11 июня 2014 г.
"Пирĕн районта ачасен сывлăхне çирĕплетме тата вĕсен канăвне йĕркелеме кăçал пурĕ 5 миллион та 729 пин те 200 тенкĕ уйăрнă. Вĕсенчен 4 миллион та 049 пин те 400 тенкĕ - шкулсем çумĕнчи лагерьсен ĕçне йĕркелеме. Çав шутри укçа-тенкĕпе палатка лагерĕсене йĕркелесе ĕçлеттерме те пăхса хунă", - пĕлтерчĕ район администрацийĕн вĕренÿ, çамрăксен политики тата физкультурăпа спорт пайĕн пуçлăхĕ З. Дипломатова.
Пĕлтĕрхи пекех палатка лагерьне йĕркелессине çамрăк армеецсен "Зарница" тата "Орленок" вăййисемпе тата ОБЖ предмечĕн вĕрентÿ программипе килĕшÿллĕн 10-мĕш класра вĕренекен çамрăксен 5 кунлăх вĕренÿ сборĕпе çыхăнтарнă.
Яшсен вĕренĕвĕ кăçал июнĕн 2 - 6-мĕшĕсенче Çатракассинчи вăтам шкул территорийĕнче иртрĕ. Унта районти вăтам шкулсенчи 75 çамрăк хутшăннă.
ЧР Çар комиссариачĕн Муркаш тата Элĕк районĕсен пайĕн пуçлăхĕ А. Кочуров тата район администрацийĕн вĕренÿ, çамрăксен политики тата физкультурăпа спорт пайĕн пуçлăхĕ З. Дипломатова çак вĕренÿ çамрăксене çара хатĕрленме пулăшнине, патриот воспитанийĕнче те пĕлтерĕшлине калаççĕ.
Вĕренÿ вăхăтĕнче çамрăксем ОБЖ урокĕсенче пухнă пĕлĕве те тĕрĕсленĕ, лару-тăрăва ĕçре те татса панă, тĕрлĕ норматив та пурнăçланă.
Вĕренÿ пĕтĕмлетĕвĕ тăрăх призывчченхи çамрăксен спартакиадин кăтартăвĕ çапла пулнă: 1-мĕш вырăнта - Чуманкассинчи вăтам шкулта вĕренекенсем, хыççăнхи вырăнсенче - Муркаш шкулĕнче тата Москакасси шкулĕнче вĕренекенсем.
Пăтăрмахсен пĕрлехи çулĕ çинче Муркашсем, Çатракассисем тата Москакассисем палăрнă. Çарпа практика пăтăрмахĕсен çулĕ çинче те малти виçĕ вырăна спартакиадăра палăрнисемех йышăннă.
Н. Димитриева.