26 апреля 2014 г.
Çак кунсенче район администрацийĕнче хисеплĕ ветерансем, ял тăрăхĕсен пуçлăхĕсем тата ответлă ытти ĕçченсем пĕрлехи ларăва пухăнчĕç. Чи малтанах район администрацийĕн пуçлăхĕ Ростислав Тимофеев кунта хутшăнакансене район аталанăвĕпе тата умри задачăсемпе паллаштарчĕ.
- Çулталăкăн пĕрремĕш кварталĕ çăмăлах килмерĕ. Йывăрлăх промышленноçпа ял хуçалăх отраслĕсенче те сисĕнчĕ, халĕ майĕпен аталану курăнма пуçларĕ. Йывăр хуçалăхсем те пур, çапах та йăлтах япăх теме те васкар мар, - пуçларĕ калаçăва Ростислав Николаевич.
«Ударник», «Свобода» тата хăш-пĕр хуçалăх малтанхи тапхăрсенче тĕслĕхре пулнă пулсан, вĕсенче халĕ самай йывăр лару-тăру. Чапаев тата Чкалов ячĕпе хисепленекен хуçалăхсем нумаях пулмасть пĕр тытăмра ĕçлеме пуçларĕç. Суворов ячĕпе хисепленекен хуçалăх вара - ыттисемшĕн ырă тĕслĕхре. Унта вăй хуракансем кÿршĕри Етĕрне районĕнчи пилĕк çĕр гектарлă арендăри уй-хирте те ĕçлеме ĕлкĕреççĕ. Хăш-пĕр фермер (хресчен) хуçалăхĕсем ытларах аталанни сисĕнет, тĕслĕхрен, Афанасьев хуçалăхĕнче 1200 пуç сысна ĕрчетеççĕ.
Пурне те шухăшлаттарма тивĕç ыйту вăл - юлашки вăхăтра çынсем эрехпе ытлашшипех иртĕхме пуçлани. Ăçта эрех, унта харкашупа çапăçу, ĕçсĕрлĕх тата ытти йĕркесĕрлĕх хуçаланать. Район администрацийĕн пуçлăхĕ çумĕнчи пĕчĕк тата вăтам предпринимательство аталанăвĕн канашĕн черетлĕ иккĕмĕш ларăвне хутшăнакансем «фанфурикпа» суту-илÿ тăвакансене çак киревсĕр ĕçе пăрахăçлама чĕнсе каларĕç, çак чĕнĕвĕн усси пуласса шанас килет.
Умра 69-мĕш Аслă Çĕнтерÿ. Ăна хатĕрленес хĕрÿ тапхăр пырать. Ку ыйту çинче район администрацийĕн пуçлăхĕн çумĕ Лилия Тарасова чарăнчĕ, мероприяти планĕпе, ытти самантпа паллаштарчĕ.
Кăçал иккĕмĕш хут «Эпĕ астăватăп. Эпĕ хăпартланатăп» фестиваль иртет. Вĕренÿ учрежденийĕсенче патриотика воспитанийĕн урокĕсене йĕркелеççĕ. Шел пулин те, пирĕн хушăра вăрçа хутшăннисем сахаллансах пыраççĕ, вĕсен хисепĕ районта аллăран кăшт кăна иртет. Тăван çĕр-шыва хÿтĕлеме хутшăннисем пирĕн асăмра, тимлĕхре пулмалла, вĕсем пирки ытларах пĕлме тăрăшмалла. Çак тĕлĕшпех ĕнтĕ Интернетра икĕ сайт йĕркеленĕ. Пĕри - «Подвиг народов в ВОВ 1941 - 1945 годов», унта вăл е ку фронтовик пирки тĕрлĕ истори докуменчĕ тупма май пур. Чылай салтак хыпарсăр çухалнă, пуçне хунă. Ку тĕлĕшпе пулăшма пултаракан тепĕр сайт «Мемориал» ятпа тăрать. Çаксем çинче тĕрлĕ информаци пур. Вĕсемпе пирĕн тачăрах ĕçлемелле, унти документсемпе паллашмалла.
- Планпа пăхнă мероприятисене активлăрах хутшăнар. Палăксемпе обелисксене юсассине, вĕсем тавралла тирпейлессине те манар мар, - терĕ Лилия Юрьевна мирлĕ пурнăçшăн тăрăшнисене яланах асра тытмаллине палăртса.
Ветерансен районти канашĕн ертÿçи М. Виноградова асăннă канаша 16 çул ертсе пырать. Вăл иртнĕ çулхи отчетпа паллаштарчĕ. Канаш виçĕ тĕп енпе - социаллă ыйтусене татса парассине хутшăнассипе, медицина пулăшăвĕпе тивĕçтерессине витĕм кÿрессипе, ÿссе аталанакан ăрăва çарпа патриотика воспитанийĕ парассипе - тимлет.
Хисеплĕ ветерансене ял хуçалăх ĕçĕпе, тавралăха тирпей-илем кĕртессипе çыхăннă ыйтусем пăшăрхантараççĕ.
- Çак ыйтусене уçăмлатассинче сирĕн те активлăрах пулмалла, - тесе чĕнсе каларĕ пенсионерсен пĕрлĕхĕн ертÿçи А. Скворцов.
Ветерансен районти канашĕн ертÿçи М. Виноградова хăй вăй хуракан должноçра тимлеме урăх кандидат кирлине палăртрĕ. Район администрацийĕн пуçлăхĕ Ростислав Николаевич Мария Васильевнăна çак ĕçе тÿрĕ кăмăлпа тивĕçлĕ пурнăçланишĕн тав турĕ. Пĕрлехи ларура асăннă канашăн ертÿçине Е. Куликовăна суйларĕç.
Р. Илларионова.