18 июня 2014 г.
2014 çул Муркаш район çыннисемшĕн уйрăмах асра юлмалли çулталăк: Муркаш районĕ йĕркеленнĕренпе 70 çул çитрĕ. 70 çул хушши Муркашсем республикăра ырă ятлисен шутĕнче. Кăçал та вĕсем çитĕнÿ çулĕнчен айккине пăрăнмаççĕ, çакна çак тĕслĕхсем те çирĕплетеççĕ.
Кăçалхи 1-мĕш кварталта республикăри муниципалитет йĕркелĕвĕсем 2013 çулта общество финансĕсемпе мĕнле усă курнине пĕтĕмлетрĕç. Унпа килĕшÿллĕн пирĕн Муркаш районĕ 2-мĕш вырăн йышăннăччĕ.
Нумаях пулмасть района тепĕр ырă хыпар çитрĕ: хальхинче Муркашсем Раççей шайĕнче черетлĕ çĕнтерÿ туни çинчен. "Общество финансĕсемпе усă куракан чи лайăх муниципалитет йĕркелĕвĕ" ятпа иртнĕ Пĕтĕм Раççейри 7-мĕш конкурсра 2013 çул пĕтĕмлетĕвĕпе "За высокое качество управления бюджетными расходами" номинацире Муркаш районĕ çĕнтерчĕ, Диплома тивĕçрĕ.
Районти Акатуй умĕн тепĕр хыпар савăнтарчĕ: пирĕн районти 7 хуçалăх - "Моргаушская" чăх-чĕп фабрики" акционерсен уçă обществи, "Путь Ильича" АФ" чикĕллĕ яваплăхлă общество, Суворов яч. хис., "Оринино", "Герой", Ильич яч. хис., Е. Андреев яч. хис. хуçалăхсем - 2013 çул пĕтĕмлетĕвĕпе республикăри чи лайăх 100 хуçалăх йышне кĕчĕ.
Ĕнер вара Муркаш районĕ черетлĕ тепĕр çитĕнÿ туни çинчен хыпар çитрĕ. Чăваш Республикин Министрсен Кабинечĕн 2014 çулхи июнĕн 16-мĕшĕнчи Постановленийĕпе килĕшÿллĕн Чăваш Республикинчи муниципалитет районсемпе хула округĕсем хушшинче 2013 çулта ирттернĕ инвестици активлăхĕн рейтингĕнче мала тухнисене республика бюджетĕнчен памалли субсиди калăпăшне палăртнă:
I ушкăнра (муниципалитет районсем хушшинче):
I вырăн йышăннă Çĕрпÿ районне - 1064,7 пин тенкĕ*
II вырăн йышăннă Муркаш районне - 573,3 пин тенкĕ*
II ушкăнра (хула округĕсем хушшинче):
I вырăн йышăннă Улатăр хулине - 1092, 0 пин тенкĕ.
Черетлĕ çитĕнÿ Муркаш районĕнче пурăнакансене малалла çĕнĕрен те çĕнĕ ÿсĕмсем тума хавхалантарать. Малалла та вĕсем черетлĕ çĕнтерÿ патне çирĕп утăмсем тăвĕç.
Л. Павлова.