02 августа 2014 г.
Çын прависене хÿтĕлекен Чăваш Республикинчи
уполномоченнăйĕ пирĕн районта пулчĕ
"Ватă çынсем шанчăклă алăра", - терĕ çын прависене хÿтĕлекен Чăваш Республикинчи уполномоченнăйĕ Юрий Кручинин пирĕн район территорийĕнче вырнаçнă ветерансемпе ватă çынсен çурчĕсенче пулнă хыççăн. Кĕçнерни кун вăл хăйĕн пулăшаканĕпе Сергей Тихоновпа çак учрежденисенче пурăнакансен йăлари условийĕсемпе паллашрĕ. Мĕнле условисенче пурăнаççĕ вĕсенчи ватă çынсемпе чирлисем; Вĕсен саккунпа пăхнă прависене хĕсмеççĕ-и; Çак ыйтусем кăсăклантарчĕç вĕсене.
Чи малтан Юрий Сергеевич Чăваш Республикин Сывлăх сыхлавĕ тата социаллă аталану министерствин "Шомикри психоневрологи интернатĕнче" пулчĕ. Асăннă учрежденире пурĕ 125 çын сипленет. Вĕсенчен 42-шĕ - вырăнпа выртакансем. Ĕçлекенсем вара кунта 74-ăн. Апла пулин те интернат директорĕ Андрей Романов специалистсем çитменнине те палăртрĕ. Çав шутра - медицина ĕçченĕсем те.
Тĕрĕслеве вара çынсен прависене хÿтĕлекен уполномоченнăй прачечнăйран пуçларĕ. Унтан столовăйĕнчи, санузелти, çынсем пурăнакан корпусри лару-тăрупа паллашрĕ. Душ пÿлĕмĕ пур-и; Столовăйĕнчи менюра мĕн-мĕн пур; Чирлисем патне килекен хăнасене валли ятарлă пÿлĕм пур-и; Кунта пурăнакансемпе ĕçлекенсем хушшинче хутшăнусем мĕнлерех - пур ыйту та кăсăклантарчĕ ăна. Татса памалли ыйтусем пуррипе те кăсăкланчĕ.
- Пирĕн медицина пÿлĕмĕсем çукпа пĕрех. Чи малтан - шăл юсамалли пÿлĕм тата электрокардиографи пÿлĕмĕсем кирлĕ, - тет Андрей Михайлович.
Юрий Сергеевич чирлисемпе калаçрĕ. Ÿкерме юратакан хĕрарăм хăнана хăйĕн ĕçĕсемпе те паллаштарчĕ.
Ю. Кручинин чирлисен йăла ыйтăвĕсене лайăхлатассипе сĕнÿсем пачĕ. "Пĕтĕмĕшле кунта лару-тăру аван", - терĕ Юрий Сергеевич. Тепĕр хут кунта хĕлле пулма шантарчĕ.
Чăваш Республикин Сывлăх сыхлавĕ тата социаллă аталану министерствин Каршлăхри вăрçă тата ĕç ветеранĕсен çуртĕнче 25 çын пурăнать. Интернат ертÿçи Галина Мерлова вĕсем пурте пĕччен ватăсем пулнине палăртрĕ. Тăванĕсем пулсан та, аякра пурăнаççĕ. Пысăк çемьере ватăсем хăйсене питĕ аван туяççĕ. Çав кун шăпах пурте мунча кĕнĕччĕ. Йăлтах çемьери пек. Кунта пĕр-пĕрне тупса пĕр çемье çавăракансем те пур иккен. Çакăн пек мăшăр патне кĕрсе курчĕ хăна. Вĕсене телейлĕ вăрăм кун-çул сунчĕ. Ытти ватăсемпе те калаçрĕ.
Юрий Сергеевичпа Сергей Николаевич кунта та пур йăла пÿлĕмĕсене тĕрĕслерĕç, ватăсем пурăнакан пÿлĕмсенче те пулчĕç. "Пур çĕрте те тирпейлĕ те йĕркеллĕ. Кунта хĕрарăм ертÿçĕ пулни куç умĕнчех", - терĕ Юрий Сергеевич ку учрежденири лару-тăрăва пĕтĕмлетсе.
Ун хыççăн Юрий Сергеевич район администрацийĕн пуçлăхĕпе Р. Тимофеевпа район администрацийĕн ларусем ирттермелли пĕчĕк залĕнче граждансене хăйсен ыйтăвĕсемпе йышăнчĕç. Унта пынисем - çурт-йĕр условийĕсене лайăхлатмалли, çĕр, йăлара тĕл пулакан тата саккуна пăсса ĕçрен кăларнă хыççăн каялла вырнаçассипе çыхăннă ыйтусене хускатрĕç.
Çак кун çын прависене хÿтĕлекен Чăваш Республикинчи уполномоченнăйĕ Юрий Кручинин район администрацийĕн пуçлăхĕпе Ростислав Тимофеевпа Чăваш Республикин Сывлăх сыхлавĕ тата социаллă аталану министерствин Йÿçкассинчи ватă çынсен çуртĕнче те пулса курчĕ. Столовăйĕнче те, актовăй залра та, библиотекрăра та, медицина пÿлĕмĕсенче те - пур çĕрте те йĕркеллĕ.
Ветерансен çурчĕн ертÿçи Валентина Шивирева ватă çынсем тулли пурнăçпа пурăннине палăртрĕ. Яланах кунта артистсем концертпа килеççĕ. Тĕрлĕ культурăллă-массăллă мероприятисем йĕркелеççĕ. Нумаях пулмасть пурте пĕрле вырăнтан тухса уçă сывлăшра кану кунне йĕркеленĕ.
- Пире кунта çав тери килĕшет, - теççĕ кунта пурăнакансем.
Йÿçкассинчи ветерансен çуртĕнчи 50 çынна кунта йĕркеллĕ пăхнине хăй куçĕпе курса ĕненчĕ Ю. Кручинин.
- Чăнипех те, ватă çынсене пирĕн республикăра лайăх пăхаççĕ, - терĕ вăл.
Л. Павлова.