25 июня 2014 г.
Техникумсемпе колледжсене, аслă шкулсене вĕренме кĕрекенсенчен заявленисем илес тапхăр июнĕн 20-мĕшĕнче пуçланчĕ.
Пирĕн республикăра хальхи вăхăтра профессин вăтам пĕлĕвне 27 професси патшалăх организацийĕнче, патшалăхăн мар 3 тата аслă шкулсен 2 филиалĕнче илме пулать. Ку çул бюджет вырăнĕсене 8 пин ытла абитуриент вĕренме кĕме пултарать, çакă иртнĕ çулхинчен 16 процент ытларах. Вĕренме кĕрекенсен ĕç хучĕсен пакечĕ çак документсенчен тăрать: заявлени, паспорт, аттестатăн оригиналĕ е копийĕ тата 4 сăн ÿкерчĕк. Хăш-пĕр вĕренÿ заведенийĕсенче пĕлÿ енне кура медицина справки те кирлĕ. Куçăмлă майпа вĕренме кĕрес текенсенчен заявленисене августăн 15-мĕшĕччен йышăнаççĕ.
Республикăри аслă шкулсене вĕренме кĕрес текенсем валли кăçал 3,5 пин бюджет вырăнĕ пурри паллă. Ку пĕлтĕрхинчен 6,6 процент ытларах. Заявленисем йышăнас тапхăр июлĕн 25-мĕшĕччен пырать. Специальноçсемпе тата вĕренме кĕмелли условисемпе аслă шкулсен сайчĕсенче паллашма пулать. Аса илтеретпĕр, абитуриент вĕренме кĕме харăсах 5 аслă шкул (виçĕ специальность таран) суйласа илме пултарать. Документсемпе пĕрле кăçал патшалăх пĕрлехи экзаменне тытни çинчен калакан свидетельство тăратмалла мар: вăл федерацин пĕрлехи базинче упранать. Пултарулăхпа çыхăннă специальноçсене суйласа илекенсен хушма конкурссене те хутшăнма тивĕ (аслă шкулсем хăйсем ирттереççĕ).
Выпускниксен хăш-пĕр категорийĕсем çăмăллăхсемпе усă курма пултараççĕ. Шкул ачисен Пĕтĕм Раççейри олимпиадин юлашки тапхăрĕн çĕнтерÿçисемпе призерĕсем тата тĕнче шайĕнчи предмет олимпиадисене хутшăннă Раççейĕн пĕрлештернĕ командисен членĕсем, вĕренме кĕме физкультурăпа спорт енне суйласа илнĕ Олимп, Паралимп тата Сурдлимп вăййисен призерĕсемпе чемпионĕсем аслă шкулсене экзаменсемсĕрех кĕме пултараççĕ.
Инвалид çамрăксем, 1 тата 2 ушкăн инваличĕсем, ачаран инвалидсем, çар суранне пула инвалид пулнисем, хĕсметре чирлесе кайнисем тата тăлăх ачасемпе ашшĕ-амăшĕн тимлĕхĕсĕр юлнă ачасем квотăпа палăртнă бюджет вырăнĕсенче вĕренме пултараççĕ.
Аслă шкулсене вĕренме кĕнĕ чух темиçе абитуриентăн пĕр пек балл пулсан ыттисенчен малтан тăлăх ачасене тата ашшĕ-амăшĕн тимлĕхĕсĕр юлнисене, инвалид ачасене тата 1, 2 ушкăн инваличĕсене, шалти ĕçсен органĕсенче вăй хурса пуç хунă сотрудниксен ачисене, уголовлă ĕç пурнăçлакан системăра, наркоконтроль службинче, пушара хирĕç кĕрешекен службăра ĕçлекенсен ачисене вĕренме илме ирĕк пур.
Çăмăллăхсемпе усă куракансен çак майпа пĕр аслă шкула тата пĕр специальноçпа кăна вĕренме кĕме юрать, ыттисене - пуринпе те пĕр пек условисемпе.
Физикăпа тата математикăпа патшалăх пĕрлехи экзаменĕсенче 70 тата ытларах балл пухнă, хамăр республикăри аслă шкулсене вĕренме кĕнĕ студентсене пĕрремĕш курсра Чăваш Республикин Пуçлăхĕн хушма стипендине - 2 пин тенкĕ тÿлеççĕ.