30 января 2013 г.
Пуçлăхсем пухăнаççĕ
Пирĕн районта ыран республикăри хула-район центрĕсенчи ял тăрăхĕсен пуçлăхĕсем пухăнаççĕ. Республикăри район центрĕсен тăрăхĕсен палатин ларăвĕ иртет. Унта хутшăнакансем Муркаш районĕнчи социаллă пурнăçпа культура объекчĕсене çитсе кураççĕ, Муркашри Парковая урамра нумай хваттерлĕ çуртсем тăвасси мĕнле пынипе, В. Шишкин уйрăм предприниматель пластик чÿречесем, чикĕллĕ яваплăхлă «СпецТранс» обществăра çĕр пăраламалли установкăсем тăвассине йĕркеленипе паллашаççĕ, ачасемпе çамрăксен В. Егорова ячĕллĕ Муркашри спорт шкулĕнче, Муркашри вăтам шкулта пулаççĕ.
Ларăвăн теори пайĕ «Сывлăх» физкультурăпа спорт комплексĕнче иртет. Кунтах ял тăрăхĕсен пуçлăхĕсен командисем волейболла выляссипе вăй виçĕç, бассейнра шыва кĕрĕç.
Кун йĕркинче – тарифсен ыйтăвĕ
Район администрацийĕн пуçлăхĕ Ростислав Тимофеев январĕн 28-мĕшĕнче ял çыннисене ĕçмелли шывпа тивĕçтерекен предприятисен ертÿçисемпе канашлу ирттернĕ. Сăмах çак услуга тарифĕсене çирĕплетесси пирки пынă.
Районĕпе шыв скважинисем 380 пулсан, ял тăрăхĕсен территорийĕсенче вĕсем 164. Вĕсене регистрацилессипе ĕçсене хăвăртлатас пулать.
Ростислав Николаевич çавна палăртнă. Шывпа тивĕçтерекен предприятисен çак услуга йĕркине хатĕрлесе çитермелле. Çавна валли чи малтанах лицензи кирлĕ. Ыйтăвăн пĕлтерĕшĕ пĕчĕк мар. Лицензи илнĕ «Оринино», Ильич яч. хис., Суворов яч. хис., «Свобода» хуçалăхсен, «Моргаушский» сĕт завочĕн вара çак кунсенчех тарифсене çирĕплетме документсене хатĕрлесе çитермелле.
Канашлура çавăн пекех нумай хваттерлĕ çуртсене юсассипе, çынсене юхăнчăк çуртсенчен куçарассипе, инженери инфраструктурисене модернизацилессипе регион программисене хутшăнассин, районăн 2012 çулхи социаллă пурнăçпа экономика аталанăвĕн итогĕсемпе ирттерекен савăнăçлă пухăва хатĕрленессин ыйтăвĕсене те тишкернĕ.
Анаткассисене çитекен çук
Çак кунсенче Суворов яч. хис. ял хуçалăх производство кооперативĕнче талăксерен кашни ĕне пуçне вăтамран 18,1 килограмм сĕт суса илеççĕ. «Путь Ильича» агрофирмăра, Е. Андреев яч. хис. хуçалăхра та кăтарту 12 килограмм ытла. Çав вăхăтрах «Ударник», «Передовик», Чапаев яч. хис. хуçалăхсенче кăтарту 8 килограма та çитеймест.
Районĕпе сумалли ĕнесен хисепĕ 2032 пуç. Талăкра вĕсенчен пĕтĕмпе 21238 килограмм сĕт суса илеççĕ. Ку вăл пĕр ĕне пуçне вăтамран 10,5 килогрампа танлашать.
Вăхăтлăх ĕç тупса панă
Паллă ĕнтĕ, хальхи вăхăтра инвалидсен, пĕччен тата нумай ачаллă çемьесенчи, çул çитмен ачасемпе инвалид ача пăхса ÿстерекен ашшĕ-амăшĕн, ирĕкрен хăтарнă вырăнтан таврăннисен, 18 çула çитменнисен ĕç вырăнĕ тупма çăмăлах мар. Районти ĕçпе тивĕçтерекен центрта социаллă пĕлтерĕшлĕ çак ыйтăва куç ытамĕнчен вĕçертмеççĕ. Иртнĕ çул ку категорисене кĕрекенсене 6 çынна вăхăтлăх ĕç вырăнĕ тупса пама май килнĕ. Кунсăр пуçне центр вĕсене уйăхсерен 1675 – 1700-шер тенкĕ тÿлесе тăнă.
Кĕнеке хаклавĕ – Калайкассинче
Иртнĕ çулталăк пĕтмĕшĕнче Василий Пузырев педагогăн (Ÿрмек Ваçли псевдонимпа пичетленет) сăвăсен «Сартон» кĕнеки пичетленсе тухнăччĕ. Кĕнекене «Сартон» тата «Пул эс арçын» поэмăсем, сăвă ярăмĕсем, юптарусемпе кулăшсем кĕнĕ.
Асăннă кĕнекен хаклавне (презентацине) Калайкасси шкулĕнче февралĕн 8-мĕшĕнче ирттерме палăртнă, 14 сехетре пуçланать. Хăйĕн пултарулăх ĕç-хĕлне сума сăвакансене автор хапăл туса йыхравлать.
В. ШАПОШНИКОВ
хатĕрленĕ.