23 января 2013 г.
Район кунне халаллаççĕ
Январĕн 21-мĕшĕнче район администрацийĕн ларусен пĕчĕк залĕнче район кунне паллă тăвассипе ĕçлекен йĕркелÿ комитечĕн ларăвĕ пулнă. Ăна район администрацийĕн пуçлăхĕ Р. Тимофеев (вăл çак комитета ертсе пырать) ирттернĕ.
Район администрацийĕн пуçлăхĕ январĕн 17-мĕшĕнче 24 " хушу кăларнă. Унпа килĕшÿллĕн 2012 çулхи социаллă пурнăçпа экономика аталанăвĕн итогĕсене пĕтĕмлетессипе чаплă ларăва февралĕн 15-мĕшĕнче Шупашкарта Чăваш академи драма театрĕнче ирттерме палăртнă. Ăна тăван района йĕркеленĕ куна халаллаççĕ.
Ларура, тĕпрен илсен, экономика ăмăртăвĕн итогĕсене пĕтĕмлетеççĕ, ĕçре мала тухнисене чыслаççĕ.
Рейд ушкăнĕ çула тухрĕ
Çак эрнере пĕрлешÿллĕ хуçалăхсенче выльăх-чĕрлĕхе хĕл каçарассипе ĕçсем епле пынипе паллашассипе рейд тĕрĕслевĕсем пуçланчĕç. Тĕрĕслевĕн пĕрремĕш кунĕнче район администрацийĕн экономикăпа АПК аталанăвĕн пайĕн тĕп эксперт-специалисчĕ Т. Алексеева ертсе пыракан ушкăн «Ударник» сăнавлă производство хуçалăхне тата Шетмĕпуç ял тăрăхĕнчи Михаил Лукияновăн «Колос» АПФне тата Опрыскьялĕнчи Владимир Павловăн хресчен (фермер) хуçалăхне çитсе лару-тăрупа паллашрĕ.
«Ударник» хуçалăхра сĕт суса илесси сахалланни ĕнесен кĕтĕвне чакарнипе ытларах палăрать. Çав вăхăтрах Йÿçкассинчи сĕт ферминче ĕçлекенсем çителĕксĕр: ĕне сăвакансем çеç 3 çын çук. Апат пахалăхĕ начар пулнăран 248 ĕнерен кашнин пуçне талăкри вăтам сăвăм 5,4 килограмм çеç тивет. Ĕнесем картишне уçăлма тухмаççĕпе пĕрех. Çав вăхăтрах Вăрманкассинчи сĕт фермине илес пулсан кунта ĕçсем кал-калрах пыраççĕ. Кунти вăтам сăвăм 10,9 килогрампа танлашать. Ферма ĕçченĕсем ĕç укçипе парăм пысăкки, ĕç çи-пуçне 2-мĕш çул паманни пирки пăшăрханаççĕ.
Юр çийĕн çÿреме
Чăваш Республикин хăй тĕллĕн çÿрекен тата ытти машинăсене тĕрĕслесе тăракан патшалăх инспекцийĕн пуçлăхĕ В. Димитриев, ШĔМĕн Чăваш Республикипе ĕçлекен ГИБДД Управленийĕн пуçлăхĕн ĕçĕсене вăхăтлăх туса пыракан В. Романов тата Чăваш Республикинчи Гражданла оборонăпа чрезвычайлă лару-тăру патшалăх комитечĕн ертÿçи В. Петров январĕн 15-мĕшĕнче «Снегоход» профилактика операцийĕ ирттерме пĕрлехи хушу кăларнă. Операци январĕн 25-мĕшĕнчен пуçласа февралĕн 25-мĕшĕччен иртĕ.
Палăртнă тапхăрта çирĕплетнĕ ушкăн ĕç коллективĕсенче пулса асăннă операцин тĕллевĕсемпе паллаштарĕ, хуçисем техникăна вăхăтра регистрациленине, вĕсемпе хăрушсăрлăх правилисен требованийĕсене пăхăнса усă курнине тĕрĕслĕ.
А. БЕЛОВ хатĕрленĕ.