23 апреля 2014 г.
Апрелĕн 18-мĕшĕнче Шупашкарта К. Иванов ячĕллĕ Чăваш патшалăх академи драма театрĕнче Вырăнти хăй тытăмлăх кунне савăнăçлă паллă турĕç.
Вырăнти хăй тытăмлăх кунĕ çамрăк-ха. Ăна кăçалхипе çĕр-шывра иккĕмĕш хут паллă турĕç. Çак куна паллă тăвассине Раççей Президенчĕ 2012 çулхи июнь уйхĕнче хăйĕн указĕпе çирĕплетнĕ. Ку вăл 2003 çулхи октябрĕн 6-мĕшĕнче федерацин «Раççей Федерацийĕнче вырăнти хăй тытăмлăха йĕркелессин пĕтĕмĕшле принципĕсем çинчен» Саккунне йышăннăранпа вырăнти хăй тытăмлăх институчĕн пĕлтерĕшĕ тата вырăнĕ ÿснипе, граждансен демократи обществи йĕркеленсе пынипе çыхăннă.
Вырăнти хăй тытăмлăх кунне халалласа ирттерекен савăнăçлă пухăва Чăваш Республикин Пуçлăхĕ Михаил Игнатьев хутшăнчĕ. Уява пухăннă вырăнти хăй тытăмлăхăн тĕрлĕ шайри органĕсенче вăй хуракансене саламлаканĕсем шутĕнче çавăн пекех Чăваш Республикин Патшалăх Канашĕн председателĕ Юрий Попов, Пĕтĕм Раççейри «Единая Россия» политика партийĕн Чăваш регион уйрăмĕн секретарĕ - Чăваш Республикин Патшалăх Канашĕн патшалăх строительстви, вырăнти хăй тытăмлăх, регламент тата депутат этикин комитечĕн председателĕ Николай Малов, Шупашкар хулин пуçлăхĕ - республикăн муниципалитет йĕркеленĕвĕсен канашĕн правленийĕн ертÿçи Леонид Черкесов пулчĕç. Влаç тытăмĕнче ĕçлекенсене вĕсем професси уявĕпе саламланă май хăйсен пархатарлă та чыслă ĕçĕнче малашне те ăнăçу, ырлăх-сывлăх сунчĕç.
Кĕске справка. 2006 çулхи май уйăхĕнче республикăри муниципалитет йĕркеленĕвĕсем хăйсен пĕрлĕхне йĕркеленĕ. Унăн йышĕнче - республикăри 21 районпа 5 хула округĕ, 291 ял тăрăхĕ. Муркаш районĕнче ял тăрăхĕсем 16.
Хăйĕн сăмахĕнче Михаил Игнатьев çавна палăртрĕ. Муниципалитетсенче вăй хуракансем яланах халăхпа çывăх, вĕсен кулленхи ыйтăвĕсене лайăхрах курса-пĕлсе тăраççĕ, çынсем вĕсене шанаççĕ. Апла пулсан яваплăх туйăмĕ те çирĕп пулмалла.
«Территорисене аталантарма эпир сахал мар ĕç туса ирттеретпĕр, миллиардшар тенкĕ укçа хыватпăр. Çавна шута илес пулсан пирĕн экономика та, пĕчĕк тата вăтам бизнес та, ял хуçалăхĕ те тăнăç аталанма тивĕç», - терĕ республика Пуçлăхĕ.
Ырă еннелле улшăнусем пулса пынине çынсем куллен туйса тата курса тăма тивĕç. Апла пулсан вара халăх шанăçне тивĕçнисен яваплăха уйрăмах çирĕп туйса ĕçлес пулать. Малашлăха пăхма пĕлни, территорисене аталантарассипе республика тата федераци шайĕнчи тĕрлĕ программăсене хутшăнни хальхи вăхăтра питех те пысăк пĕлтерĕшлĕ.
Михаил Васильевич вырăнсенче çурхи уй-хир ĕçĕсене йĕркеллĕ туса ирттерессин, сывлăх, вĕренÿ ыйтăвĕсене те куç ытамĕнчех тытмалли пирки те каларĕ.
Муниципалитет службин ĕçченĕсене уявпа саламланипе пĕрлех ĕçре уйрăмах палăрнисене республика Пуçлăхĕ Михаил Игнатьев Хисеп хучĕпе хисеплĕ ятсем, «Чăваш Республикинчи вырăнти хăй тытăмлăх органĕсенче тÿрĕ кăмăлпа ĕçленĕшĕн» Мухтав палли, Тав çырăвĕпе хаклă парнесем парса чыс турĕ. Чăваш парламенчĕн спикерĕ Юрий Попов тата «Единая Россия» политика партийĕн регион уйрăмĕн секретарĕ Николай Малов ĕçре палăрнисене ведомство наградисене парса саламларĕç. Уяв концерт программипе вĕçленчĕ.
Уяв мероприятине халалласа драма театрĕ умĕнчи лапамра акционерсен «ЧЕТРА-Промышленные машины» уçă обществи коммуналлă хуçалăхра усă курма туса кăларакан хăйĕн çĕнĕ техника хатĕрĕсен» куравне йĕркелерĕ.
В. ШАПОШНИКОВ.