05 июля 2014 г.
Уяр вăхăтпа çумăрлă кунсем ылмашăнса тăнă вăхăт. Çанталăк условийĕсене пăхмасăрах ял хуçалăх производство кооперативĕсемпе хресчен (фермер) хуçалăхĕсенче ĕçлекенсем иртен пуçласа таврана каç сĕмĕ çапичченех улăх-çаранта. Выльăх апачĕ янтăлама пулакан меллĕ вăхăтпа туллин усă курса хресчен хĕл кунĕсене хатĕрленет.
Курăк пуссисенче
Выльăх-чĕрлĕх апатне хĕл валли ытлă-çитлĕ хатĕрлеме пĕрлешÿллĕ хуçалăхсемпе хресчен (фермер) хуçалăхĕсенче пĕтĕмпе 6380 гектар нумай çул ÿсекен курăксен пуссисем, 1457 гектар пĕр çул ÿсекен курăксем пур. Асăннă хуçалăхсен ĕçченĕсем ĕнерхи куна нумай çул ÿсекен курăксене пурĕ 2985 гектар çулнă. Ку ĕçе "Путь Ильича" агрофирмăра, Чкалов ячĕллĕ тата Чапаев яч. хис. ял хуçалăх производство кооперативĕсенче вĕçленĕ. Юлашки кунсенчи çумăрсем курăк кайăвне çĕклентерни асăннă лаптăксенче ут çи вĕçленменни пирки калать.
Утăра
Район администрацийĕн экономикăпа АПК аталанăвĕн пайне вырăнсенчен тăратнă оперативлă кăтартусене пăхсан çĕр ĕçченĕ пур харпăрлăх тытăмлă хуçалăхсенче те типĕ утă хатĕрлессине кунсерен ÿстерсе пырать. Утă уйăхĕн 4-мĕшĕ тĕлне районти ял хуçалăх предприятийĕсем пĕтĕмпе 3813 тонна (63,87 процент) курăк типĕтсе управа пухса хунă. Суворов яч. хис, Е. Андреев яч. хис., Чкалов яч. хис., Чапаев яч. хис. ял хуçалăх производство кооперативĕсенче утăна ытлă-çитлĕ янтăлама ĕлкĕрнĕ те.
Сенаж Çинче
Планпа пăхнă 14200 тонна сенажран хальлĕхе 2800 тоннине траншейăсене хывнă. Тата силос 884 тонна пур. Сенаж-силос янтăлассипе кăçал "Герой" (1000 тонна), "Ударник" (750 тонна), "Передовик" (600 тонна), "Оринино" (720 тонна), "Путь Ильича" (450 тонна), "Восток" (164 тонна) хуçалăхсем ыттисенчен çаврăнăçуллăрах ĕçлеççĕ.
Хирсенче выльăх апачĕ янтăлассипе ĕçсем малалла пыраççĕ.
А. БЕЛОВ хатĕрленĕ.