28 июня 2014 г.
Улăх-çаран пушанать
Иртнĕ эрне кун тĕлне районти тĕрлĕ харпăрлăх формиллĕ хуçалăхсем нумай çул ÿсекен курăксене 2036 гектар (32 процент) çулнă. Ут çи ĕçĕ "Путь Ильича" агрофирмăра, Суворов яч. хис. пĕрлешÿллĕ хуçалăхра, Чкалов яч. хис. тата Чапаев яч. хис. хуçалăхсенче кал-кал пынине палăртмалла. Вĕсемпе пĕрлех А. Мерлов, В. Горбунов, В. Бархаткин тытса пыракан хресчен (фермер) хуçалăхĕсенче ĕçлекенсем те нумай çул ÿсекен курăксен анисенче кунсерен пысăк калăпăшлă ĕç туса пыраççĕ.
34 процент утă пур
Ял хуçалăх производство кооперативĕсемпе хресчен (фермер) хуçалăхĕсенче - ут çи вăй илнĕ вăхăт. Оперативлă кăтартусене пăхсан çĕртме уйăхĕн 26-мĕшĕ тĕлне çĕр ĕçченĕ район шайĕнче утă хатĕрлемелли плана 34 процент тултарнă. Çак ĕçе Суворов яч. хис. ял хуçалăх производство кооперативĕнче ыттисенчен лайăхрах йĕркеленĕ. Çатракассисемпе Анаткассисем асăннă кун тĕлне утăна 441 тонна (110,3 процент) типĕтсе янтăланă. Ут çи çавăн пекех "Восток", Чкалов яч. хис., Е. Андреев яч. хис., "Свобода" пĕрлешÿллĕ хуçалăхсемпе "Путь Ильича" агрофирмăра кал-кал пырать.
Сенаж хываççĕ
Районĕпе планпа 11850 тонна сенаж хывмалла пулсан, ĕнерхи кун тĕлне "Герой" ял хуçалăх производство кооперативĕпе "Путь Ильича" агрофирмăра çеç çак ĕçе тытăннă. Шурчасем сĕт ферминче асăннă куна 500 тонна (77 процент) сенаж янтăланă. Шаптаксем вара çак хушăра паха апата 450 тонна (10 процент) янтăлама хевте çитернĕ. Çывăх кунсенче ку ĕçсем ытларах вăй илесси, ытти хуçалăхсем те çак ĕçе кÿлĕнесси пирки иккĕленÿ çук.
Хуçалăхсен кăçал çавăн пекех 23650 тонна силос янтăламалла. Ку ĕçе "Ударник" хуçалăхра пуçланă.
А. БЕЛОВ хатĕрленĕ.