23 июля 2014 г.
Çĕр ĕçченĕшĕн питех те ответлă та канăçсăр тапхăр çитсе килчĕ. Уйрăм хуçалăхсем хăйсен "хир карапĕсене" кĕрхи культурăсен пуссисене илсе тухрĕç ĕнтĕ. «Путь Ильича» агрофирмăпа А. Пихтеровăн хресчен (фермер) хуçалăхĕнче, «Оринино» хуçалăхра вырма вăй илет. Паян-ыран районта вырма ĕçĕсем массăллăн пуçăнмалла. Кунпа пĕрлех вара пĕрлешÿллĕ хуçалăхсемпе хресчен (фермер) хуçалăхĕсенче курăксене иккĕмĕш хут çулас, выльăх апачĕ хатĕрлес ĕçсене те туса пыма тивет.
Июлĕн 21-мĕшĕ тĕлне районĕпе нумай çул ÿсекен курăксене 4601 гектар (72 процент) çулнă.
Районĕпе утă хатĕрлемелли плана 76,9 процент тултарнă, пĕтĕмпе ăна 5484 тонна типĕтсе янтăланă.
Сенаж 10491 тонна (89,3 процент), силос 2860 тонна (11,2 процент) хывса хăварнă.
Кăçал кĕрхи культурăсене районĕпе 5000 гектар çинче акса хăварма палăртнă. Кĕр аки ирттерме çак вăхăта 3845 гектар (76,9 процент) çĕр хатĕрлеме ĕлкĕрнĕ. Çак ĕçе вĕçленисем шутĕнче Е. Андреев яч. хис., "Герой", Ильич яч. хис., "Свобода", Чкалов яч. хис. ял хуçалăх производство кооперативĕсем, В. Бархаткинăн, А. Толстовăн, А. Афанасьевăн, А. Пихтеровăн, М. Фасхутдиновăн хресчен (фермер) хуçалăхĕсем.