02 июля 2014 г.
"Çак уяв çул ÿсĕмĕпе çамрăксем тесе палăртнисен кăна мар, вăл - чунпа çамрăк çынсен уявĕ те", - çапла палăртрĕ Раççейри çамрăксен кунне Муркаша паллă тума пухăннисене саламласа район администрацийĕн пуçлăхĕн пĕрремĕш çумĕ В. Ананьев. Владислав Кириллович каланă тăрăх паянхи кун пирĕн районта 7 пин ытла çамрăк: пĕрисем шкулта вĕренеççĕ, теприсем професси пĕлĕвне илеççĕ, виççĕмĕшĕсем вара ĕçре тимлеççĕ.
Кашни çамрăк район аталанăвне хăйĕн тÿпине хывать, вĕсен йышĕнчи чи хастар та пултаруллисене шăпах çак уявра район администрацийĕн Хисеп грамотисемпе, Тав çырăвĕсемпе чысларĕç. Ĕçлекен çамрăксем пĕрин хыççăн тепри сцена çине хăпарчĕç: пултаруллисемпе çапла паллашма май пулчĕ.
Кăçал шкултан "пиллĕксемпе" кăна вĕренсе тухакансемшĕн те уявра пăлхануллă самант пулчĕ: грамотăсене тивĕçнĕ выпускниксене пурте тăвăллăн алă çупса саламларĕç. Вĕсем кăçал 24-ăн: Муркаш шкулĕнчен вĕренсе тухнă Анастасия Авдеева, Андрей Иванов, Сергей Коричев, Анастасия Николаева, Ирина Николаева, Анастасия Ошманова, Алексей Романов, Елена Скворцова* Мăн Сĕнтĕрти шкултан вĕренсе тухнă Анна Воробьева, Марина Николаева, Диана Парфенова* Калайкассинчи вăтам шкултан вĕренсе тухнă Кристина Арчикова, Екатерина Замятина, Екатерина Шишокина* Çатракассинчи шкултан вĕренсе тухнă Надежда Димитриева, Диана Мочалова, Алена Семенова* Чуманкасси шкулĕнчен вĕренсе тухнă Анна Герлова, Елена Иванова, Елена Саватеева, Андрей Петров* Йÿçкасси шкулĕнчен вĕренсе тухнă Николай Васильев, Денис Иванов, тата Эдуард Тихонов. Район администрацийĕн вĕренÿ, çамрăксен политики тата физкультурăпа спорт пайĕн ертÿçи З. Дипломатова вĕсене уйрăммăн саламласа малашлăхра ăнăçусем сунчĕ.
Çанталăк ăмăр тăни уяв хаваслăхне чакармарĕ. Шкултан вĕренсе тухакансен балĕн "патшипе" "патша майрине" те суйларĕç. Сцена çинчи пултарулăхне, çынсемпе хутшăнма пĕлнине тĕрĕсленĕ хыççăн çак чаплă ята Муркаш шкулĕнчен вĕренсе тухнă Анастасия Николаевăпа Артем Григорьев тивĕçрĕç.
Уяв каçĕнче хĕрсем шкултан вĕренсе тухакансен бал платйисемпе тата прическисемпе паллаштарчĕç. Шел пулин те, кĕлетке çинче ÿкерессипе ирттерме палăртнă конкурс пулаймарĕ - çумăр пит çинчи сăрăсене "çуса тасатсах" тăчĕ. Çапах та пухăннисен хăпартлануллă кăмăлне вăл пăсаймарĕ, мĕншĕн тесен Муркашри "Фантазия" тата "Вдохновение" ташă ушкăнĕсем, Алена Филипповăпа Ангелина Крючкова, Москакасси ял тăрăхĕнчи Даша Макарова хăйсен пултарулăхĕпе хавхалантарсах тăчĕç.
Уяв каçĕ çĕрлеччен тăсăлнă ташă каçĕпе вĕçленчĕ.
Н. Николаева.