17 мая 2014 г.
Районти çĕр ĕçченĕ çу уйăхĕн кашни уяр кунĕпе туллин усă курса çуртрисем акас ĕçе агротехнологие пăхăнса вĕçлесе пырать. Техника тĕрĕслевĕ витĕр тухнă "хурçă утсем" иртен пуçласа каçчен пĕрлешÿллĕ хуçалăхсен уй-хирĕсенче вăй хураççĕ. Малашлăх ĕмĕтпе пурăнакан хресчен кашни ĕçе вăхăтра пурнăçласа хăварассишĕн тимлет.
Ял хуçалăх производство кооперативĕсемпе агрофирмăсен тата хресчен (фермер) хуçалăхĕсен кăçалхи çур акире уй-хир ĕçĕсен планĕпе килĕшÿллĕн пурĕ 11189 гектар тырă-пулă акса хăвармалла. Ĕнерхи кун тĕлне нумай хуçалăхра çак ĕçе вĕçленĕ те ĕнтĕ.
Çĕр улми лартаççĕ
Хуçалăхсем иртнĕ кунсенче "иккĕмĕш çăкăр" лартас ĕçе кÿлĕнчĕç. Çу уйăхĕн 16-мĕшĕ тĕлне çĕр улми пĕтĕмпе 170 гектар (30 процент) лартнă. Çĕр улми лартас ĕç "Ударник" хуçалăхра, "Агросоюз Картофель" чикĕллĕ яваплăхлă обществăра, В. Горбуновăн хресчен (фермер) хуçалăхĕнче кал-кал пырать.
Пахча çимçĕç пуссинче
Çурхи ака-суха планĕпе килĕшÿллĕн районăн кăçал 28 гектар пахча çимĕç лартмалла. Иртнĕ эрне кун тĕлне хуçалăхсенчен район администрацине тăратнă оперативлă кăтартусенчен вырăнсенче çак ĕçе 9 гектар ытларах (30 процент) пурнăçлани паллă. Пахча çимĕç пуринчен ытларах хальлĕхе И. Скворцов (5 гектар), А. Толстов (3 гектар) хресчен (фермер) хуçалăхĕсенче лартнă. Çак ĕç ытти хуçалăхра та вăй илсе пырать.
А. БЕЛОВ.