26 апреля 2014 г.
Пурăнан пурнăç çĕр тĕрлĕ çаптарсан та ĕçлекен, хăйне шаннă тивĕçе туллин пурнăçлакан çын пурнăç çулĕн хĕррине тăрса юлмасть. Пус çумне пус хушса вăл ыттисемшĕн аталану тĕслĕхĕ пулса тăрать. «Çын ĕçпе илемлĕ», - тет ваттисен сăмахĕ. Çак чăнлăх ĕмĕртен ĕмĕре тăтăшах ума тухса пырать. Ĕçлекен тăрăшулăхне тивĕçлипе йышăнакансем мал туртăмлă ĕçĕн тĕслĕхĕпе ыттисене воспитани парассине, хавхалантарассине малти вырăна кăлараççĕ, ĕçшĕн хаклассине кун йĕркине кĕртеççĕ. Халĕ каланине район администрацийĕн экономикăпа ял хуçалăх аталанăвĕн пайĕ тăтăшах кун йĕркинче тытать. Çапла вара иртнĕ çулхи ĕçсене тишкерсе обществăлла выльăх-чĕрлĕх патĕнче вăй хуракансене тивĕçлипе чысласси те кунта ырă йăлара. Кăçал çак пĕтĕмлетÿ ака уйăхĕн 17-мĕшĕнче Муркашри информаципе культура центрĕнче иртрĕ.
- Çĕннине тăтăш вĕренмеллине, ыранхи куна пăхса ĕçлемеллине, малашлăхшăн тăрăшмаллине пирĕнтен пурнăç ыйтать. Çакна эпир хамăр çинче туятпăр. Районăн, Чăваш Республикин тата Раççей Федерацийĕн экономикине малалла уттарасси пĕрлехи тивĕç пулнине ăнланатпăр. Çавăнпа та малта пыракансен ĕçне тивĕçлипе шута хурассине кун йĕркинчен кăлармастпăр, - терĕ канашлăва уçнă май район пуçлăхĕ тата Ильич яч. хис. хуçалăх ертÿçи И. Николаев.
Раççей Президенчĕ В. Путин палăртнă «Агропромышленность комплексне аталантарасси» приоритетлă наци проекчĕ панă çĕнĕлĕхсене вăхăтра алла илни ял хуçалăх предприятийĕсене, ялта пурăнакан уйрăм граждансене çĕнĕ аталану çулĕсене уçса ĕçлеме вăй пачĕ. Çакă кашнин умнех çĕнĕ тĕллевсем лартрĕ. Ыранхи кунпа пурăнакансем çĕнĕ ĕç мелĕсене алла илсе кĕске хушăрах производствăна çĕнĕ технологисем кĕртсе аталану çулĕ çине тăчĕç. Çакна паян пурсăмăр та курса тăратпăр.
Кун йĕркинче темĕнле проект-программа пулсан та, конкретлă ĕçлекен ăсталăхĕ малти вырăнта тăрать. Вăл çапла пулнă, пур, пулĕ те. Çанă тавăрса ĕçе кÿлĕннисем кунсерен продуктивлăха ÿстереççĕ, аталанăвăн çĕнĕ çулĕсене уçаççĕ. Çакна асра тытса тата обществăлла выльăх-чĕрлĕх патĕнче чунне парса ĕçлекенсен мал туртăмлăхне пуç тайса иртрĕ те ĕнтĕ семинар-канашлу.
2013 çулта районти пĕтĕм категориллĕ хуçалăхсенче пурĕ 1375 тонна аш-какай туса илнĕ (виçĕм çулхин 90,1 проценчĕ). Сĕт производстви 9 пин те 604 тоннăпа танлашнă (109,2 процент).
Ял хуçалăх предприятийĕсенче паянхи куна 5016 пуç мăйракаллă шултра выльăх (вăл шутра 2154 пуç сумалли ĕнесем), 1842 пуç сыснасем шутланаççĕ. Килти хушма хуçалăхсенче 9755 пуç мăйракаллă шултра выльăх (5849 пуçĕ ĕнесем), 731 пуç сысна тытаççĕ.
Самăртма хупнă мăйракаллă шултра выльăх пĕлтĕр талăкра районĕпе вăтамран 553 грамм, сыснасем 296 грамм ÿт хушнă. Çав вăхăтрах мăйракаллă шултра выльăхсен ÿт хушаслăхĕ «Оринино» хуçалăхра 751 грампа, «Путь Ильича» агрофирмăра 694 грампа, «Герой» кооперативра 675 грампа танлашнă.
Обществăлла выльăх-чĕрлĕх отраслĕнчи ĕçсене пĕтĕмлетсе район администрацийĕн пуçлăхĕн пĕрремĕш çумĕ - экономикăпа АПК аталанăвĕн тата муниципаллă харпăрлăх управленийĕн ертÿçи В. Ананьев тишкерÿллĕ-танлаштаруллă доклад туса пачĕ.
- Пирĕн паянхи тĕп тĕллев - пурнăçланă ĕçсене тишкерсе тивĕçлĕ хак парасси тата çăмăл мар ĕçре малта пыракансене туллин чысласси. Пĕрешкел условисенчех вĕсем ÿсĕмĕн çÿлти картлашкисене тивĕçни пирĕн хушăмăрта пысăк ĕç потенциалĕ пуррине çирĕплетет. Пирĕн унпа туллинрех усă курмалла, - терĕ хăйĕн сăмахне вĕçлесе малта пыракансене чыслама пуçлас умĕн Владислав Кириллович.
Çĕнтерÿçĕсен тата хисеплĕ ятсене тивĕçнисен списокĕпе хаçатăн çитес номерĕнче паллаштарăпăр.
А. БЕЛОВ.