09 апреля 2014 г.
Патшалăх пĕрлехи экзаменĕсем тавра кашни çулах тĕрлĕ калаçу çуралать, мĕншĕн тесен экзамен йĕркине улшăнусем те, çĕнĕлĕхсем те кĕртеççĕ. Акă кăçал та малтанхи пекех экзамен иртекен пÿлĕмсенче видеосăнав оборудованийĕ вырнаçтараççĕ, общество енчен сăнакансем пулаççĕ, анчах та патшалăх экзаменĕсене тытас йĕркене татах та çирĕплетнĕ.
Район администрацийĕн вĕренÿ, çамрăксен политики тата физкультурăпа спорт пайĕнчен пĕлтернĕ тăрăх ачасене кăçал экзамен иртекен пÿлĕме металл тупса палăртакан приборпа тĕрĕслесе кĕртеççĕ. Çак хатĕр патне çитичченех ачан телефонран хăтăлмалла, мĕншĕн тесен ятарлă приборпа телефон тупса палăртни патшалăх пĕрлехи экзаменне тытас йĕркене пăснипе танлашать-мĕн. Çакна РФ Вĕренÿпе наука министерствин 2013 çулхи декабрĕн 26-мĕшĕнчи 1400 номерлĕ хушăвĕпе çирĕплетнĕ. Ачасен хăйсемпе пĕрле нимĕнле çыхăну хатĕрĕ те, фото- тата аудиоаппаратура та пулмалла мар. Экзамен йĕркелÿçисен те, инструкторсен те çыхăну хатĕрĕсем пулмалла мар. Экзамен йĕркине пăсакансене экзамена кĕртме чарнă.
Кăçал пирĕн районта патшалăх пĕрлехи экзаменĕсене пурĕ 204 çамрăк тытма хатĕрленет, вĕсенчен виççĕшĕ - малтанхи çулсенче шкултан вĕренсе тухнисем.
«2012-1013 вĕренÿ çулĕнчи патшалăх пĕрлехи экзаменĕсенче пысăк балл пухнисен кăтартăвĕсене тĕрĕслерĕç. Шкулта «виççĕпе» вĕренсе пыракансем экзаменра пысăк балл пухнине тишкерсен пирĕн районти лару-тăру та лайăхах пулмарĕ. Кун пеккисене надзорпа контроль органĕсем вĕренме кĕнĕ хыççăн та тĕрĕслеççĕ. Пĕрремĕш сессие мĕнле паллăсемпе вĕçленине пăхаççĕ», - аса илтерет вĕренÿ пайĕн пуçлăхĕ З. Дипломатова.
Çапла вара çамрăк шанăçа тивĕçтермесен унăн экзамен результачĕсене те пăрахăçлас ыйту тухса тăрать. Апла пулсан экзаменра ачасен ытларах хăйсен ăсĕ-тăнĕ тата шăккалатпа сĕткен паракан вăй çине кăна шанмалла.
Н. Николаева.