон карттине илме 1172, карттăна илме килĕшменни пирки 181 заявлени йышăнтăмăр. 653 карттăна хуçисене валеçсе панă.
Тĕрлĕрен пособисемпе компенсацисем, укçа тÿлевĕсемпе субсидисем илсе тăракансем районта чылай. Социаллă хÿтлĕх пайĕ урлă вĕсене уйăхсерен укçа-тенкĕ сахал мар уйăрса паратпăр. Отчетлă тапхăрта республика тата федераци бюджечĕсенчен ача пособийĕсем валли 10783,7 пин тенкĕ, опекунсемпе попечительсем валли 1773,3 пин тенкĕ, ачасене хăйсен çемйине йышăннисем валли 786 пин тенкĕ, виççĕмĕш е хыççăнхи ача çуратакан çемьсем валли пĕр хут паракан укçа тÿлевĕ шучĕпе 4858,5 пин тенкĕ, ача çуратма хатĕрленекен тата çуратнă хĕрарăмсене пособи пама 15,2 пин тенкĕ, ачана пĕр çулталăк çурăна çитиччен пăхса пурăннăшăн тÿлеме 6845,1 пин тенкĕ, ача çуратнăшăн пĕр хут паракан пособи тÿлеме 835,6 пин тенкĕ, çарта тăракансен мăшăрĕсене пособи пама 192,1 пин тенкĕ, ĕçсĕррисене пытарма 178,6 пин тенкĕ, çурт-йĕрте пурăннăшăн тата коммуналлă услугăсемшĕн тÿлеме 2195,51 пин тенкĕ уйăртăмăр.
Тÿлевĕсене тивĕçлисем укçа-тенкĕне яланах вăхăтра илсе тăраççĕ. Ку енĕпе пăтăрмахсем ан пулччăр тесе социаллă хÿтлĕх пайĕн ĕçченĕсем хăйсенчен мĕн килнине пĕтĕмпех тума тăрăшаççĕ.
В. ШАПОШНИКОВ
калаçнă.