12 июля 2014 г.
- Ялсенче кун пек çулсем пулсан пурăнма пулать, - терĕ Чăваш Республикин транспорт тата çул-йĕр министрĕ Владимир Филиппов Москакасси урамĕнчи вак чул сарса юсанă çула курсан. 388 метр тăршшĕ урама "Стройка-21" чикĕллĕ яваплăхлă общество ĕçченĕсем юсанă. Халь ĕнтĕ кунта кĕрлĕ-çурлă вăхăтра хăть машинпа, хăть çуран çÿреме питĕ меллĕ. Пĕтĕмпе вара çула тума 1 млн. 188 пин те 119 тенкĕ тухса кайнă.
Владимир Иванович район администрацийĕн пуçлăхĕпе Р. Тимофеевпа тата унăн çумĕпе - капиталлă строительство тата общество инфрастурктурине аталантарассин пай ертÿçипе В. Никитинпа иртнĕ ытлари кун районта çулсем юсанă çĕре çитсе курчĕ.
Оринин ял тăрăхĕнче кăçал харăсах 2 ялта çул юсанă. Чамăш урамĕнчи 260 метр çула июнь уйăхĕнче юсарĕç, Вăрманкасси урамĕнчи 650 метр тăршшĕ çула - май уйăхĕнче. "Дорстрой" чикĕллĕ яваплăхлă общество строителĕсен ĕçĕпе ял тăрăхĕн пуçлăхĕ А. Волков та кăмăллă. Министр икĕ ялĕнче те вак чул сарнă çула епле юсанине çул пуçĕнчен вĕçне çитичченех пăхса тухрĕ. Чулпа хăйăрне миçешер сантиметр янипе кăсăкланчĕ. Кунта курнипе те кăмăллă пулчĕ.
Çурлатринче вара 1.026 метр тăршшĕ çĕнĕ çул тăваççĕ. Çул тума пĕтĕмпе 20 млн. та 747 пин тенкĕ кирлĕ пулсан, пĕлтĕр 4 млн. тенкипе усă курнă. Кăçал вара 11 млн. та 208 пин те 515 тенкĕлĕх ĕç тумалла. Министр пынă чухне те кунта ĕç "вĕресе" кăна тăратчĕ. Автомашина çаврăнмалли вырăна туса çитеретчĕç.
- Çакăн хыççăн тÿрех асфальт хума пуçлатпăр. Харăсах çак ĕçе тротуар çинче те пурнăçлатпăр, - терĕç строительсем. 2 эрнере ку ĕçе вĕçлеме тĕллев лартнă. Министр объекта хăçан туса пĕтерессипе те интересленчĕ.
"Муркаш-Турай-Сура" çул çинче вара "Чувашавтодор" тĕплĕ юсав ĕçĕсем тăвать. Çак çул пирĕн районшăн питĕ пĕлтерĕшлĕ. Пурĕ 24,02 çухрăм тăршшĕскер районти ялсене çыхăнтарать. Çавăн пекех вăл "Автанкасси-Муркаш-Козьмодемьянск" тата "Сура" çулсем çине "илсе тухать".
2008 çулта кунта 4,5 çухрăма юсанă. Кăçал тата 6,06 çухрăм тăршшĕне тĕплĕн юсамалла. "Чувашавтодор" пĕтĕм ĕçе 116 530 247 тенкĕпе туса ирттерет пулсан, пĕлтĕр 11 млн. тенĕклĕх пурнăçланă. Кăçал пурнăçламалли ĕçсем валли вара - 42 млн. тенкĕ. Асăннă предприяти представителĕ Александр Павлов каланă тăрăх кашни кун 2 экскаватор, 3 каток тата 13 автомашина ĕçлет. Июлĕн 14-15-мĕшĕсенче вара асфальт хуракан автомашина та ĕçе пуçăнать. "Строительсен ĕçлес кăмăлĕ пысăк. Умри тĕллевсене вăхăтра пурнăçлатпăр", - тет А. Павлов.
Çул юсас ĕçсем районта çакăнпа кăна вĕçленмеççĕ. Ялсенчи çулсене кăна кăçал 4,3 çухрăм юсама палăртнă. Пĕтĕмпе çакна валли 10 млн. та 716 пин те 288 тенкĕ укçа уйăрнă. Çав шутран 4 млн.198 пин тенки - республика бюджетĕнчен, 6 млн. та 518 пин те 288 тенки - вырăнти бюджтран.
Унсăр пуçне район шайĕнчи çулсене юсама 5 млн. та 001 пин те 083 тенкĕ уйăрнă: республика бюджетĕнчен - 4 млн. та 073 пин те 510 тенкĕ, вырăнти бюджетран - 927 пин те 573 тенкĕ.
Пурĕ вара районти çул-йĕр фондĕнче - 52 млн. та 528 пин тенкĕ.
"Кăçал 7 картиш территорийĕнчи пурĕ 3367 тăв. метр чухлĕ çула юсаса пĕтертĕмĕр. Çавăн пекех çулсем çинчи паллăсене те туса пĕтернĕ. Çĕнĕ вĕренÿ çулĕччен вара вĕренÿ учрежденийĕсем патĕнчи çуран çÿрекенсен çул урлă каçмалли вырăнĕсене палăртса пĕтермелле. Çавăн пекех транспорт çаврăннă вырăнсене йĕркене кĕртсе çитерессипе ĕçлетпĕр", - терĕ малалла район администрацийĕн пуçлăхĕ Р. Тимофеев районти çул-йĕр ыйтăвĕсем епле пурнăçланнипе паллаштарнă май. Ростислав Николаевич çавăн пекех "Мăн Сĕнтĕр-Мăн Хураçка" çула юсассипе хатĕрленÿ ĕçĕсем пынине те палăртрĕ. Ытти объектсем çинче те чарăнса тăчĕ.
Республикăн транспортпа çул-йĕр министрĕ В. Филиппов Муркаш районĕнче çул-йĕр ыйтăвĕсемпе çине тăрса ĕçленине хăй куçĕпе курса ĕненчĕ. Мĕн курнипе кăмăллă юлчĕ.
Л. ПАВЛОВА.