05 июля 2014 г.
Республикăри Шалти ĕçсен министерствин професси хатĕрленĕвĕн центрĕнче "Профессире чи лайăххи" ята çĕнсе илессишĕн республика конкурсĕн иккĕмĕш тапхăрĕ иртрĕ. Унта Чăваш Енри 25 участковăй хутшăннă. Шалти ĕçсен министерствин пирĕн районти пайĕнче вăй хуракан Николай Кудряшов участковăй та конкурсра лайăх кăтартусемпе палăрнă.
Николай Евгеньевич шалти ĕçсен пайĕнче 2001 çултанпа ĕçлет. Ĕç биографине вăл патрульпе пост службин сотрудникĕнчен пуçланă, 2009 çултанпа ăна Юнкă тата Ярославка ял тăрăхĕсенчи участковăй пулма шаннă. Хальхи вăхăтра Николай Евгеньевич Чуманкасси тата Турай ял тăрăхĕсенче тимлет, унпа пĕрлех полици сотрудникĕн ытти пур тивĕçне те ответлăхпа пурнăçлать.
- Конкурсра темĕн тĕрлĕ тупăшу та пулчĕ. Эпир служба, техникăпа криминалистика тата медицина хатĕрленĕвĕпе тестри ыйтусене хуравларăмăр. Макаров пистолетĕнчен тĕл пемелле, кĕрешÿ мелĕсене кăтартса памалла пулчĕ. Ÿт-пÿ аталанăвне тĕрĕслекен тупăшусенче вăй хăнăхтарăвĕсем турăмăр, кросс та пулчĕ,- каласа парать ăмăрту пирки полицин аслă лейтенанчĕ.
Конкурсра 107 балл пухса Тăвай районĕнчи участковăй пĕрремĕш вырăна тухнă, иккĕмĕш вырăнта - Çĕнĕ Шупашкарти участковăй (94 балл). Пирĕн участковăй 91 балл пухса виççĕмĕш вырăн çĕнсе илнĕ.
Н. Николаева
сăн ÿкерчĕкĕ.