22 марта 2014 г.
Мартăн 20-мĕшĕнче Чăваш Республикин Патшалăх Канашĕн черетсĕр XX сессийĕнче Чăваш Ен Пуçлăхĕ Михаил Игнатьев Министрсен Кабинечĕн 2013 çулхи отчечĕпе паллаштарнă. Иртнĕ çул Министрсен Кабинечĕн ĕçĕ республика тупăшĕн шайне ÿстерессипе, патшалăх пурлăхĕпе эффективлă усă курассипе çыхăннă. Шайлашуллă бюджет мĕн пур социаллă обязательствăна тулли шайра пурнăçлама май панă. Республика пуçлăхĕн докладĕнче промышленность комплексĕнчи, ял тата çул-йĕр хуçалăхĕсенчи лару-тăрăва тишкерессине пысăк тимлĕх уйăрнă.
2013 çулта мĕн пур çăл куçри укçа-тенкĕпе усă курса пĕтĕмпе 831,1 пин тăваткал метр чухлĕ пурăнмалли çурт-йĕр лаптăкĕ вăя кĕртнĕ е çакă 2012 çулхин 101,5 проценчĕ пулать.
Социаллă политикăн ăнăçлă аталанăвне демографи лару-тăрăвĕ йĕркеленни çирĕплетет. Пĕтĕмĕшле илсен мĕн пур муниципалитет шайĕнче пĕр майлă йывăрлăх палăрать. Çĕр лаптăкĕсем, вăл шутра çĕрпе усă курнăшăн аренда тÿлевĕ тĕлĕшпе татса паман ыйту чылаййине асăннă Михаил Игнатьев, çавăн пекех усă курман çĕр лаптăкĕсене хуçалăх çаврăнăшне кĕртессипе çине тăрса ĕçлемеллине палăртнă.
Муниципалитетсен шайĕнче врач кадрĕсемпе тивĕçтерес йывăрлăх çав-çавах çивĕч тăрать-ха. Сывă пурнăç йĕркине пăхăнса пурăнма хăнăхтарассипе, алкоголь продукцийĕпе усă курассине хирĕç кĕрешессипе ытларах ĕç туса ирттерме сĕннĕ вăл. Михаил Игнатьев хăй калаçăвне вĕçленĕ май çакна асăннă. Республикăра пурăнакансемпе социологи ыйтăмĕ ирттернĕ, унта хутшăнакансем влаç органĕсен ĕç-хĕлне пысăка хурса хакланă, патшалăх тата муниципалитет услугисемпе тивĕçтернине тата пурнăç шайĕ ÿснине палăртнă.
Сывлăхпа спорт кунĕ
Чăваш Енре паян черетлĕ Сывлăх кунĕ иртет. Çакна май республикăра пурăнакан кашни çын муниципалитетсенчи спорт сооруженийĕсем тивĕçтерекен услугăсемпе тÿлевсĕр усă курма пултарать.
Çапла вара Муркаш районĕнче пурăнакансемшĕн «Сывлăх» физкультурăпа спорт комплексĕнче те уçă алăксен кунĕ иртет.
Сывлăхпа спорт кунне республикăра пурăнакансене малашне физкультурăпа спорта ытларах явăçтарас, вĕсен сывлăхне çирĕплетес, çемьесене сывлăха çирĕплетме пулăшмалли çĕнĕ майсем туса парас тата спорт занятийĕсен сумĕпе витĕмлĕхне ÿстерес тесе ЧР Пуçлăхĕ М. Игнатьев кăçалхи мартăн 20-мĕшĕнче алă пуснă ятарлă Указпа килĕшÿллĕн ирттереççĕ.