26 января 2013 г.
Техника паркĕ çĕнелет
Агропромышленноç комплексĕн предприятийĕсемпе организацийĕсем хăйсен машинăпа трактор паркĕсене çĕнетсе пыни производство интенсивлăхĕпе ĕç тухăçлăхне ÿстерме, механизаторсен ĕç условийĕсене лайăхлатма май парать.
Иккĕмĕш çул ĕнтĕ ял хуçалăх предприятийĕсем çĕнĕ техника хатĕрĕсем туянма чылай укçа-тенкĕ уйăраççĕ. Иртнĕ çул çав тĕллевпе районĕпе 64,9 миллион тенкĕ тăкакланă, 69 единица ял хуçалăх техники туяннă. 2011 çулта 71 техника хатĕрĕ 75,5 миллион тенкĕлĕх туяннăччĕ. 2012 çулта çапла вара 21 трактор, тыр-пул пухса кĕртмелли 5 комбайн, 1 автомобиль тата ытти ял хуçалăх машини кÿрсе килнĕ.
Çĕнĕ ял хуçалăх техникипе оборудовани туянасси çине «Путь Ильича» агрофирмăра, «ВаСем» обществăра, «Передовик», Суворов яч. хис. хуçалăхсенче пысăк тимлĕх уйăраççĕ.
Уйăхлăх пуçланчĕ
Районта спорт тата оборонăллă-массăллă ĕçсен уйăхлăхĕ пуçланчĕ. Унăн программипе килĕшÿллĕн январĕн 29-мĕшĕнче «Эпĕ – Раççей гражданинĕ» акци иртмелле. Халĕ вара шкулсенче тематика сехечĕсем, паттăрлăх урокĕсем тата тĕрлĕ ытти ĕç пырать. Çавăн пекех палăксем тавра хăтлăх кĕртесси, вĕсем умне чечек çыххисем хурасси те айккинче юлмалла мар.
Район администрацийĕн çуртĕнче тавар туянакан правине хÿтĕлекен обществăлла йышăну пÿлĕмĕ уçăлнăранпа вăхăт нумаях та иртмерĕ. Çак тапхăрта вăл виçĕ потребитель правине хÿтĕлерĕ. Çавăн пекех халĕ пиллĕкĕш тĕлĕшпе уйрăм ĕç пырать. Чăваш Республикинчи потребительсен обществăлла учрежденийĕн специалисчĕ суту-илÿ ĕçĕнчи пăтăрмах, иккĕленÿ пулсан пĕр тăхтаса тăмасăр асăннă пÿлĕме пыма ыйтать.
Ачаран ĕçе хăнăхтарма
Ĕçпе тивĕçтерекен центр шкулта вĕренекенсене вăхăтлăх ĕç вырăнĕсем сĕнет. Ку енĕпе асăннă центр вĕрентÿ учрежденийĕсемпе, ял хуçалăх тата ытти предприятисемпе тачă çыхăнса ĕçлет. Кăмăл тăвакансем каникул вăхăтĕнче е вĕренÿ тапхăрĕнче вăл е ку ĕçре тимлесе укçа-тенкĕ ĕçлесе илме пултараççĕ. Çапла вара январĕн 24-мĕшĕ тĕлне 20 ĕç вырăнĕллĕх 1 килĕшÿ тунă та ĕнтĕ. 2013 çулта пĕтĕмпе 600 çамрăка ĕçпе тивĕçтерме палăртнă. Ку тĕлĕшпе республика бюджетĕнчен района 510 000, 00 тенкĕ уйăрнă.
Ячĕ манăçмасть
Январĕн 25-мĕшĕнче, Çветуй Татьяна кунĕнче, Исетерккĕ ялĕнчи сакăр паттăр-ывăл ÿстернĕ, 1 степень Аслă Петĕр орденне тивĕçнĕ, Чăваш Республикин Ĕç мухтавĕн, паттăрлăхĕн хисеп кĕнекине кĕртнĕ тата ытти чылай хисепе тивĕçнĕ Татьяна Николаевна Николаева çуралнăранпа 132 çул çитрĕ.
Р. Илларионова хатĕрленĕ.