14 мая 2014 г.
Тойкилтĕ ялĕнче пурăнакан Васильевсен çемйине нумай чух районта иртекен спорт ăмăртăвĕсенче курма пулать. Акă нумаях пулмасть Муркаш райпо кубокĕсене çĕнсе илессишĕн иртнĕ çăмăл атлетика эстафетинче те вĕсен çемйи малти вырăн çĕнсе илчĕ, хаклă парнене тивĕçрĕ.
Светлана Порфирьевнăпа Эдуард Венальевич - питĕ хастар мăшăр. Çемье пуçĕ хуçалăхра, кайран шкулта водительте тимленĕ, мăшăрĕ 20 çул ытла ĕнтĕ Тойкилтĕри шкулта пуçламăш классене вĕрентет. "Ачасем аталанччăр тетпĕр. Çавăнпах пĕр вырăнта ларма юратмастпăр эпир, çемйипех активлă пулма тăрăшатпăр. Тăтăшах спорт ăмăртăвĕсене хутшăнатпăр, хамăр ялта йĕркеленнĕ "Хĕлхем" эстрада ушкăнне юрлама та çÿретпĕр", - тет Светлана Порфирьевна.
Çемьере икĕ ача ÿсет. Вадим 20 çулта ĕнтĕ. Тойкилтĕри тĕп шкулта 8 класра вĕренекен Виолетта вара Муркашри искусство шкулĕнчи хореографи уйрăмне вĕренсе пĕтерме те ĕлкĕрнĕ. Иккĕшĕ те спортпа туслă. "Малтан эпир ывăлпа та ăмăртусене чылай хутшăннă, пĕр вунă çул каялла районти 27 çемье йышĕнче çĕнтерÿçĕ пулса телевизор та çĕнсе илнĕччĕ", - аса илчĕ çемье биографийĕн пĕр самантне Светлана Порфирьевна.
Савăнăçлă та асра юлакан интереслĕ самантсем вара вĕсен туслă çемйинче татах нумай пулччăр.
Н. Николаева