25 июня 2014 г.
Иртен пуçласа каçчен ĕçре ирттерекеншĕн вăхăт иртни сисĕнмест. Хуçалăхсем хушшинчи "Моргаушская" строительство организацийĕ те кăçал 55 çул тултарчĕ. Раççей Федерацийĕпе Чăваш Республикин тата районăн ĕç планĕсене палăртнă вăхăтра пурнăçлассишĕн вăй хурать коллектив. Кунта ĕçлекенсем, ытларах çамрăксем пулин те, аслисен ĕç йĕркине çирĕп алăра тытса пыни курăнать - уйрăмах пуçланă ĕçсене кĕске вăхăтра тата пахалăхлă пурнăçлассипе. Çакă вăл кунти çамрăксем малашлăха пăхса аслă юлташĕсен ĕç опытне туллин алла илни пирки калать.
- Хамăр пуçăннă ĕç йĕрки çамрăксен аллинче те пурнăç уттинчен тăрса юлманни савăнтарать. Эпир вĕсем пурнăçланă ĕçсене пăхса паян организаци аталанăвĕшĕн хĕпĕртетпĕр. Çĕнĕрен çĕкленекен нумай хваттерлĕ çуртсене çамрăксем суйлани, çуртсен кил хушшийĕсенче ача-пăча сасси янăрани районăн социаллă пурнăçпа экономика аталанăвĕ малалла утнине çирĕплетет, - терĕ ĕçтешĕсем çине пăхса асăннă организацире 38 çул штукатур-малярта тата çак ĕçченсен бригадирĕнче ĕçленĕ Венера Золототрубова (сăн ÿкерчĕкре сулахайран 3-мĕшĕ). Унăн ĕçтешĕсем (сулахайран сылтăмалла) Т. Миронова (каменщицăра чылай ĕçленĕ), А. Васюхина экономист, Т. Тимофеева штукатур-маляр (ĕç стажĕ 37 çул, паян та кулленех ĕçре), М. Романова штукатур-маляр (кăçал тивĕçлĕ канăва кайрĕ), Л. Хошкина каменщица (ĕç стажĕ 38 çул, паян та кулленех ĕçре) Венера Анатольевна сăмахĕпе килĕшнине пĕлтерчĕç.
"Моргаушская" МСО çĕкленĕ çуртсем паян района илем кĕртеççĕ. Строительсен алли юсаса хăт кĕртнĕ çуртсем çине район çыннисем тата Муркаш хăнисем ытараймасăр пăхаççĕ.
А. БЕЛОВ сăн ÿкерчĕкĕ.