02 июля 2014 г.
Эсир сăн ÿкерчĕкре куракан ушкăн - патшалăх çул-йĕр хăрушсăрлăх инспекцийĕн районти уйрăмĕн сотрудникĕсем (сулахайран сылтăмалла): Валерий Димитриев, Юрий Васильев, Михаил Блинов, Александр Щербаков, Любовь Павлова тата уйрăм пуçлăхĕ Сергей Иванов. Çул-йĕр çинче хăрушсăрлăхпа тивĕçтересси çул-йĕр хăрушсăрлăх инспекцийĕн сотрудникĕн тивĕçĕ пулнине тĕпе хурса вăй хураççĕ вĕсем, хăйсене шаннă ĕçе ответлăхпа пурнăçлаççĕ.
- Пирĕн ĕç çын пурнăçĕпе тачă çыхăннă. Çавăнпа та çынсем çул-йĕр çинче хăйсене лăпкă туйма пултарччăр тесе эпир водительсемпе çуран çÿрекенсем правилăсене ан пăсчăр тесе куллен тимлетпĕр. Çул çинчи йĕркелĕхе сыхлатпăр кăна мар, ача сачĕсене çÿрекенсенчен пуçласа аслă ÿсĕмри çынсем таранах - кампа кăна асăрхаттару калаçăвĕ ирттерместпĕр пулĕ. Çул-йĕр вара тимлĕхе, асăрханулăха килĕштерет, - теççĕ инспекторсем.
Каламасăрах паллă: ГИБДД сотрудникĕсен пĕчĕк ушкăнĕ районăн кашни кĕтесĕнчи çул çине темĕнле тăрăшсан та çитсе çитереймест. Апла пулсан пирĕн хамăрăн çул-йĕр правилисене пăхăнмалла, асăрхануллă пулмалла.
Н. Николаева сăн ÿкерчĕкĕ.