19 января 2013 г.
Районти предприятисемпе организацисенче иртнĕ çулхи ĕçе пĕтĕмлетсе, кăçалхи тĕллевсене палăртаççĕ. «Путь Ильича» агрофирмăра çакнашкал канашлу иртнĕ ытлари кун пулчĕ. Унта район администрацийĕн пуçлăхĕ Р. Тимофеев, экономикăпа АПК аталанăвĕн пайĕн специалисчĕсем, республикăри ăратлăх енĕпе ĕçлекен «Чувашское» акционерсен уçă обществин генеральнăй директорĕпе И. Козинпа унти специалистсем, районти выльăх-чĕрлĕх чирĕсемпе кĕрешекен станци ертÿçи Н. Яковлев, «Путь Ильичара» ĕçлекенсем хутшăнчĕç.
Чи малтанах пуçтарăннисем çĕнĕ сĕт-çу комплексĕнче пулса курчĕç.
Канашлура асăннă предприятин генеральнăй директорĕ О. Дельман сăмах илчĕ. Хуçалăха йĕркелесе ярас тесе тунă утăмсемпе унăн малашлăхĕ çинче чарăнчĕ. Олег Александрович ырă пуçарăва пурнăçлама пулăшса пынăшăн район администрацине тав турĕ.
Предприятин ĕç тăвакан директорĕ В. Вязов иртнĕ çул тунă ĕçсем çинче чарăнчĕ, коллектив членĕсене тăрăшса ĕçленĕшĕн тав сăмахĕ каларĕ.
«Путь Ильича» хуçалăхăн паян 1277 га çĕр. Вĕсем Ярославкăпа Турай ял тăрăхĕсенчи усăсăр выртакан çĕрсене те ĕçе кĕртрĕç. Çĕр лаптăкне тата тепĕр 500 га чухлĕ пысăклатасшăн. Пĕтĕмпе кунта 71 çын ĕçлет. Талăкра паян кашни ĕнерен 16 килограмм сĕт сăваççĕ. Январĕн 23-мĕшĕнче сăвакан ĕнесене çĕнĕ комплекса куçараççĕ. Кăçал кунта кашни ĕнерен 6 пин килограмран кая мар сĕт суса илме тĕллев лартаççĕ.
Район администрацийĕн пуçлăхĕ Р. Тимофеев пуçтарăннисене район аталанăвĕпе паллаштарчĕ. Çакнашкал çĕнĕ комплекс уçăлни экологи тĕлĕшĕнчен таса продукци туса илме май панине, çавăн пекех çакă халăхшăн тунă утăм пулнине палăртрĕ. Ростислав Николаевич çавăн пекех ку предприятин çĕр лаптăкне ÿстерес ыйтупа районта ĕç пуçлани çинчен те асăнчĕ, çавăн пекех хуçалăх ĕçченĕсене ÿсĕмлĕ ĕçлеме ырă сунчĕ.
Канашлура выльăх-чĕрлĕх отраслĕнчи пĕлтерĕшлĕ ыйтусемпе уçă калаçу пулчĕ.
Л. ПАВЛОВА.