06 мая 2014 г.
Кăçал районăмăр хăйĕн 70 çулхи юбилейне паллă турĕ. Çавна халалласа тĕрлĕрен мероприятипе конкурс сахал мар пулса иртет. 2013 çулхи октябрĕн 10-мĕшĕнчен пуçласа 2014 çулхи январĕн 31-мĕшĕччен видеосюжетсен районти "Сам себе режиссер - 2013" конкурсĕ иртрĕ. Ăна та район юбилейне халалланă. Районта вăл иккĕмĕш хут иртрĕ.
Ăна 4 номинаципе йĕркелерĕмĕр: "Район родной - навек любимый", "Хлеб рождается в бороздках", "Слава моего предприятия" тата "Моя семья". Конкурса 16 ĕç тăратрĕç. Пĕрремĕш номинацире Татьяна Андреева, Андрей Краснов, Лира Кудашовăпа Тамара Тимофеева, иккĕмĕш номинацире Степан Борзаев, Ирина Григорьева тата Ольга Семенова, виççĕмĕш номинацире район администрацийĕн вĕренÿпе çамрăксен политикин пайĕн пултарулăх ушкăнĕ, Инесса Михайловăпа Анастасия Киршева тата Анатолий Макаров, тăваттăмĕш номинацире Евгений Григорьев, Лейла Иштудова, Дарья Борзаева малти вырăнсене тивĕçме пултарчĕç.
Видеоĕçсене тишкерни çавна кăтартса парать. Конкурса хутшăнакансен ăсталăхĕ ÿссех пырать. Вĕсем видеоредакторăн тĕрлĕ тĕсĕсемпе, техника мелĕсемпе тата видеомонтаж эффекчĕсемпе усă кураççĕ. Çапах та ĕçсенче хальлĕхе сценарист тата режиссер ăсталăхĕ çитсех каймасть-ха.
Çавна май конкурсантсемпе тĕл пулма тата конкурс çĕнтерÿçисене парнесем парса чыслама кăçалхи апрелĕн 1-мĕшĕнче хамăр пата тĕл пулăва чăвашсен нумай фильмĕсен паллă режиссерне Владимир Карсакова чĕнтĕмĕр. Вăл ертсе пынипе район юбилейĕ тĕлне "Для нашей фирмы "Салам" год стал "моргаушским" ятпа Муркаш районĕ пирки 15 минутлăх реклама роликĕ ÿкерсе хатĕрленĕччĕ. Халĕ вара эпир татах çĕнĕ проектсем тĕлĕшпе ĕçлетпĕр. Вĕсем те район пурнăçĕпе çыхăннă. Муркаш районĕ чылай ырă пуçарусенче яланах "пионер" пулса тăрать. Владимир Федорович шухăшĕпе фильм ÿкернĕ чухне чи кирли - унта хăвăн чунна хывасси.
Район юбилейне халалласа сăн ÿкерчĕксен "Лучше нет родного края" конкурсĕ те ăнăçлă иртрĕ. 61 çын хутшăнчĕ унта. Конкурсантсем 400-е яхăн ĕç тăратрĕç. Çĕнтерÿçĕсене палăртма кăмăллă. Кусем вĕсем "О чем расскажет старая фотография" номинацире Игорь Каргин, Татьяна Толстова, Наталья Сидюшкина, "Хлеб - всему голова" номинацире Алексей Ефимов, Ольга Семенова, Екатерина Прокопьева, "Люблю мой сельский край" номинацире Ксения Игнатьева, Анатолий Макаров, Оксана Прокопьева, "Моя гордость" номинацире Дарья Самушкова, Александр Юнусов, Татьяна Васильева, "Фотоприкол" номинацире Алевтина Рожкова, Ирина Григорьева, Татьянăпа Карина Павловăсем.
Жюри членĕсем Игорь Каргин, Дарья Самушкова, Надежда Порфирьева, Ольга Тимофеева, Олег Тарасов уйрăмах активлă пулнине палăртса хăварчĕç. Кашниех вĕсенчен конкурса 10 ытла сăнÿкерчĕк тăратрĕ. Вĕсене район администрацийĕн Тав çырăвĕсене парса хавхалантарнă.
Район пурнăçĕ пирки фото- тата видеоматериалсем пухасси пире тахçантанпах шухăшлаттарнă. Ку конкурссене эпир пĕрремĕш çул мар ĕнтĕ ирттеретпĕр. Уйрăмах районта пурăнакансен хăйсен архивĕсенчи кивĕ сăн ÿкерчĕксем пирĕншĕн хаклă. Кăçал та кун пеккисене сахал мар пухма пултартăмăр.
Кăçалхи конкурс материалĕсен копийĕсене тата вĕсен электрон мелĕсене район архивне управа патăмăр. Электрон версисене вара районăн официаллă сайтĕнче вырнаçтартăмăр. Çавă та пĕлтерĕшлĕ самант пулса тăрать. Конкурссене хутшăнакансем хушшинче çĕнĕрен çĕнĕ ятсем тупăнаççĕ, шкулта вĕренекенсем те сахал мар.
Аслă Отечественнăй вăрçăра Çĕнтерÿ тунăранпа 70 çул çывхарса килет. Çак куна халалласа районта каллех сăн ÿкерчĕксен конкурсне йĕркелеме шутлатпăр. Енчен те сирĕн çемье архивĕнче çав çулсенчи кивĕ сăн ÿкерчĕксем пур пулсан, пирĕн конкурса хутшăнма ан манăр. Ку енĕпе пирĕн опыт пур ĕнтĕ. Аслă Çĕнтерÿ тунăранпа 65 çул çитнĕ тĕле вăрçă вăхăтĕнчи 65 сăн ÿкерчĕкрен выставка йĕркеленĕччĕ.
В. ЛАВРЕНТЬЕВ,
район администрацийĕн информаципе тивĕçтерекен пайĕн пуçлăхĕ.