24 мая 2014 г.
Çынсене физкультурăпа спорта ытларах явăçтарас тĕллевпе кăçал март уйăхĕнче "Сывлăхпа спорт кунĕ çинчен" Указ та вăя кĕчĕ. Çак Указпа килĕшÿллĕн пирĕн республикăра кашни уйăхрах Сывлăхпа спорт кунĕсем иртмелле. Май уйăхĕнчи сывлăхпа спорт кунĕ республикипех иртнĕ шăмат кун пулчĕ.
Çав кун йăлана кĕнĕ тăрăх çынсем "Сывлăх" ФСК-ри бассейнпа тата тренажер залĕнчи услугăсемпе тÿлевсĕрех усă курма пултарчĕç. Пирĕн районта вара Сывлăхпа спорт кунĕнче тепĕр интереслĕ ăмăрту та пулчĕ: Муркаш районĕн картинг енĕпе район администрацийĕн пуçлăхĕн парнисемшĕн иртнĕ уçă ăмăртăвĕ. Унта Муркаш районĕнчи, Шупашкар тата Çĕнĕ Шупашкар хулисенчи 30 ытла вĕренекен тата ĕçлекен çамрăк хутшăнчĕ. Ăмăрту Шетмĕпуç ял тăрăхĕнче малтан аэродром пулнă территорире иртрĕ.
Ăмăртура тĕрлĕ ÿсĕмрисем вăй виçрĕç. "Мини" класра малти вырăнсене Шупашкарпа Çĕнĕ Шупашкарсем йышăнчĕç. "Пионер" класс ушкăнĕнче малти вырăнсене Муркашри çамрăк техниксен станцийĕнче хушма пĕлÿ илекен Д. Филипповпа В. Александров тивĕçрĕç. "Юниор" класс ушкăнĕнче те пирĕн вĕренекенсем - А. Иванов, В. Степанов тата В. Петров мала тухрĕç. "Союзный" класс тупăшăвĕнче те Муркашсем палăрчĕç - К. Соколов, Н. Данилов тата П. Петров малти вырăнсене çĕнсе илчĕç. "Взрослый" класра та призлă вырăнсене пирĕн çамрăксем йышăнчĕç. 1 вырăна "Заря" пĕрлешÿ водителĕ С. Паршев тухрĕ, 2 вырăна - çамрăк техниксен станцийĕн педагогĕ Н. Филиппов, 3 вырăна - çамрăк техниксен станцийĕн картинг секцине çÿрекен Е. Павлов. "Любительский" класра вара çамрăк техниксен станцийĕнче ăсталăха туптакан Виктор Алексеев çĕнтерме пултарчĕ, хыççăнхи вырăнсенче - хула çамрăкĕсем.
Çак ăмăрту пĕтĕмлетĕвĕ А. Николаев космонавт-летчик ячĕллĕ кубока çĕнсе илессишĕн Чăваш Республикинчи спортпа техника тата çар спорт енĕсен кăçалхи спартакиадин зачетне те кĕчĕ. Çапла вара Муркашсен команди ку тапхăрта та мала тухма пултарчĕ.
Пирĕн районта картинг сыхланса юлнинче, вăл аталаннинче картинга килĕштерекен çамрăксемпе ĕçлекен Н. Филипповăн, О. Рыжковăн тата А. Лаптевăн тÿпи пысăккине каламасăр иртме çук. Ытти районсенче картинг аталанайманнине шута илсен вĕсен тÿпи курăмлă.
О. Киршева,
методист.